ପୂଜା ପୂର୍ବରୁ ପୁଲିସର ସ୍ପେଶାଲ ଡ୍ରାଇଭ୍‌, ସାବାଡ଼ ହେବେ ଅପରାଧୀ

ଭୁବନେଶ୍ୱର(ଓଡ଼ିଶା ରିପୋର୍ଟର): ପୂଜା ପୂର୍ବରୁ ସାବାଡ ହେବେ କ୍ରିମିନାଲ। ଆରମ୍ଭ ହୋଇଛି କମିଶନରେଟ୍ ପୁଲିସର ସ୍ପେଶାଲ ଡ୍ରାଇଭ୍।  ଦଶହରାକୁ ଆଖି ଆଗରେ ରଖି କମିଶନରେଟ୍ ପୁଲିସ ପକ୍ଷରୁ ସ୍ପେଶାଲ ଡ୍ରାଇଭ୍ କରାଯାଇଛି। ରାତିରେ ପୁଲିସ ଅଧିକାରୀମାନେ ଭୁବନେଶ୍ୱରର ବିଭିନ୍ନ ବସ୍ତି ଅଞ୍ଚଳ ବୁଲି ବୁଲି ବେଆଇନ୍ ମଦ କାରବାର, ଖୋଲାରେ ମଦ ପିଇବା, ବେଆଇନ୍ ଭାବେ ଅଯଥା ଖଟି କରିବା ଇତ୍ୟାଦି ପରଖିଥିଲେ।

କ୍ୟାପିଟାଲ ଥାନା ପୁଲିସ ୟୁନିଟ୍-୬ର ବସ୍ତି ଅଞ୍ଚଳ, ଲକ୍ଷ୍ମୀସାଗର ପୁଲିସ ହଳଦିପଡିଆ ଓ ଝାରପଡ଼ାର ବସ୍ତି, ଖାରବେଳନଗର ଥାନା ପୁଲିସ ଶାନ୍ତିନଗର ଓ ମାଳିସାହି ଅଞ୍ଚଳ ବୁଲି ସ୍ଥିତି ପରଖିଥିଲେ। କେଉଁଠି ବେଆଇନ୍ ଭାବେ ଦେଶି ମଦ ରନ୍ଧା ହେଉଛି କି , ଅଯଥାରେ ଖଟି ହେଉଛି କିମ୍ବା ନିଶା କାରବାର ଚାଲିଛି କି, ତାର ଯାଞ୍ଚ କରିଥିଲେ ଏସିପି।

ଯଦି କେହି ଧରା ପଡନ୍ତି ତେବେ ତାଙ୍କୁ ତୁରନ୍ତ ଗିରଫ କରାଯିବ। ଲଗାତର ରେଡ୍‌ ଚାଲିଛି ବୋଲି ପୁଲିସ କହିଛି। ରାଙ୍କ ଅଫିସରଙ୍କ ନେତୃତ୍ୱରେ ହୋଇଥିବା ଏହି ସ୍ପେଶାଲ ଡ୍ରାଇଭ୍‌ରେ ଥାନା ଆଇଆଇସି ଓ ଏସ୍.ଆଇ ମାନେ ସାମିଲ ହୋଇଥିଲେ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।