ବୈଜୟନ୍ତଙ୍କ ଓଲଟା ବାଣ: ନବୀନ ବି ବ୍ୟବହାର କରିଛନ୍ତି ଇମ୍ଫା ହେଲିକପ୍ଟର

ଭୁବନେଶ୍ୱର(ଓଡ଼ିଶା ରିପୋର୍ଟର): ବିଜେଡିରୁ ନିଲମ୍ୱିତ ହେବା ପରେ ସାଂସଦ ବୈଜୟନ୍ତ ପଣ୍ଡା ଆଜି ପ୍ରଥମ ଥର ପାଇଁ ନିଜ ସଂସଦୀୟ କ୍ଷେତ୍ର କେନ୍ଦ୍ରାପଡ଼ା ଗସ୍ତରେ ଯାଇଛନ୍ତି। କେନ୍ଦ୍ରାପଡ଼ାରେ ପହଞ୍ଚିବା ପରେ ତାଙ୍କୁ ସ୍ଥାନୀୟ ଲୋକେ ପୁଷ୍ପଗୁଚ୍ଛ ଦେଇ ସ୍ୱାଗତ କରିଥିଲେ। ପରେ ଗଣମାଧ୍ୟମ ପ୍ରତିନିଧିଙ୍କ ପ୍ରଶ୍ନରେ ସାଂସଦ ପଣ୍ଡା କହିଥିଲେ-“ଗତ କିଛି ଦିନ ହେଲା ଯାହା କିଛି ଚାଲିଛି, ତାହା ମୁଁ ଆରମ୍ଭ କରିନଥିଲି। କିଛି ଲୋକ ଧମକାଇବାରୁ ମୁଁ ସେମାନଙ୍କ ବିରୋଧରେ ସ୍ୱର ଉତ୍ତୋଳନ କରିଥିଲି। ମୋର କାହାପ୍ରତି ବ୍ୟକ୍ତିଗତ ଭାବେ କିଛି ରାଗ ନାହିଁ। ଯେଉଁ ସ୍ୱର ଉଠାଇଛି, ତାହା ଦଳ ପାଇଁ ଭଲ ଥିଲା। ସର୍ବୋପରି ରାଜ୍ୟ ପାଇଁ ମଧ୍ୟ ଠିକ୍‌ ଥିଲା। ମାତ୍ର ମୋ’ ନେତା ନବୀନ ବାବୁ ଷଡ଼ଯନ୍ତ୍ରକୁ ବୁଝି ପାରିଲେ ନାହିଁ। ଏଥିପାଇଁ ମୁଁ ଅତ୍ୟନ୍ତ ଦୁଃଖିତ। ବର୍ତ୍ତମାନ ସେ ବିଷୟରେ କିଛି କହିବି ନାହିଁ। ଆଜି କେନ୍ଦ୍ରାପଡ଼ା ଆସିଛି। ପ୍ରଭୁ ବଳଦେବ ଜୀଉଙ୍କୁ ଦର୍ଶନ କରି ଆଶୀର୍ବାଦ ନେବି। କେନ୍ଦ୍ରାପଡ଼ାରୁ ଗଲା ପରେ ପୁରୀ ଯାଇ ପ୍ରଭୁ ଜଗନ୍ନାଥଙ୍କୁ ଦର୍ଶନ କରିବି। ପରେ ମନ ଶାନ୍ତି ହେବା ପରେ ଯାହା କରିବାର ଅଛି, ଭାବିଚିନ୍ତି କହିବି।”

