ଗଞ୍ଜାମ: ଜଗନ୍ନାଥପ୍ରସାଦ ପୋଲିସ ହେପାଜତ ମୃତ୍ୟୁ ଘଟଣାରେ ଥାନା ଅଧିକାରୀ ଦିବ୍ୟଲୋଚନ ବେହେରାଙ୍କୁ ଜିଲା ମୁଖ୍ୟାଳୟକୁ ବଦଳି କରିଦିଆଯିବା ସହ ମାମଲାର ତଦନ୍ତ ଭାର ଏଚଆରପିସିକୁ ଦିଆଯାଇଛି । ଏହାସହ ଜଗନ୍ନାଥପ୍ରସାଦ ଥାନାର ନୂତନ ଥାନା ଅଧିକାରୀ ଭାବେ ସୁଶାନ୍ତ ସେଠୀଙ୍କୁ ନିଯୁକ୍ତି ଦିଆଯାଇଥିବା ଏସପି ନରସିଂହ ମିଶ୍ର କହିଛନ୍ତି ।
ସୂଚନାଯୋଗ୍ୟ ଯେ, ଏକ ଚୋରି ଘଟଣାରେ ପଟାଧାର ଗାଁର ଗୌରହରି ସ୍ୱାଇଁଙ୍କୁ ସୋମବାର ରାତିରେ ଜଗନ୍ନାଥ ପ୍ରସାଦ ପୋଲିସ୍ ଗିରଫ କରି ଥାନାକୁ ଆଣିଥିଲା । ମଙ୍ଗଳବାର ସକାଳେ ତାଙ୍କ ସ୍ୱାସ୍ଥ୍ୟବସ୍ଥା ଗୁରୁତର ହେବାରୁ ସ୍ଥାନୀୟ ହସ୍ପିଟାଲରେ ନିଆଯାଇଥିଲା । ସେଠାରେ ତାଙ୍କର ମୃତ୍ୟୁ ଘଟିଥିଲା । ଗୌରହରିଙ୍କ ପରିବାର ପକ୍ଷରୁ ପୋଲିସ୍ ମାଡ଼ରେ ତାଙ୍କର ମୃତ୍ୟୁ ଘଟିଥିବା ଅଭିଯୋଗ କରାଯାଇଛି । ଏହାସହ ଥାନା ଅଧିକାରୀଙ୍କୁ ନିଲମ୍ବନ ଓ ମୃତକଙ୍କ ପରିବାରକୁ କ୍ଷତିପୂରଣ ଯୋଗାଇ ଦେବା ଦାବିରେ ଉତ୍ତ୍ୟକ୍ତ ଲୋକେ ମୁଖ୍ୟରାସ୍ତା ଅବରୋଧ କରିଥିଲେ ।