ଦାଦନ ଯାଉଥିବା ବେଳେ ଟ୍ରେନ୍‌ରୁ ଖସି ପଡ଼ିଲେ, ତା ପରେ…

ବ୍ରହ୍ମପୁର (ଓଡ଼ିଶା ରିପୋର୍ଟର): କୋହ ଆଉ ଲୁହରେ ଭିଜୁଛି ମାଆର ପଣତ। ହେଲେ ଏହି ଲୁହ ବିଚ୍ଛେଦର ନୁହେଁ, ମିଳନର। ନିଖୋଜ ପୁଅକୁ ଫେରି ପାଇବା ପରେ ଭାବବିହ୍ୱଳ ହୋଇପଡ଼ିଛନ୍ତି ମାଆ। ଗଞ୍ଜାମ ଜିଲ୍ଲା ବେଗୁନିଆପଡ଼ା ବ୍ଲକ ମୁଣ୍ଡଳା ଗାଁରେ ଆଜି ଦେଖିବାକୁ ମିଳିଛି ଏମିତି ଏକ ଦୃଶ୍ୟ।

ଗାଁର ଗୁରା ବେହେରା ମାସେ ତଳେ ଭାଇଙ୍କ ସହ ମିଶି ହରିଦ୍ୱାର ଦାଦନ ଖଟିବାକୁ ଯାଉଥିଲେ। କିନ୍ତୁ ହରିଦ୍ୱାର ନିକଟ ଏକ ଷ୍ଟେସନରେ ଟ୍ରେନ୍‌ ରହିବା ପରେ ଶୌଚ ପାଇଁ ଓହ୍ଲାଇଥିଲେ। ସେହି ସମୟରେ ଟ୍ରେନ୍‌ଟି ଛାଡ଼ି ଦେଇଥିଲା। ଏହାଦେଖି ଚଳନ୍ତା ଟ୍ରେନରେ ଚଢ଼ିବାକୁ ଚେଷ୍ଟା କରିଥିଲେ ଗୁରା। କିନ୍ତୁ ଖସିପଡ଼ି ଗୁରୁତର ଆହତ ହୋଇଥିଲେ। ତା’ପରେ ସେ ଅନ୍ୟ ଏକ ଟ୍ରେନରେ ମଧ୍ୟପ୍ରଦେଶର ଔରଛାକୁ ଚାଲି ଆସିଥିଲେ। ତାଙ୍କ ପାଇଁ ଔରଛା ଥିଲା ଅଚିହ୍ନା ଆଉ ଅପରିଚିତ ସହର। ଆହତ ଅବସ୍ଥାରେ ପାଗଳ ଭଳି ଘୁରୁ ବୁଲିଥିଲେ। କେହି ବି ତାଙ୍କ ଭାଷାକୁ ବୁଝି ପାରୁନଥିଲେ। କାରଣ ଗୁରା ଠିକ୍ ଭାବେ କଥା କହିପାରୁ ନ ଥିଲେ। ଶେଷରେ ଦେବଦୂତ ଭଳି କଟକ ନିଆଳିର ପବିତ୍ର ମଲ୍ଲିକ ନାମକ ଜଣେ ପ୍ରବାସୀ ଓଡ଼ିଆ ତାଙ୍କୁ ସହଯୋଗ କରିଥିଲେ। ଏ ସମ୍ପର୍କରେ ସେ ପ୍ରଥମେ ଓଟିଭିକୁ ଯୋଗାଯୋଗ କରିଥିଲେ। ଆଉ ଓଟିଭିର ସହଯୋଗ କ୍ରମେ ଗୁରାଙ୍କୁ ଉଦ୍ଧାର କରି ତାଙ୍କ ଗାଁକୁ ପଠାଇଥିଲେ ପବିତ୍ର।

ଆଜି ଗାଁକୁ ଫେରିଛନ୍ତି ଗୁରା। ପୁଅକୁ ପାଇ ପରିବାର ଲୋକେ ବେଶ୍ ଆନନ୍ଦିତ। ପତ୍ନୀ ଆଖିର ଲୁହ ବି ଆଜି ବୋଲ ମାନୁନଥିଲା। ହେଲେ ଏହି ଖବର ପାଇବା ପରେ ଯିଏ ଆଜି ବେଶୀ ଖୁସି ହୋଇଥାନ୍ତେ, ସେ ନାହାଁନ୍ତି। ସେ ହେଉଛନ୍ତି ଗୁରାଙ୍କ ବାପା ବଇଁଶୀ ବେହେରା। ପୁଅର ନିଖୋଜ ଖବର ଶୁଣି ଗତ କିଛି ଦିନ ତଳେ ଆଖି ବୁଜି ଦେଇଛନ୍ତି। ତେବେ ପରିବାରର ମୁରବୀକୁ ହରାଇବାର ଦୁଃଖ ଓ ନିଖୋଜ ପୁଅକୁ ପାଇବାର ଲୁହ ଭିତରେ ବେଶ୍ ଭାବବିହ୍ୱଳ ହୋଇଉଠିଛି ଘର ପରିବେଶ।