ବଲାଙ୍ଗିର,(ଓଡ଼ିଶା ରିପୋର୍ଟର):ପାଟଣାଗଡ଼ ବୋମା ବିସ୍ଫୋରଣ ଘଟଣାର ୱାନ୍ ମେନ୍ ଭିଲିଆନ ତଥା ମୁଖ୍ୟ ଅଭିଯୁକ୍ତ ପୁଞ୍ଜିଲାଲ ମେହେରଙ୍କ କାରନାମା ହଲିଉଡ୍ର କୌଣସି ଥ୍ରୀଲର ଷ୍ଟୋରୀ ଠାରୁ କମ୍ ନୁହେଁ। ବଲାଙ୍ଗିର ପୋଲିସ ହାତରେ ଧରାପଡ଼ି ନ ଥିବା ପୁଞ୍ଜିଲାଲ କିନ୍ତୁ କ୍ରାଇମବ୍ରାଞ୍ଚ ଫାସ ଫସିଯାଇଥିଲେ। ଏବେ ତାଙ୍କୁ କ୍ରାଇମବ୍ରାଞ୍ଚ ୬ଦିନ ଲାଗି ଜେରା ପାଇଁ ଆଣିଥିବା ବେଳେ ଦିନକୁ ଦିନ ପର୍ଦ୍ଦାଫାଶ ହେଉଛି ନୂଆ ନୂଆ କାହାଣୀ। କେବଳ ପୁଞ୍ଜିଲାଲଙ୍କ କାହାଣୀ ଚାଞ୍ଚଲ୍ୟକର ନୁହଁ ତାଙ୍କ ଚରିତ୍ର ମଧ୍ୟ ବେଶ ଭୟଙ୍କର। ବେଶଭୂଷାରେ ସବୁବେଳେ ଟିପ୍ଟପ୍ ରହୁଥିଲେ ପୁଞ୍ଜିଲାଲ। ଅଧିକାଂଶ ସମୟରେ ତାଙ୍କୁ ବୁଟସୁଟରେ ଦେଖିବାକୁ ମିଲୁଥିଲା । ନୀଳ ବୁଲେଟରେ ଘୁରି ବୁଲୁଥିଲେ ପୁଞ୍ଜିଲାଲ। କ୍ଳାସ ଭିତରେ ଭଲ ପାଠ ପଢାଉଥିଲେ । ପିଲାଙ୍କୁ ଜୀବନରେ ବଡ ହେବା ପାଇଁ ଭଲ ଉପଦେଶ ବି ଦେଉଥିଲେ । କିନ୍ତୁ ସ୍ୱଭାବରେ ଥିଲେ ବଦରାଗୀ ଓ ପ୍ରତିକ୍ରୀୟାଶିଳ। ପାର୍ସଲ ବୋମା ଘଟଣାର ଏକମାତ୍ରା ଅଭିଯୁକ୍ତ ହେଲା ପରେ, ଅଧ୍ୟାପକ ପୁଞ୍ଜିଲାଲଙ୍କ ଲୁକ୍କାୟିତ ଚରିତ୍ରକୁ ନେଇ ବିଶ୍ୱାସ କରିପାରୁନାହାନ୍ତି ଛାତ୍ରଛାତ୍ରୀ । ଗତକାଲି କଟକରେ ପୁଞ୍ଜିଲାଲକୁ ଜେରା କରିଛି କ୍ରାଇମବ୍ରାଞ୍ଚ ।
ପୁଞ୍ଜିଲାଲ ରହୁଥିବା ଘର ସାମ୍ନାର ଡଷ୍ଟବିନକୁ ଯାଞ୍ଚ କରିଥିଲେ ବଲାଙ୍ଗିର ପୋଲିସର ସାଇଣ୍ଟିଫିକ ଟିମ୍। ଡଷ୍ଟବିନ ଭିତରୁ ବାହାରିଥିଲା କିଛି କଟା ତାର, ଇଲେଟ୍ରୋନିକ୍ସ ଯନ୍ତ୍ରାସଂ ଏବଂ ଗୁଣ୍ଡ ଯୁକ୍ତ ଏକ୍ସପ୍ଳୋସିଭ। ଏଥିରୁ ସ୍ପଷ୍ଟ ହେଉଛି, କେମତି ପି.ଏଚ୍.ଡି ନାଁରେ ପୁଞ୍ଜିଲାଲଙ୍କ ପାଠଶାଳାରେ ଚାଲିଥିଲା ପାର୍ସଲ ବମ ତିଆରିର ଗବେଷଣା। ଏବେ ଘଟଣା ପର୍ଦ୍ଦାଫାଶ ହେଲା ପରେ ଆଶ୍ୱସ୍ତ ପାଟଣାଗଡର ସାଧାରଣ ଲୋକେ।