CII ପ୍ରସଙ୍ଗକୁ ନେଇ ତେଜିଲା ବିବାଦ: ଷଡ଼ଯନ୍ତ୍ର ଅଭିଯୋଗ ଆଣି  ଇଷ୍ଟର୍ଣ୍ଣ ରିଜିୟନ ଅଧ୍ୟକ୍ଷାଙ୍କୁ ଟାର୍ଗେଟ କଲା ବିଜେଡି, ଜଗି ମଙ୍ଗତ କହିଲେ ମୋତେ ପଲିଟିକ୍ସକୁ ଟାଣନା

ଭୁବନେଶ୍ୱର,(ଓଡ଼ିଶା ରିପୋର୍ଟର): ମେକ୍ ଇନ୍ ଓଡ଼ିଶା କନ୍‌କ୍ଲେଭ୍‌ରୁ ଭାଗିଦାରୀ ପାଇଁ CII ପ୍ରଥମେ ସମ୍ମତି ଦେଇ ପରେ ଓହରିଯିବା ନେଇ ଷଡ଼ଯନ୍ତ୍ରର ଥିଓରୀ ଆଣିଛି ବିଜେଡି।  ତେବେ କେବଳ ସନ୍ଦେହ ଆଧାରରେ ବିଜେଡିରୁ ନିଲମ୍ବିତ ସାଂସଦ ବୈଜୟନ୍ତ ପଣ୍ଡା ଓ CII- ଇଷ୍ଟର୍ନ ରିଜନ୍‌ ଅଧ୍ୟକ୍ଷା ଜଗି ମଙ୍ଗତ ପଣ୍ଡାଙ୍କ ବିରୋଧରେ ଚକ୍ରାନ୍ତ ଅଭିଯୋଗ ଆଣିଛି ଦଳ । ସେପଟେ ଜଗି କହିଛନ୍ତି ବିଜେଡି ତାଙ୍କୁ ଅଯଥା ପଲିଟିକ୍ସକୁ ନଟାଣୁ ।  ଯାହା ରାଜନୀତି କରିବାର ଅଛି ବୈଜୟନ୍ତଙ୍କୁ ନେଇ କରନ୍ତୁ।  ସେପଟେ ପୂରା ଘଟଣାରେ ରାଜ୍ୟ ଶିଳ୍ପ ବିଭାଗର ଭୂମିକା ନେଇ ବି ଉଠିଛି ପ୍ରଶ୍ନ ?  

ଏ ସମ୍ପର୍କରେ ଆଜି ଏକ ସାମ୍ବାଦିକ ସମ୍ମିଳନୀ କରିଥିଲା ବିଜେଡି। ଗତ ଫେବୃୟାରୀ ୧୪ ପର୍ଯ୍ୟନ୍ତ ଏହି କନ୍‌କ୍ଲଭ୍‌ରେ ସମସ୍ତ ସହଯୋଗ କରିବାକୁ CII ସମ୍ମତି ଜଣାଇଥିଲା।  ତେବେ ହଠାତ୍ ଏପ୍ରିଲ ୪ ତାରିଖରେ କାହିଁକି ଏଥିରୁ ଓହରି ଯିବାକୁ ନିଷ୍ପତ୍ତି ନେଲା କେନ୍ଦ୍ର ?  CII ପୂର୍ବାଞ୍ଚଳ ଅଧ୍ୟକ୍ଷା ନା ଶିଳ୍ପସଂସ୍ଥା ? କିଏ ଏଥିପାଇଁ ଚାପ ପକାଉଛନ୍ତି ବୋଲି ଦଳ ପ୍ରଶ୍ନ କରିଛି । ତେବେ କେଉଁ ଆଧାରରେ ବିଜେଡି ଏହି ଅଭିଯୋଗ ଆଣୁଛି ବୋଲି ପ୍ରଶ୍ନରେ ଦଳ ପକ୍ଷରୁ କୌଣସି ଠୋସ୍ ତଥ୍ୟ ପ୍ରମାଣ ରଖାଯାଇ ନଥିଲା।  ଓଲଟା ଆଳ ଦେଖାଇ, ସାଂସଦ  ବୈଜୟନ୍ତ ପଣ୍ଡା ବିଜେଡିରୁ ସସ୍ପେଣ୍ଡ ପରେ ଏଭଳି ସନ୍ଦେହ ଉପୁଜୁଥିବା ଦଳ କହିଛ । ସେପଟେ ଜଗି କହିଛନ୍ତି, ବିଜେଡି ଯାହା ରାଜନୀତି କରିବାର ଅଛି ବୈଜୟନ୍ତଙ୍କୁ ନେଇ କରୁ। କିନ୍ତୁ ତାଙ୍କୁ ଅଯଥା ରାଜନୀତିକୁ ଟାଣନ୍ତୁ ନାହିଁ।   ଏହି ପ୍ରସଙ୍ଗରେ CIIର ରାଜ୍ୟ ଅଫିସ୍ କିମ୍ବା କେନ୍ଦ୍ରୀୟ ଅଫିସ୍ ସହ ଆଲୋଚନା କରିବା ଉଚିତ୍ ବୋଲି ସେ କହିଛନ୍ତି।

