ସି-ସୋର ଚିଟଫଣ୍ଡ ଠକେଇ: ୫ଜଣଙ୍କ ନାଁରେ ଚାର୍ଜସିଟ୍‌ ଦାଖଲ

ଭୁବନେଶ୍ୱର( ଓଡ଼ିଶା ରିପୋର୍ଟର): ସି-ସୋର ଚିଟଫଣ୍ଡ ଠକେଇ ମାମଲାର ଦ୍ୱିତୀୟ ଚାର୍ଜସିଟ୍‌ ସିବିଆଇ ଦାଖଲ କରିଛି। ବିଜେଡି ବିଧାୟକ ପ୍ରଭାତ ବିଶ୍ୱାଳ, ତାଙ୍କ ପତ୍ନୀ ଲକ୍ଷ୍ମୀ ବିଳାସିନୀ ବିଶ୍ୱାଳ, ଅବସରପ୍ରାପ୍ତ ବରିଷ୍ଠ ଓଏଏସ୍‌ ଅଧିକାରୀ ପ୍ରଦୀପ ହୋତା, ତାଙ୍କ ପତ୍ନୀ ପ୍ରତିମା ହୋତାଙ୍କ ସହ ସି-ସୋର ମୁଖ୍ୟ ପ୍ରଶାନ୍ତ ଦାଶଙ୍କ ନାଁରେ ଏହି ଚାର୍ଜସିଟ୍ ଦାଖଲ କରାଯାଇଛି। ଏଥିସହ ସି-ସୋର ମଲଟି ପର୍ପୋଜ କୋ-ଅପରେଟିଭ୍ ଲିମିଟେଡ୍‌ ବିରୋଧରେ ମଧ୍ୟ ଚାର୍ଜସିଟ ହୋଇଛି।

ବିଧାୟକ ପ୍ରଭାତ ବିଶ୍ୱାଳ ସି-ସୋର କମ୍ପାନୀକୁ ସୁରକ୍ଷା ଦେଉଥିଲେ। ଏଥିଯୋଗୁଁ କଟକ ଓ ଆଖପାଖ ଅଞ୍ଚଳରେ ସିସୋର ପକ୍ଷରୁ ବ୍ୟବସାୟ ଆରମ୍ଭ ହୋଇଥିଲା ବୋଲି ଚାର୍ଜସିଟରେ ଉଲ୍ଲେଖ ରହିଛି। ବିଧାୟକ ଓ ତାଙ୍କ ପତ୍ନୀ ଜାଲ୍‌ କାଗଜପତ୍ର ଦ୍ୱାରା ୨୫ଲକ୍ଷ ଟଙ୍କା ନେଇଥିବା ସିବିଆଇ ଦର୍ଶାଇଛି।

ସେହିପରି ଅବସରପ୍ରାପ୍ତ ବରିଷ୍ଠ ଓଏଏସ୍‌ ଅଧିକାରୀ ପ୍ରଦୀପ ହୋତା ଇପିକଲର ମ୍ୟାନେଜିଂ ଡିରେକ୍ଟର ଥିବା ବେଳେ ସିସୋର ପ୍ରତି ଅହେତୁକ ଅନୁକମ୍ପା ଦେଖାଇଥିଲେ। ସେ ଓ ତାଙ୍କ ପତ୍ନୀ ପ୍ରତିମା ହୋତା ସିସୋର ଠାରୁ ୧୯ଲକ୍ଷରୁ ଅଧିକ ଟଙ୍କା ନେଇଥିବା ସିବିଆଇ ଦର୍ଶାଇଛି।

ସିସୋର ମୁଖ୍ୟ ପ୍ରଶାନ୍ତ ଦାଶଙ୍କ ବିରୋଧରେ ତଦନ୍ତ ପ୍ରକ୍ରିୟା ଜାରି ରହିଛି ବୋଲି ସିବିଆଇ ପକ୍ଷରୁ ୧୦୦ପୃଷ୍ଠା ବିଶିଷ୍ଟ ଚାର୍ଜସିଟରେ ଉଲ୍ଲେଖ ରହିଛି। ଏହି ୫ଜଣଙ୍କ ବିରୋଧରେ ଠକେଇ, ଅପରାଧିକ ଷଡଯନ୍ତ୍ର ଓ ଜାଲିଆତି ଭଳି ସଙ୍ଗୀନ ଦଫା ଲାଗିଛି।

ସି-ସୋର ଚିଟ୍‌ଫଣ୍ଡ ଠକେଇ ଅଭିଯୋଗରେ ସିସୋର ମୁଖ୍ୟ ପ୍ରଶାନ୍ତ ଦାଶଙ୍କୁ ଢେଙ୍କାନାଳ ପୋଲିସ ରିମାଣ୍ଡରେ ନେଇ ଏବେ ପଚରାଉଚରା କରୁଛି।