ବରପଦା ଇଂଜିନିୟରିଂ କଲେଜ ବିବାଦ: ତିନି ଜଣିଆ କମିଟି ଗଠନ କଲେ ସରକାର

ଭଦ୍ରକ: ବରପଦା ଇଂଜିନିୟରିଂ କଲେଜର ପରିଚାଳନା ପାଇଁ ତିନି ଜଣିଆ ମଧ୍ୟବର୍ତ୍ତୀକାଳୀନ କମିଟି ଗଠନ କରିଛନ୍ତି  ସରକାର। ଭଦ୍ରକ ଜିଲ୍ଲାପାଳ ଲକ୍ଷ୍ମୀ ନାରାୟଣ ମିଶ୍ର, କଲେଜ ଅଧକ୍ଷ୍ୟ ମୋହନଚରଣ ପଣ୍ଡା ଏବଂ କର୍ମଚାରୀ ପ୍ରତିନିଧି ଶ୍ରୀକାନ୍ତ ମହାପାତ୍ରଙ୍କୁ ଏହି କମିଟିରେ ରଖାଯାଇଛି। ଜିଲ୍ଲାପାଳ  କମିଟିର ମୁଖ୍ୟ ରହିବେ। ତାଙ୍କ ନାଁରେ ନୂଆ ଆକାଉଣ୍ଟ୍ ଖୋଲାଯିବ। ମଙ୍ଗଳବାର ବୈଷୟିକ ଶିକ୍ଷା ଓ ତାଲିମ  ମନ୍ତ୍ରୀ ସଂଜୟ ଦାସବର୍ମାଙ୍କ ଅଧକ୍ଷ୍ୟତାରେ ବସିଥିବା ଉଚ୍ଚସ୍ତରୀୟ ବୈଠକରେ ଏହି ନିଷ୍ପତ୍ତି ନିଆଯାଇଛି।  ୧୫ ଦିନ ପରେ ପୁଣି ଏକ ବୈଠକ ଡକାଇ କଲେଜର ନୂଆ ସମ୍ୱିଧାନ ଗଢ଼ାଯିବାକୁ ସ୍ଥିର ହୋଇଛି। ସେ ପର୍ଯ୍ୟନ୍ତ ଏହି କମିଟି ପରିଚାଳନା ଦାୟିତ୍ୱ ତୁଲାଇବ। କଲେଜରେ ଲାଗି ରହିଥିବା ଅଶାନ୍ତ ସ୍ଥିତିରେ ସାମାନ୍ୟ ସୁଧାର ଆସିଥିବା ବେଳେ ଛାତ୍ରଛାତ୍ରୀ, କର୍ମଚାରୀ ଏବଂ ଆଇନ ଶୃଙ୍ଖଳା ପରିସ୍ଥିତିକୁ ଆଖିରେ ରଖି ସରକାର ଏହି ନିଷ୍ପତ୍ତି ନେଇଛନ୍ତି।