ସେପଟେ ମେକ୍ ଇନ୍ ଓଡ଼ିଶା କାର୍ଯ୍ୟକ୍ରମରୁ CII ଓହରିବାପରେ ଏହାର ଓଡିଶା ଶାଖା ଅଧ୍ୟକ୍ଷ ଅରୁଣ ମିଶ୍ର ଓ ଉପାଧ୍ୟକ୍ଷ ସୁବ୍ରତ ତ୍ରିପାଠୀ ଇସ୍ତଫା ଦେଇଥିଲେ।  ପ୍ରଶ୍ନ ଉଠୁଛି କାହା ଚାପରେ ଦୁହେଁ ଇସ୍ତଫା ଦେଇଛନ୍ତି? ବିଜେଡି ପ୍ରେସ୍‌ମିଟ୍‌ କରି ନାନା ଅଭିଯୋଗ ବଖାଣୁଥିବା ବେଳେ ଶିଳ୍ପ ବିଭାଗ କାହିଁକି କେବଳ ପ୍ରେସ୍ ରିଲିଜ୍ ଜାରି କରି ଚୁପ୍ ବସିଛି ?  ମେକ୍ ଇନ୍ ଓଡ଼ିଶାରୁ ଓହରିବା ବିଜେଡି କହୁଥିବା ବେଳେ ସିଆଇଆଇର ଓଡ଼ିଶା ଶାଖା କିନ୍ତୁ କିଛି ସ୍ପଷ୍ଟ କରିନାହିଁ କାହିଁକି?   ଏମିତିକି CIIର କେନ୍ଦ୍ରୀୟ ଶାଖା ପକ୍ଷରୁ ମଧ୍ୟ ଏ ନେଇ କୌଣସି କାରଣ ଦର୍ଶାଯାଇ ନାହିଁ ।  ଅନ୍ୟପକ୍ଷରେ ଓଟିଭିକୁ ମିଳିଥିବା ସୂଚନା ଅନୁସାରେ ସେ ଆନ୍ଧ୍ରପ୍ରଦେଶ, ମହାରାଷ୍ଟ୍ର କି ଉତ୍ତରପ୍ରଦେଶ, ସବୁଠି ସିଆଇଆଇ ରାଜ୍ୟ ଶାଖା ହିଁ ଏଭଳି କାର୍ଯ୍ୟକ୍ରମ ଆୟୋଜନ କରିଥାଏ।   ମେକ୍ ଇନ୍ ଓଡ଼ିଶା କାଯର୍ୟକ୍ରମରେ CII, ଏହାର ସେଣ୍ଟ୍ରାଲ୍ ଅଫିସ୍‌କୁ  ଅଯଥା ଭାରାକ୍ରାନ୍ତ ନକରି ରାଜ୍ୟ ଶାଖା ସହଯୋଗରେ ଆୟୋଜନ ଲାଗି ଅନୁରୋଧ କରିଥିଲା।  ଏହା ସତ୍ତ୍ୱେ ସେଣ୍ଟ୍ରାଲ୍ ଅଫିସ୍ ଉପରେ ଏମ୍ଓୟୁ  ଲାଗି ଚାପ ପକାଇ ରାଜ୍ୟ ସରକାର ମେକ୍ ଇନ୍ ଓଡ଼ିଶାରେ ବାହାବାଃ ନେବାକୁ ଉଦ୍ୟମ କରୁ ନ ଥିଲେ ତ ? ଏ ବିବାଦ ପଛରେ ଏହା ଏକ କାରଣ ନୁହେଁ କି?  ସେପଟେ CII ଓଡ଼଼ିଶାର ଉପାଧ୍ୟକ୍ଷ ପଦରୁ ଇସ୍ତଫା ଦେଇଥିବା ସୁବ୍ରତ ତ୍ରିପାଠୀ କହିଛନ୍ତି ରାଜ୍ୟ ସରକାରଙ୍କ ସ୍ୱାର୍ଥ ଦୃଷ୍ଟିରୁ ସେ ଇସ୍ତଫା ଦେଇଛନ୍ତି ।  

ବିଜେଡି କହିଛି, ସିଆଇଆଇ  ଓହରିଗଲେ ବି ରାଜ୍ୟ ସରକାର କନ୍‌କ୍ଲେଭ୍‌ ଆୟୋଜନ ପାଇଁ ସକ୍ଷମ  । ଗୋଟିଏ ପଟେ ଏ ଦାବି, ଅନ୍ୟପଟେ ପ୍ରସଙ୍ଗକୁ  ବିବାଦୀୟ କରିବାକୁ ବି ଭରପୁର ପ୍ରୟାସ।   ତେବେ ଏହା କେବଳ ବିଜେଡି-ବୈଜୟନ୍ତ କଳିର ଆଉ ଏକ ଚାପ୍ଟେର  ନୁହେଁ ତ ?  ଏଭଳି ଅନେକ ପ୍ରଶ୍ନ ସନ୍ଦେହକୁ ଅଧିକ ବଢ଼ାଉଛି ।