କେଉଁଠି ଚଢ଼ଉ ତ କେଉଁଠି ସଚେତନତା

ସୋର/ବଲାଙ୍ଗିର(ଓଡ଼ିଶା ରିପୋର୍ଟର): ନିଶା କବଳରେ ମଣିଷ । ବଲାଙ୍ଗିର ପରେ ବାଲେଶ୍ୱରରେ ବେଆଇନ୍ କଫ୍ ସିରପ୍ କାରବାର ହେଉଥିବା ଅଭିଯୋଗ ହେଉଛି। ବାହାନଗା ବ୍ଲକ ଗୋପାଳପୁର ଅଞ୍ଚଳରୁ ୨୦୦ରୁ ଅଧିକ କଫ୍ ସିରପ୍ ବୋତଲ ଜବତ ହୋଇଛି ।

ବାଲେଶ୍ୱର-ସୋର ଓ ନିଳଗିରି ଅଞ୍ଚଳର ଅବକାରୀ ବିଭାଗ ଅଧିକାରୀ ଆଜି ଗୋପାଳପୁର ନାୟକ ସାହିର ଶତ୍ରୁଘ୍ନ ନାୟକଙ୍କ ଘରେ ମିଳିତ ଭାବେ ଚଢ଼ଉ କରି ଏତେ ପରିମାଣର କଫ୍ ସିରପ ଜବତ କରିଛନ୍ତି । ଘଟଣାରେ ଶତ୍ରୁଘ୍ନଙ୍କ ପୁଅ ଲକେଶ ନାୟକଙ୍କୁ ଗିରଫ କରାଯାଇଛି । ଏହି ଘଟଣାରେ  ଜିଲ୍ଲାର ବିଭିନ୍ନ ସ୍ଥାନରେ ଚଢ଼ଉ ଜାରି ରଖିଛି ଅବକାରୀ ବିଭାଗ ।  ଗତକାଲି ବଲାଙ୍ଗିର ଜିଲ୍ଲା ପାଟଣାଗଡ଼ରୁ ପ୍ରାୟ ୧୬ ହଜାର ବୋତଲ କଫ୍ ସିରପ ଜବତ ହୋଇଥିଲା ।

ବେଆଇନ କଫ୍‌ ସିରପ୍‌ କାରବାର ରୋକିବାକୁ ବଲାଙ୍ଗିରରେ ପୁଲିସ୍‌ର ସଚେତନତା ସଭା।

ଅପରପକ୍ଷେ ବଲାଙ୍ଗିର ଜିଲ୍ଲାର ବିଭିନ୍ନ ସ୍ଥାନରୁ ନିୟମିତ ଭାବେ କଫ୍ ସିରପ ଜବତ ହେବାକୁ ନେଇ ଉଦ୍‌ବେଗ ପ୍ରକାଶ ପାଇଛି। ବାରମ୍ବାର ଚଢ଼ଉ ପରେ ମଧ୍ୟ କାରବାର କମୁନଥିବାରୁ ଏହାକୁ ରୋକିବା ଲାଗି ଜିଲ୍ଲା ପୁଲିସ୍‌ ସଚେତନତା କାର୍ଯ୍ୟକ୍ରମ ଆରମ୍ଭ କରିଛି । ଆଜି ଟାଉନ ଥାନାରେ ଏନେଇ ପୋଲିସର ବୈଠକ ହୋଇଥିଲା। ଏହାପରେ କଲେଜ ଛାତ୍ରଛାତ୍ରୀଙ୍କୁ ନେଇ ବିରାଟ ଶୋଭାଯାତ୍ରା କରାଯାଇଛି । ଶୋଭାଯାତ୍ରାରେ ଛାତ୍ରଛାତ୍ରୀମାନେ ହାତରେ ବ୍ୟାନର ଧରି କଫ୍ ସିରପ୍ କାରବାର ରୋକିବା ସମ୍ପର୍କରେ ନାରା ଦେଇଥିଲେ ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।