ଭୁବନେଶ୍ୱର: ସାମ୍ୱାଦିକଙ୍କୁ ମାଡ,  ଆରପିଏଫ୍ ଆଇଆଇସି ସଂଜୟ କୁମାର ସ୍ୱାଇଁ ନିଲମ୍ୱିତ

ଭୁବନେଶ୍ୱର: ସାମ୍ୱାଦିକଙ୍କୁ ମାଡ ଓ ଗିରଫ କରିବା ଘଟଣାରେ ଭୁବନେଶ୍ୱର ଆରପିଏଫ୍ ଆଇଆଇସି ସଂଜୟ କୁମାର ସ୍ୱାଇଁ  ନିଲମ୍ୱିତ ହୋଇଛନ୍ତି । ଘଟଣା ଘଟିଥିଲା ଭୁବନେଶ୍ୱର ରେଳ ଷ୍ଟେସନରେ। ସୋମବାର ସକାଳେ ପୁରୀ ଦୁର୍ଗ ଟ୍ରେନର ବିଳମ୍ୱ ହୋଇଥିବାରୁ ଯାତ୍ରୀ ଅସନ୍ତୁଷ୍ଟ ହୋଇଥିଲେ । ଏନେଇ ରାଜଧାନୀ ଏକ୍ସପ୍ରେସ ସାମନାରେ ଯାତ୍ରୀମାନେ ଧାରଣା ଦେଇଥିଲେ। ଖବର ପାଇ ଆରପିଏଫ୍ ଆଇଆଇସି ସଂଜୟ କୁମାର ସ୍ୱାଇଁ ଓ ଷ୍ଟାଫ୍ ପହଂଚିଥିଲେ। ବିନା ମହିଳା ପୋଲିସରେ ମହିଳା ଯାତ୍ରୀଙ୍କୁ ରେଳ ଧାରଣାରୁ ହଟାଇବାବେଳେ ଏକ ଘରୋଇ ଟିଭି ଚାନେଲର ପ୍ରତିନିଧି ଏହାର ଚିତ୍ର ଉତ୍ତୋଳନ କରୁଥିଲେ। ଏଥିରେ ଆଇଆଇସି ସଞ୍ଜୟ କୁମାର ସ୍ୱାଇଁ ଉତ୍ତ୍ୟକ୍ତ ହୋଇ ରିପୋର୍ଟର ଓ କ୍ୟାମେରାମ୍ୟାନଙ୍କୁ ମାଡ ମାରିବା ସହିତ ଗିରଫ କରିଥିଲେ। ଏହାର ପ୍ରତିବାଦରେ ଭୁବନେଶ୍ୱରର ସମସ୍ତ ସାମ୍ୱାଦିକ ଏହାର ପ୍ରତିବାଦ କରିବା ସହିତ ଆଇଆଇସିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଥିଲେ। ସକାଳ ୧୦ଟା ରୁ ସନ୍ଧ୍ୟା ପର୍ଯ୍ୟନ୍ତ ଏହାର ସମାଧାନ ନ ହେବାରୁ ଆରପିଏଫ ଥାନା ପରିସରରେ ଉତ୍ତେଜନା ଦେଖା ଦେଇଥିଲା। ଏ ନେଇ ପ୍ରାୟ ୨ଘଣ୍ଟା ଧରି ଟ୍ରେନ ଚଳାଚଳ ବନ୍ଦ ହୋଇଯାଇଥିଲା। ତେବେ ଘଟଣା ସ୍ଥଳରେ ଡିସିପି ସତ୍ୟବ୍ରତ ଭୋଇ ଓ ବିଭିନ୍ନ ଥାନାର ଅଧିକାରୀମାନେ ପହଞ୍ଚି ଟ୍ରେନ ଚଳାଚଳକୁ ସ୍ୱାଭାବିକ କରିଥିଲେ। ଶେଷରେ ଆରପିଏଫ ଆଇଜି ସଂଜୟ ସଂର୍କୀତାୟନ ଆଇଆଇସି ସଂଜୟ ସ୍ୱାଇଁଙ୍କୁ ନିଲମ୍ୱନ କରିବା ସହିତ ଘଟଣାର ତଦନ୍ତ କରାଯିବ ବୋଲି ପ୍ରତିଶୃତି ଦେବା ପରେ ସାମ୍ୱାଦିକମାନେ ଆନ୍ଦୋଳନରୁ ହଟିଥିଲେ।