କଟକ: ସ୍କୁଲ ଘରୁ ପାଲ ଚୋରି ସନ୍ଦେହ, ବୃଦ୍ଧଙ୍କୁ ପିଟିପିଟି ହତ୍ୟା

କଟକ: କଟକ ଜିଲା ବୟାଳିଶ ମୌଜା ଫାଣ୍ଡି ଅଞ୍ଚଳରେ ଏକ ସ୍କୁଲ ଘରୁ ପାଲ ଚୋରି କରିଥିବା ସନ୍ଦେହରେ ଜଣେ ବୃଦ୍ଧଙ୍କୁ ପିଟିପିଟି ହତ୍ୟା କରାଯାଇଥିବା ଅଭିଯୋଗ ହୋଇଛି। ମୃତକ ଜଣଙ୍କ ହେଲେ ବୟାଳିଶ ମୌଜା ଦହି ଗାଁର ବଂଶୀଧର ଭାଇ (୭୦)। ମୃତ ବଂଶୀଧରଙ୍କ ପୁଅ ଶଙ୍କରଙ୍କ ଅଭିଯୋଗକୁ ଭିତ୍ତି କରି ପୋଲିସ ଏକ ମାମଲା ରୁଜୁ କରିବା ସହ ଶବ ଜବତ କରି ବ୍ୟବଚ୍ଛେଦ ଲାଗି ପଠାଇଛି।  ଘଟଣାରେ ସମ୍ପୃକ୍ତ ଥିବା ଅଭିଯୋଗରେ ପୋଲିସ ୫ଜଣଙ୍କୁ ଅଟକ ରଖି ପଚରାଉଚରା କରୁଥିବା ଜଣାପଡିଛି। ସୂଚନାଯୋଗ୍ୟ ଯେ, ଗତ ୨ ତାରିଖରେ ସ୍ଥାନୀୟ ସ୍କୁଲ ଘରୁ ପାଲ ଚୋରି ହୋଇଥିଲା। ଏହି ଚୋରିରେ ବଂଶୀଧର ସମ୍ପୃକ୍ତ ଥିବା ଗ୍ରାମର କିଛି ଯୁବକ ସନ୍ଦେହ କରୁଥିଲେ । ସେମାନେ ବଂଶୀଧରଙ୍କୁ ଡାକି ଚୋରି ସମ୍ପର୍କରେ ପଚାରିବା ସହ ମାଡ ମାରିଥିଲେ । ଫଳରେ ସେ ଗୁରୁତର ହୋଇପଡି ମୃତ୍ୟୁବରଣ କରିଥିବା ଶଙ୍କର ଥାନାରେ କରିଥିବା ଅଭିଯୋଗରେ ଦର୍ଶାଇଛନ୍ତି ।