ଆଜି ବିଜେଡି ଆଣିଥିବା ଅଭିଯୋଗ ନେଇ ସେ କହିଛନ୍ତି-“ସେମାନେ ଅଫିସ ଅଫ୍‌ ପ୍ରଫିଟ କ’ଣ ଜାଣିବା ଉଚିତ। ଘରୋଇ ସଂସ୍ଥା ପଦବୀରେ ଥିଲେ ଅଫିସ ଅଫ୍‌ ପ୍ରଫିଟ୍ ଲାଗୁ ହୁଏନି। କେବଳ ସରକାରୀ ପଦରେ ଥିଲେ ଅଫିସ ଅଫ୍ ପ୍ରଫିଟ ଲାଗୁ ହୁଏ। ମୁଁ କେଉଁ ସଂସ୍ଥା ଓ ପରିବାର ସହ ଜଡ଼ିତ, ଦଳ କଣ ଜାଣିନଥିଲା? ଏହା ଅତି ତଳ ସ୍ତରର ଅଭିଯୋଗ। ଏସବୁ ଶୋଭା ପାଉନି। ମୋ ସତ୍ୟପାଠରେ କିଛି ତ୍ରୁଟି ନାହିଁ। ଅଭିଯୋଗ ସଂପୂର୍ଣ୍ଣ ମିଥ୍ୟା। ବିଜେଡିର ବହୁ ସାଂସଦ ଓ ବିଧାୟକ ସଂସ୍ଥା(ଇମ୍ଫା)ର ହେଲିକପ୍ଟର ବ୍ୟବହାର କରିଛନ୍ତି। ନବୀନ ବାବୁ ବି ସଂସ୍ଥାର ହେଲିକପ୍ଟର ବ୍ୟବହାର କରିଛନ୍ତି। ବିଜୁ ବାବୁ ମଧ୍ୟ ବର୍ଷ ବର୍ଷ ଧରି ଏହି ସଂସ୍ଥାର ହେଲିକପ୍ଟରକୁ ନିର୍ବାଚନ ପ୍ରଚାର ପାଇଁ ବ୍ୟବହାର କରିଥିଲେ। ଯେଉଁ ସଂସ୍ଥା ୬୦୦୦ ଲୋକଙ୍କୁ ଚାକିରି ଦେଇଛି, ତାକୁ କାହିଁକି ଆଖି ଦେଖାଯାଉଛି? ଯାହା କହିବା କଥା ମୋତେ କୁହନ୍ତୁ।”

ସୂଚନାଯୋଗ୍ୟ, ଆଜି ସାଂସଦ ପଣ୍ଡା କେନ୍ଦ୍ରାପଡ଼ା ଗସ୍ତରେ ଯାଇଥିବା ବେଳେ ତାଙ୍କ ସଂସଦୀୟ କ୍ଷେତ୍ରର ଚାରି ବିଧାୟକ ପ୍ରତାପ ଜେନା, ବରିଷ୍ଠ ବିଧାୟକ ବେଦ ପ୍ରକାଶ ଅଗ୍ରୱାଲ, କିଶୋର ତରାଇ ଓ ଅତନୁ ସବ୍ୟସାଚୀ ନାୟକ ଭୁବନେଶ୍ୱରରେ ଏକ ସାମ୍ବାଦିକ ସମ୍ମିଳନୀ କରିଥିଲେ। ବୈଜୟନ୍ତ ପଣ୍ଡା ସାଂସଦ ପଦରୁ ଇସ୍ତଫା ଦିଅନ୍ତୁ ବୋଲି ସେମାନେ ଦାବି କରିଥିଲେ। ସାଂସଦ ଥାଇ ସେ ଇମ୍ଫାରୁ ଦରମା ନେଉଥିବା ଓ ୨୦୧୪ ନିର୍ବାଚନ ବେଳେ ଏନେଇ ସତ୍ୟପାଠରେ ଉଲ୍ଲେଖ କରିନଥିବା  ସେମାନେ ଅଭିଯୋଗ କରିଥିଲେ। ଏପରି କରି ଶ୍ରୀ ପଣ୍ଡା ବିଜେଡି ନେତୃବୃନ୍ଦ ଓ କେନ୍ଦ୍ରାପଡ଼ାବାସୀଙ୍କୁ ଠକିଛନ୍ତି ବୋଲି ସେମାନେ ଅଭିଯୋଗ କରିଥିଲେ। ଏହି ସାମ୍ବାଦିକ ସମ୍ମିଳନୀରେ ଦଳର ମୁଖପାତ୍ର ସସ୍ମିତ ପାତ୍ର ଓ କେନ୍ଦ୍ରାପଡ଼ା ଜିଲ୍ଲା ସଭାପତି ଧ୍ରୁବ ସାହୁ ଉପସ୍ଥିତ ଥିଲେ।