ଏନକାଉଣ୍ଟରରେ ଦୁର୍ଦ୍ଦାନ୍ତ ଅପରାଧୀ ସୁରେଶ ରାଉତ ଆହତ

ନୟାଗଡ଼( ଓଡ଼ିଶା ରିପୋର୍ଟର): ନୟାଗଡ଼  ଜିଲ୍ଲା ଲୋଙ୍କୁଡିପଡ଼ା ବାରମାସି ଦଣ୍ଡାରେ  ପୋଲିସ୍‌ ଏନକାଉଣ୍ଟରରେ ଦୁର୍ଦ୍ଦାନ୍ତ ଅପରାଧୀ ସୁରେଶ ରାଉତ ଗୁରୁତର ଆହତ ହୋଇଛନ୍ତି। ତାଙ୍କର ଡାହାଣ ଗୋଡ଼ରେ ବାଜିଛି। ତାଙ୍କୁ ପ୍ରଥମେ ନୟାଗଡ଼ ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ପରେ ତାଙ୍କୁ କଟକ ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ସୁରେଶଙ୍କ ନାଁରେ କଟକ, ଖୋର୍ଦ୍ଧା, ନୟାଗଡ, ଗଞ୍ଜାମ, ପୁରୀ ଓ ବୌଦ୍ଧ ଆଦି ଜିଲ୍ଲାରେ ଲୁଟ୍ ରାହାଜାନୀ ଭଳି ୩୬ଟି ମାମଲା ରହିଛି। ସୁରେଶ ଘର ଦଶପଲ୍ଲା ଥାନା ପୋଇବାଡି ଗାଁରେ ବୋଲି ଜଣାପଡ଼ିଛି।

ପୋଲିସର ସୂଚନା ଅନୁସାରେ ଗତକାଲି ରାତି ପ୍ରାୟ ୨ଟା ସମୟରେ ଡକାୟତି ଉଦ୍ୟମ କରୁଥିବା ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚିଥିଲା।  ଏହି ସମୟରେ ସୁରେଶ ପୋଲିସକୁ ଦେଖି ଖସି ପଳାଇବା ପାଇଁ ଗୁଳି ଚଳାଇଥିଲା।  ପରେ ଆତ୍ମରକ୍ଷା ପାଇଁ ପୋଲିସ ସୁରେଶକୁ ଗୁଳି କରିଥିଲା।