ପ୍ରଚାରରେ ଦୁଲୁକୁଛି ବିଜେପୁର

ବରଗଡ଼ (ଓଡ଼ିଶା ରିପୋର୍ଟର): ପ୍ରଚାରରେ ଦୁଲୁକୁଛି ବିଜେପୁର। କଳେ ବଳେ କୌଶଳେ ଭୋଟରଙ୍କୁ ମନେଇବା ପାଇଁ ଲାଗିପଡିଛନ୍ତି ତିନି ପ୍ରମୁଖ ରାଜନୈତିକ ଦଳ। ବିଜେପି ପାଇଁ କେନ୍ଦ୍ରମନ୍ତ୍ରୀ ସାଧ୍ୱୀ ନିରଞ୍ଜନା ଆଜି ମୈଦାନକୁ ଓହ୍ଲାଇଥିଲେ। ସିନେ ଷ୍ଟାରଙ୍କୁ ଧରି ପ୍ରଚାର ଅଭିଯାନକୁ ଜୋରଦାର କରିଥିଲା ବିଜେଡି। ସେପଟେ ନିରଞ୍ଜନ ପଟ୍ଟନାୟକ ଏବଂ ଶ୍ରୀକାନ୍ତ ଜେନାଙ୍କ ଭଳି ହେଭିୱେଟ୍‌ ନେତା କଂଗ୍ରେସ ପ୍ରାର୍ଥୀଙ୍କ ପାଇଁ ଭୋଟରକୁ ମନାଇବାକୁ ଚେଷ୍ଟା କରିଥିଲେ।

ବିଜେପୁରରେ ଏବେ ସଭା, ରାଲି, ଡୋର୍ ଟୁ ଡୋର୍ କ୍ୟାମ୍ପେନ୍। ବିଜେପି ପ୍ରାର୍ଥୀ ଅଶୋକ ପାଣିଗ୍ରାହୀଙ୍କ ପାଇଁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ପରେ ଆଜି ମୈଦାନକୁ ଓହ୍ଲାଇଥିଲେ କେନ୍ଦ୍ରମନ୍ତ୍ରୀ ସାଧ୍ୱୀ ନିରଞ୍ଜନା। ନିରଞ୍ଜନା ଗାଇସିଲେଟ୍ ବ୍ଲକ୍‌ରେ ପ୍ରଚାର କରିଥିବା ବେଳେ ଧର୍ମେନ୍ଦ୍ର ବିଜେପୁରରେ ପ୍ରଚାର କରିଛନ୍ତି। ଏହି ଅବସରରେ ମିଶ୍ରଣ ପର୍ବ ବି ହୋଇଛି। ପଦ୍ମ ଧରିଛନ୍ତି ପୂର୍ବତନ ବିଜେଡି ନେତା ସନତ୍ କୁମାର ଗଡ଼ତିଆ।

ଏପଟେ ରୀତା ସାହୁଙ୍କ ପାଇଁ ଜାରି ରହିଛି ବିଜେଡିର ଷ୍ଟାର ପାଓ୍ୱାର। ସାଂସଦ ତଥା ଅଭିନେତା ଅନୁଭବ ମହାନ୍ତି ଅଜି ବିଜେପୁରରେ ପ୍ରଚାର କରିଥିଲେ। ସାଙ୍ଗରେ ଥିଲେ ମନ୍ତ୍ରୀ ଚନ୍ଦ୍ରସାରଥୀ ବେହେରା। ବରପାଲି ବ୍ଲକ୍‌ରେ ବିଭିନ୍ନ ଅଞ୍ଚଳରେ ବିଧାୟକ ଆକାଶ ଦାସ ନାୟକ, ମନ୍ତ୍ରୀ ସ୍ନେହାଙ୍ଗିନୀ ଛୁରିଆ, ବିଧାୟକ ଅତନୁ ସବ୍ୟସାଚୀ ନାୟକ ଏବଂ ଅଭିନେତା କୁନା ତ୍ରିପାଠୀ ରୀତାଙ୍କ ପାଇଁ ଭୋଟ୍ ମାଗିଥିଲେ।

ଅନ୍ୟପକ୍ଷରେ ରୋଡ୍ ଶୋ’ ଅପେକ୍ଷା ସଭାସମିତି ଜରିଆରେ ଭୋଟରଙ୍କ ପାଖରେ ପହଞ୍ଚିବାକୁ ଉଦ୍ୟମ ଚଳାଇଛି କଂଗ୍ରେସ। ଆଜି ବରପାଲିରେ ବିରୋଧୀ ଦଳ ନେତା ନରସିଂହ ମିଶ୍ର, ନିରଞ୍ଜନ ପଟ୍ଟନାୟକ, ଜୟଦେବ ଜେନା, ଶରତ ପଟ୍ଟନାୟକ ଓ ଶ୍ରୀକାନ୍ତ ଜେନାଙ୍କ ଭଳି ଦଳର ହେଭିୱେଟ୍‌ ନେତା ସାଧାରଣ ସଭା କରି ପ୍ରାର୍ଥୀ ପ୍ରଣୟ ସାହୁଙ୍କ ପାଇଁ ପ୍ରଚାର କରିଥିଲେ।