ଜିଲ୍ଲାପାଳଙ୍କ ଅଫିସ୍‌ ଆଗରେ ଟମାଟୋ ଚକଟି ପଖାଳ ଖାଇଲେ ଚାଷୀ

ବରଗଡ଼ (ଓଡ଼ିଶା ରିପୋର୍ଟର): ଚାଷୀଙ୍କ ଅଭିନବ ପ୍ରତିବାଦ। ଜିଲ୍ଲାପାଳଙ୍କ ଅଫିସ ଆଗରେ ଟମାଟୋ, କଞ୍ଚାଲଙ୍କା ଓ ପିଆଜ ଲଗାଇ ପଖାଳ ଖାଇଲେ। ଏହା ପୂର୍ବରୁ ଜିଲ୍ଲା ପ୍ରଶାସନର ସବୁ କାର୍ଯ୍ୟାଳୟରେ ତାଲା ପକାଇଲେ। ଆଜି ଏପରି ଢ଼ଙ୍ଗରେ ବରଗଡ଼ରେ ଚାଷୀମାନେ ପ୍ରତିବାଦ କରିଛନ୍ତି। ପରେ ବିକ୍ଷୋଭ ଶୋଭାଯାତ୍ରାରେ ସହର ପରିକ୍ରମା କରିଥିଲେ। ୭ ଦିନ ଭିତରେ ଦାବି ପୂରଣ ହେବ ବୋଲି ପ୍ରତିଶ୍ରୁତି ମିଳିବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଛି।

ଓଡ଼ିଶାର ଭାତ ହାଣ୍ଡି ହେଉଛି ବରଗଡ଼। ଏହି ଜିଲ୍ଲାରେ ମରୁଡ଼ି ଓ ରୋଗ ପୋକ ପରି ସମସ୍ୟା ସବୁବେଳେ ଲାଗି ରହିଛି। ଏହି ଦାଉ ରକ୍ଷା ପାଇବା ପାଇଁ ଚାଷୀମାନେ ଫସଲ ବୀମା କରିଥିଲେ। ଏପରିକି ପ୍ରିମିୟମ ମଧ୍ୟ ଜମା କରିଥିଲେ। ମାତ୍ର ଫସଲ ନଷ୍ଟ ହେବା ପରେ ଚାଷୀଙ୍କୁ ମିଳୁନି ବୀମା ରାଶି। ଯଥାଶୀଘ୍ର ଫସଲ ବୀମା ପ୍ରଦାନ, ଫସଲ କଟା ହିସାବରେ ବୀମା ରାଶି ପ୍ରଦାନ, କୃଷୀ ଋଣ ଛାଡ଼, ଚାଷ ପାଇଁ ବିଦ୍ୟୁତ ଶୁଳ୍କ ଓ ଟ୍ରାକ୍ଟର ଫିଟ୍‌ନେସ୍‌ ପାଇଁ ଜରିମାନା ଉଚ୍ଛେଦ, କୃଷିଜାତ ଦ୍ରବ୍ୟର ସଂରକ୍ଷଣ ଓ ବଜାର ବ୍ୟବସ୍ଥା ଏବଂ ଶହେ ବର୍ଷରୁ ଊର୍ଦ୍ଧ୍ୱ ବୟସର ଚାଷୀଙ୍କୁ ୫୦୦୦ ଟଙ୍କା ପେନ୍‌ସନ୍‌ ପ୍ରଦାନ ଦାବିରେ ଶତାଧିକ ଚାଷୀ ଏକତ୍ର ହୋଇଥିଲେ। ପରେ ତହସିଲ, ଏଆର୍‌ସିଏସ୍‌, ଡିଆର୍‌ସିଏସ୍‌, ଡିଆର୍‌ଡିଏ ସମେତ ସମସ୍ତ ବ୍ୟାଙ୍କ ଓ ପୋଷ୍ଟ ଅଫିସ୍‌ରେ ତାଲା ପକାଇଥିଲେ। ତା’ପରେ ଲୋକ ମଣ୍ଡଳ ପଡ଼ିଆକୁ ଯାଇଥିଲେ। ସେଠାରେ ଆୟୋଜିତ ହୋଇଥିଲା ଏକ ବିକ୍ଷୋଭ ସମାବେଶ। ସେଠାରୁ ଏକ ବିରାଟ ଶୋଭାଯାତ୍ରାରେ ଜିଲ୍ଲାପାଳଙ୍କ କାର୍ଯ୍ୟାଳୟ ଅଭିମୁଖେ ଯାଇଥିଲେ। ସେଠାରେ ପଖାଳ ଖାଇ ପ୍ରତିବାଦ କରିଥିଲେ। ପଖାଳ ସହିତ କଞ୍ଚାଲଙ୍କା, ରସୁଣ ଓ ପିଆଜ ଦଳି ଖାଇଥିଲେ। ଚାଷୀଙ୍କ ଏପରି ପ୍ରତିବାଦ ଯୋଗୁଁ ୪ ଘଣ୍ଟା ଧରି ଅଫିସ୍‌ ବନ୍ଦ ରହିଥିଲା।

ଚାଷୀଙ୍କ ସମସ୍ୟା ସମାଧାନ ପାଇଁ ଜିଲ୍ଲାପାଳ ଇନ୍ଦ୍ରମଣି ପ୍ରଧାନ, ବୀମା କମ୍ପାନୀ ଅଧିକାରୀ, ଜିଲ୍ଲାପ୍ରଶାସନିକ ଅଧିକାରୀ ଓ ଚାଷୀ ପ୍ରତିନିଧିଙ୍କୁ ଏକ ରୁଦ୍ଧ ଦ୍ୱାର ବୈଠକ ବସିଥିଲା। ୭ ଦିନ ଭିତରେ ସମସ୍ୟା ସମାଧାନ ହେବ ବୋଲି ଲିଖିତ ପ୍ରତିଶ୍ରୁତି ଦେବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଛି।