ବ୍ରହ୍ମପୁର (ଓଡ଼ିଶା ରିପୋର୍ଟର): ଗଞ୍ଜାମ ଜିଲ୍ଲା ଆସିକା ଥାନା ଦେବଭୂମି ଗାଁରେ ସଇତାନ ସ୍ୱାମୀ ହାତରେ ବଳି ପଡ଼ିଲେ ସ୍ତ୍ରୀ ଓ ଗର୍ଭସ୍ଥ ଶିଶୁ। ମୃତକ ହେଲେ ମାମାଲି ଚୌଧୁରୀ। ଯୌତୁକ ପାଇଁ ଏହି ହତ୍ୟାକାଣ୍ଡ ଘଟିଥିବା ଅଭିଯୋଗ ହୋଇଛି। ଏନେଇ ମୃତ ମାମାଲିଙ୍କ ପରିବାର ଲୋକେ ଥାନାରେ ଅଭିଯୋଗ କରିଥିଲେ। ପୁଲିସ ମାମଲା ରୁଜୁ କରି ଅଭିଯୁକ୍ତ ସ୍ୱାମୀ ଟୁକୁନା ଓ ତାଙ୍କ ମାଆଙ୍କୁ ଗିରଫ କରି ଘଟଣାର ତଦନ୍ତ ଆରମ୍ଭ କରିଛି।
ଦେବଭୂମି ଗାଁରେ ଟୁକୁନା ଚୌଧୁରୀ ୬ ବର୍ଷ ତଳେ ମାମାଲି ଚୌଧୁରୀଙ୍କୁ ବିବାହ କରିଥିଲେ। ଉଭୟଙ୍କ ବିବାହ ବୈଦିକ ରୀତିନୀତିରେ ହୋଇଥିଲା। ଦାବି ମୁତାବକ ଯୌତୁକ ମଧ୍ୟ ଦିଆଯାଇଥିଲା। ବିବାହ ପରେ ସ୍ୱାମୀ-ସ୍ତ୍ରୀଙ୍କ ପରିବାର ଠିକ୍ଠାକ୍ ଚାଲିଥିଲା। ତେବେ ହଠାତ୍ ଯୌତୁକ ରାକ୍ଷସ ଲୋଲୁପ ଆଖି ଟୁକୁନାଙ୍କ ଉପରେ ପଡ଼ିଲା। ଏହା ପରେ ସ୍ୱାମୀ ଓ ସ୍ତ୍ରୀଙ୍କ ମଧ୍ୟରେ ଝଡ଼ ସୃଷ୍ଟି ହେଲା। ଯାହାକୁ ନେଇ ଉଭୟଙ୍କ ମଧ୍ୟରେ ପାଟିତୁଣ୍ଡ ହେଉଥିଲା ବୋଲି ଅଭିଯୋଗ ହେଉଛି।
ଏବେ ମାମାଲିଙ୍କର ୫ ବର୍ଷର ପୁଅ ଥିବା ବେଳେ ୪ ମାସର ଗର୍ଭବତୀ ଥିଲେ। ଘଟଣାରେ ୪ ମାସର ଗର୍ଭସ୍ଥ ଶିଶୁର ମୃତ୍ୟୁ ହୋଇଛି। ସପଟେ ଯୌତୁକ ଦାବି କରି ତାଙ୍କ ଝିଅକୁ ମାରି ଦିଆଯାଇଥିବା ନେଇ ମାଆ ଅଭିଯୋଗ କରିଛନ୍ତି।