ଭୁବନେଶ୍ୱର: ଦିଲ୍ଲୀରେ ଡେଙ୍ଗୁରେ ପ୍ରାଣ ହରାଇଥିବା ଓଡ଼ିଆଙ୍କ ସଂଖ୍ୟା ୩ରେ ପହଞ୍ଚିଛି। ବୁଧବାର ଆଉ ଜଣେ ଓଡ଼ିଆ ଯୁବକଙ୍କର ଡେଙ୍ଗୁରେ ମୃତ୍ୟୁ ହୋଇଥିଲା। ମୃତକ ଜଣଙ୍କ କେନ୍ଦ୍ରାପଡ଼ା ରାଜକନିକା ଥାନା ମଙ୍ଗଳପୁର ଗାଁର ସୁନୀଲ ବେହେରା। ଓଲାଭର କଲେଜରେ ଯୁକ୍ତ ଦୁଇ ପଢୁଥିବା ସୁନୀଲ ଦିଲ୍ଲୀରେ ରହୁଥିବା ନିଜ ବାପାଙ୍କ ପାଖକୁ ବୁଲିବାକୁ ଯାଇଥିଲା ବେଳେ ଜ୍ୱରରେ ଆକ୍ରାନ୍ତ ହୋଇଥିଲେ। ପରେ ତାଙ୍କର ମୃତ୍ୟୁ ଘଟିଥିବା ପରିବାର ଲୋକେ ସୂଚନା ଦେଇଛନ୍ତି। ପୂର୍ବରୁ ୭ ବର୍ଷର ବାଳକ ଅବିନାଶ ଓ ବାଲେଶ୍ୱର ସୋର ଅଞ୍ଚଳର ଶାନ୍ତନୁ କୁମାର ବେହେରା ମଧ୍ୟ ଦିଲ୍ଲୀରେ ଡେଙ୍ଗୁରେ ପୀଡିତ ହୋଇ ପ୍ରାଣ ହରାଇଥିଲେ।
ସେହିପରି ଓଡିଶାରେ ମଧ୍ୟ ଡେଙ୍ଗୁ ରୋଗୀଙ୍କ ସଂଖ୍ୟା ବଢ଼ିବାରେ ଲାଗିଛି। ଗତକାଲି ରାଜ୍ୟରେ ଆଉ ତିନିଜଣ ଡେଙ୍ଗୁ ରୋଗୀଙ୍କୁ ଚିହ୍ନଟ କରାଯାଇଛି। ଏଥି ମଧ୍ୟରୁ ଦୁଇ ଜଣ ପୁରୀ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିବା ବେଳେ ଆଉ ଜଣେ ବାଲେଶ୍ୱର ଜିଲ୍ଲା ମୁଖ୍ୟ ଡାକ୍ତରଖାନାରେ ଚିକିତ୍ସିତ ହେଉଛନ୍ତି।