ଭୁବନେଶ୍ୱର: ବଙ୍ଗୋପସାଗରରେ ସୃଷ୍ଟ ଲଘୁଚାପ ବାତ୍ୟାର ରୂପ ନେବା ଆଶଙ୍କା ରହିଛି। ଏହାର ପ୍ରଭାବରେ ବର୍ଷା ହେବା ସମ୍ଭାବନା ରହିଛି । ୭ରୁ ଦକ୍ଷିଣ ଓଡ଼ିଶାର ୪ଟି ଜିଲ୍ଲାରେ ବର୍ଷା ହୋଇପାରେ। କୋରାପୁଟ, ମାଲକାନଗିରି, ଗଜପତି, ଗଂଜାମରେ ପ୍ରବଳ ବର୍ଷା ହେବା ନେଇ ପାଣିପାଗ ବିଭାଗ ସୂଚନା ଦେଇଛି। ଉପକୂଳ ଓ ଆଭ୍ୟନ୍ତର ଓଡ଼ିଶାରେ ୮ ଓ ୯ ତାରିଖରେ ବର୍ଷା ବଢ଼ିବା ନେଇ ଆଶଙ୍କା କରାଯାଉଛି। ସେପଟେ ସମ୍ଭାବ୍ୟ ବର୍ଷା ପୂର୍ବରୁ ଫସଲକୁ ସୁରକ୍ଷିତ ରଖିବା ଲାଗି ଚାଷୀମାନଙ୍କୁ ପରାମର୍ଶ ଦେଇଛି ରାଜ୍ୟସ୍ୱ ଓ ବିପର୍ଯ୍ୟୟ ପ୍ରଶମନ ବିଭାଗ।
ଯେଉଁ ଅଞ୍ଚଳରେ ଚାଷୀମାନେ ଧାନ ଅମଳ ସାରିଛନ୍ତି, ଅମଳ ଧାନକୁ ସୁରକ୍ଷିତ ସ୍ଥାନରେ ସାଇତି ରଖିବା ସହ ଘୋଡ଼ାଇ ରଖନ୍ତୁ । ଯେଉଁଠି ଅମଳ ହୋଇନି ସେଠାରେ ଚାଷୀମାନେ ତୁରନ୍ତ ଅମଳ କରିବାକୁ ରାଜସ୍ୱ ବିଭାଗ ପରାମର୍ଶ ଦେଇଛି। ସେହିପରି ମଣ୍ଡିଗୁଡ଼ିକରେ ଥିବା ଧାନ ଯେପରି ନଷ୍ଟ ନହୁଏ ସେଥିପାଇଁ ମଧ୍ୟ ପଦକ୍ଷେପ ନେବାକୁ କୁହାଯାଇଛି। ଏ ନେଇ ସବୁ ଜିଲ୍ଲାର ଜିଲ୍ଲାପାଳମାନଙ୍କୁ ଏସ୍ଆରସି ତଥା ସ୍ୱତନ୍ତ୍ର ରିଲିଫ୍ କମିଶନର ଚିଠି ଲେଖିଛନ୍ତି। ଏପଟେ ଫସଲ ସୁରକ୍ଷା ନେଇ ଆସନ୍ତାକାଲି ସରକାରଙ୍କ ସହ ଆଲୋଚନା କରାଯିବ ବୋଲି ଓୟୁଏଟିର କୂଳପତି ସୁରେନ୍ଦ୍ରନାଥ ପଶୁପାଳକ ସୂଚନା ଦେଇଛନ୍ତି।