‘ଲୋକପାଳଙ୍କୁ ଚିଠି ମାଧ୍ୟମରେ କରିହେବ ଅଭିଯୋଗ’

ଭୁବନେଶ୍ୱର(ଓଡ଼ିଶା ରିପୋର୍ଟର): ଲୋକପାଳଙ୍କୁ ୱେବସାଇଟ୍‌ କିମ୍ବା ପତ୍ର ମାଧ୍ୟମରେ କରିହେବ ଅଭିଯୋଗ। ଏଥିପାଇଁ ଖୁବ୍‌ଶୀଘ୍ର ନୂତନ ଫର୍ମାଟ୍‌ ସଂପର୍କିତ ବିଜ୍ଞପ୍ତି ପ୍ରକାଶ ପାଇବ। ଏନେଇ ସୂଚନା ଦେଇଛନ୍ତି ଲୋକପାଳ ଜଷ୍ଟିସ ପିନାକୀ ଚନ୍ଦ୍ର ଘୋଷ।

ଭୁବନେଶ୍ୱରରେ ଶିକ୍ଷା ଓ ଅନୁସନ୍ଧାନ ବିଶ୍ୱବିଦ୍ୟାଳୟରେ ଆୟୋଜିତ କାର୍ଯ୍ୟକ୍ରମରେ ଯୋଗଦେଇ ଲୋକପାଳ କହିଛନ୍ତି, ଦୁର୍ନୀତି ନିବାରଣ ଆଇନ ଓ ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗ ସଂକ୍ରାନ୍ତୀୟ ନିୟମ ଅନୁଯାୟୀ ଅଭିଯୋଗ କରିବାକୁ ପଡ଼ିବ। ଗତ ମାର୍ଚ୍ଚ ମାସରେ ଲୋକପାଳ ଓ ଏହାର ସଦସ୍ୟଙ୍କ ନିଯୁକ୍ତି ହୋଇଛି। ହେଲେ ଏ ପର୍ଯ୍ୟନ୍ତ ସ୍ୱୟଂ ସମ୍ପୂର୍ଣ୍ଣ ହୋଇପାରି ନାହିଁ ଲୋକପାଳ। ଲୋକପାଳଙ୍କ ନିକଟକୁ ଏବେସୁଦ୍ଧା ପ୍ରାୟ ୧ ହଜାର ୧୪୪ ଅଭିଯୋଗ ଆସିଛି। ଏହି ଅଭିଯୋଗ ଗୁଡ଼ିକ ନିୟମ ଅନୁଯାୟୀ ଆସିନଥିବା ସେ କହିଛନ୍ତି। ଏଥିସହ ଆଗାମୀ ଦିନରେ ଲୋକେ ଦୁର୍ନୀତିକୁ ବିରୋଧ କଲେ ବିକାଶ ହୋଇପାରିବ ବୋଲି ମତ ରଖିଛନ୍ତି ଜଷ୍ଟିସ୍ ଘୋଷ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।