ତେଲକୋଇ(ଚିନ୍ମୟ ସାହୁ): କୁହାଯାଏ ମାଆ ପରି କିଏ ହେବ। ଯାହାର ପଣତ କାନି ତଳେ ସନ୍ତାନ ଦେଖେ ନୂଆ ଦୁନିଆ। ଆଉ ଜୀବନକୁ ସୁରକ୍ଷିତ ମନେ କରେ। ସେଥିପାଇଁ ତ କୁହାଯାଏ ମାଆ ଯାହାର ସାହା, କିଅବା ହୋଇପାରେ ତା’ର ଅନ୍ୟଥା। ଏମିତି ଏକ ଉଦାହରଣ ଦେଖିବାକୁ ମିଳିଛି କେନ୍ଦୁଝର ଜିଲ୍ଲା ହରିଚନ୍ଦନପୁର ଥାନା ଅଞ୍ଚଳରେ। ଅଜଣା ଗାଡ଼ି ଧକ୍କାରେ ଚାଲିଯାଇଛି ମାଆ ଓ ବାପାଙ୍କ ଜୀବନ। କିନ୍ତୁ ମୃତ ମାଆ କୋଳରେ ଥିବା ୪ ମାସର ଶିଶୁ କନ୍ୟାଙ୍କ ଜୀବନ ବଞ୍ଚି ଯାଇଛି।
ଯାଜପୁର ଜିଲ୍ଲା ଡୁବୁରୀ ଥାନା ନଡ଼ିଆଭଙ୍ଗା ଗାଁର ଦୁଃଖିରାମ ମାରାଣ୍ଡି, ତାଙ୍କ ସ୍ତ୍ରୀ ଓ ୪ ମାସର ଶିଶୁ କନ୍ୟାକୁ ଧରି କୌଣସି କାମରେ କେନ୍ଦୁଝର ଜିଲ୍ଲା ହରିଚନ୍ଦନପୁର ଅଞ୍ଚଳକୁ ଯାଇଥିଲେ। ସେଠାରୁ ଫେରୁଥିବା ବେଳେ ଖଡ଼ିବାହାଲ ନିକଟସ୍ଥ ବାଘୁଆ ନାଳ ନିକଟରେ ଏକ ଅଜଣା ଗାଡ଼ି ସେମାନଙ୍କ ବାଇକ୍କୁ ଧକ୍କା ଦେଇ ପଳାଇଯାଇଥିଲା। ଦୁର୍ଘଟଣା ପରେ ଦୁଃଖିରାମ ଓ ତାଙ୍କ ପତ୍ନୀ ରକ୍ତାକ୍ତ ଅବସ୍ଥାରେ ରାସ୍ତା ପାର୍ଶ୍ୱରେ ପଡ଼ିଥିଲେ। ଆଉ ଦୁଃଖିରାମଙ୍କ ମୃତ ପତ୍ନୀଙ୍କ କୋଳରେ ରାହାଧରି କାନ୍ଦୁଥିଲା ଶିଶୁ କନ୍ୟା।
ଠିକ୍ ଏହି ସମୟରେ ସେହି ରାସ୍ତାରେ ଫେରୁଥିବା ମୋବାଇଲ୍ ହେଲ୍ଥ୍ ୟୁନିଟ୍ର କର୍ମକର୍ତ୍ତାମାନେ ଗୁରୁତର ଆହତ ଦୁଃଖିରାମ ଓ ୪ ମାସର ଶିଶୁ କନ୍ୟାକୁ ଉଦ୍ଧାର କରି ହରିଚନ୍ଦନପୁର ମେଡିକାଲ୍ରେ ଭର୍ତ୍ତି କରିଥିଲେ। ସେଠାରେ ଡାକ୍ତର ଦୁଃଖିରାମଙ୍କୁ ମୃତ ଘୋଷଣା କରିଥିଲେ। ଶିଶୁ କନ୍ୟାଙ୍କ ସ୍ୱାସ୍ଥ୍ୟ ଅବସ୍ଥା ଗୁରୁତର ଥିବାରୁ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
