ପ୍ରମିଳାଙ୍କ ରିପୋର୍ଟ ପରେ ଗ୍ରାଉଣ୍ଡରେ ପର୍ଯ୍ୟବେକ୍ଷକ ଉଷାଦେବୀ, ଏଣେ ବୈଜୟନ୍ତ କହିଲେ ଷଡଯନ୍ତ୍ର ଚାଲିଛି

ସାଂସଦ ବୈଜୟନ୍ତ ପଣ୍ଡାଙ୍କୁ ନେଇ ବିଜେଡିରେ ଉଠିଥିବା ଝଡ଼ର ଚାଲିଛି ତଦନ୍ତ।  କେନ୍ଦ୍ରାପଡାରେ ପହଞ୍ଚିଛନ୍ତି ପର୍ଯ୍ୟବେକ୍ଷକ ଉଷା ଦେବୀ। ପ୍ରମିଳା ମଲ୍ଲିକ ରିପୋର୍ଟ ପରେ କଟକ ପଯର୍ୟବେକ୍ଷକ ଉଷା ଦେବୀ ଆଜି ତଦନ୍ତ ଆରମ୍ଭ କରିଛନ୍ତି । ସେପଟେ ଜଣେ ସମର୍ଥକଙ୍କୁ ଟୁଇଟ୍‌ ଜରିଆରେ ଉତ୍ତରେ ଦେଇ ସାଂସଦ ବୈଜୟନ୍ତ ପୁଣି ଷଡ଼ଯନ୍ତ୍ର ଥିଓରି ଉଠାଇଛନ୍ତି ।  କହିଛନ୍ତି ଯେଉଁ ଦଳ ପ୍ରତିଷ୍ଠାରେ ସହଯୋଗ କରିଥିଲି ତାକୁ ଛାଡିବା ଉଦ୍ଦେଶ୍ୟ ନାହିଁ ।  କିନ୍ତୁ ବର୍ତ୍ତମାନ ସମୟରେ ବିଜେଡିରୁ ମୋତେ ବାହାର କରିଦେବାକୁ ଏକ ବଡଧରଣର ଷଡଯନ୍ତ୍ର ଚାଲିଛି।

ନିଶ୍ଚିତକୋଇଲି, ମାହାଙ୍ଗା, ସାଲେପୁରରେ  ବୈଜୟନ୍ତଙ୍କ ବିରୋଧରେ ଚାଲିଛି  ତନାଘନା ।  କଟକ ଜିଲ୍ଲା ପର୍ଯ୍ୟବେକ୍ଷକ ଉଷା ଦେବୀ ଚଳାଇଛନ୍ତି ତଦନ୍ତ । ଗୌଡପଡା ଇରିଗେସନ୍ ଡାକବଙ୍ଗଳାରେ ଦଳୀୟ କର୍ମୀ ଓ ନେତାଙ୍କ ସହ ଆଲୋଚନା କରିଛନ୍ତି ଉଷା । ବୈଜୟନ୍ତଙ୍କ ବିରୋଧରେ ନବୀନଙ୍କ ନିକଟରେ କରାଯାଇଥିବା ଅଭିଯୋଗ ଆଧାରରେ ଏହି ତଦନ୍ତ ହେଉଛି । ଗତକାଲି କେନ୍ଦ୍ରାପଡା ଜିଲ୍ଲା ପର୍ଯ୍ୟବେକ୍ଷକ ଭାବେ ପ୍ରମିଳା ମଲ୍ଲିକ ତଦନ୍ତ ଶେଷ କରି ନବୀନଙ୍କୁ ରିପୋର୍ଟ ଦେଇଛନ୍ତି  । ଉଷା ମଧ୍ୟ ଖୁବ୍ ଶୀଘ୍ର ଦଳର ସୁପ୍ରିମୋଙ୍କୁ ରିପୋର୍ଟ ଦେବେ ବୋଲି କହିଛନ୍ତି । ତେବେ ଉଭୟ ପର୍ଯ୍ୟବେକ୍ଷକ ତଦନ୍ତ ବେଳେ ଅଧିକାଂଶ ବୈଜୟନ୍ତ ବିରୋଧୀଙ୍କ ସହ ଆଲୋଚନା କରିଥିବା ସନ୍ଦେହ ବଢ଼ାଇଛି ।  ପ୍ରଶ୍ନ ଉଠୁଛି, ପୂର୍ବନିର୍ଦ୍ଧାରିତ ହୋଇ ଯୋଜନାବଦ୍ଧ ଭାବେ ବୈଜୟନ୍ତଙ୍କୁ ଫସାଇବାକୁ ଏସବୁ ତଦନ୍ତ ହେଉନି ତ  ।

ଏଣେ ବୈଜୟନ୍ତଙ୍କ ବିବାଦ ଘଟଣାକୁ ନେଇ ଜଣେ ସମର୍ଥକ ମୁଖ୍ୟମନ୍ତ୍ରୀଙ୍କୁ ଟୁଇଟ୍ କରି ଲେଖିଥିଲେ, ବୈଜୟନ୍ତ ବିଜେଡି ଛାଡିଲେ, ଦଳ ଯୁବ ତଥା ଶିକ୍ଷିତ ବର୍ଗଙ୍କ ଆସ୍ଥା ହରାଇବ  । ସେପଟେ ବୈଜୟନ୍ତଙ୍କ ଟ୍ୱିଟ୍ ନେଇ ଦଳର ମୁଖପାତ୍ର ପ୍ରତାପ ଦେବ କହିଛନ୍ତି ସଭାପତିଙ୍କୁ ନ ଜଣାଇ ସୋସିଆଲ୍ ମିଡିଆରେ ଏଭଳି ଚର୍ଚ୍ଚା କଲେ ଦଳୀୟ ନିଷ୍ପତ୍ତି ଉପରେ କୌଣସି ପ୍ରଭାବ ପଡିବ ନାହିଁ।