ଯାତ୍ରା ହିରୋଇନଙ୍କ କରୁଣ କାହାଣୀ: ମାନସିକ ଭାରସାମ୍ୟ ହରାଇ ୩ ବର୍ଷ ହେଲା ଶିକୁଳିର ବନ୍ଧା ପଡିଥିଲା ଜୀବନ, ଉଦ୍ଧାର କଲା ପ୍ରଶାସନ

କେନ୍ଦ୍ରାପଡା: ଦିନେ ଯେଉଁ ନାୟିକାଙ୍କ ଅଭିନୟ ଦର୍ଶକଙ୍କୁ ବାନ୍ଧି ରଖୁଥିଲା, ଆଜି ସେହି ନାୟିକା ବନ୍ଧା ପଡିଛନ୍ତି ଲୁହା ଶିକୁଳିରେ। ଦିନଥିଲା ରଙ୍ଗମଞ୍ଚରେ ଯେଉଁ ନାୟିକାଙ୍କ ଅଭିନୟରେ ଦର୍ଶକଙ୍କ ଆଖିରେ ଲୁହ ଚାଲି ଆସୁଥିଲା, ଆଜି ବାସ୍ତବ ଜୀବନରେ ସେହି ନାୟିକାଙ୍କ ପରିବାର ଲୋକଙ୍କ ଆଖିରୁ ଲୁହ ଶୁଖୁନି। ଦିନେ ରଙ୍ଗମଞ୍ଚରେ ଯେଉଁ ନାୟିକାଙ୍କ ପାଦ ନାଚି ନାଚି ଅଧିର ହୋଇଯାଉଥିଲା, ଆଜି ଦୁର୍ଭାଗ୍ୟକୁ ସେହି ପାଦ ଓ ହାତରେ ଲୁହାର ବେଡି ପଡିଛି। ଦିନଥିଲା ରଙ୍ଗମଞ୍ଚରେ ବିଭିନ୍ନ କାହାଣୀରେ ଅଭିନୟ କରୁଥିବା ନାୟିକା ଆଜି ନିଜେ ଏକ କାହାଣୀ ପାଲଟି ଯାଇଛନ୍ତି। ଏ ହେଉଛି କେନ୍ଦ୍ରାପଡା ଜିଲ୍ଲା ମହାକାଳପଡାର ବରଜ ବାହାକୁଦ ଗ୍ରାମର ବଦାନୀ ସାମଲଙ୍କ କାହାଣୀ।

 

ଦୀର୍ଘ ୩ ବର୍ଷ ଧରି ଲୁହା ଶିକୁଳିରେ ବନ୍ଧା ପଡିଛି ଏହି ଯାତ୍ରା ନାୟିକାଙ୍କ ଜୀବନ। ସ୍ୱପ୍ନ ଥିଲା ଫୁଲ ହୋଇ ଫୁଟିବାକୁ, ନିଜ ରୂପଯୌବନରେ ପୂରା ଦୁନିଆକୁ ନିଜ ଆଡକୁ ଆକର୍ଷିତ କରିବାକୁ। ନିଜ ଅଭିନୟରେ ଦର୍ଶକଙ୍କୁ ପୂରା ମତୁଆଲା କରି ଦେଉଥିଲେ। ମାତ୍ର ୧୨ ବର୍ଷ ବୟସରେ ଯାତ୍ରା ଦୁନିଆରେ ପାଦ ଦେଇଥିବା ବଦାନୀ ଅଭିନୟ କରୁକରୁ ହଠାତ୍ ଅଦିନିଆ ଝଡ ମାଡି ଆସିଥିଲା ତାଙ୍କ ଜୀବନରେ। ଫୁଲ ହୋଇ ଫୁଟିବା ଆଗରୁ ଝଡି ଯାଇଥିଲା ତାଙ୍କ ଜୀବନ ଫୁଲକଢି। ୪ ବର୍ଷ ଯାତ୍ରାପାର୍ଟିରେ ରହିବା ପରେ ହଠାତ୍ ଅସ୍ୱାଭାବିକ ଆଚରଣ କରିବାକୁ ଲାଗିଲେ ସେ। ବାଧ୍ୟ ହୋଇ ବାପା ମା ବଦାନୀକୁ ନେଇ ଆସିଲେ ଗାଁକୁ। ଭାବିଥିଲେ କିଛିଦିନ ଭିତରେ ସବୁକିଛି ଠିକ୍ ହୋଇଯିବ। କିନ୍ତୁ ଦଇବ ଦାଉ ସାଧିଲା ବଦାନୀଙ୍କ ଉପରେ। ଭଲ ହେବା ପରିବର୍ତ୍ତେ ବଦାନୀଙ୍କର ମୁଣ୍ଡ ଅଧିକ ଖରାପ ହେବାକୁ ଲାଗିଲା। ଫଳରେ ଗାଁରେ ଅନ୍ୟମାନଙ୍କୁ ମାରଧର କରିବା, ଗାଳି କରିବା ହେତୁ ଦୀର୍ଘ ୩ ବର୍ଷ ଧରି ଶିକୁଳିରେ ବାନ୍ଧି ରଖିଛନ୍ତି ପରିବାର ଲୋକେ।

ବଦାନୀଙ୍କ ପରିବାର କହିଲେ ବୁଢା ବାପା ଓ ମା। ବୁଢା ବାପା ମଜୁରି ଲାଗିଲେ ଘରେ ଚୂଲି ଜଳେ। ତେଣୁ ଅତି କମ ବୟସରୁ ପରିବାରର ବୋଝ ଉଠାଇଥିଲା ବଦାନୀ। କିନ୍ତୁ ମୁଣ୍ଡ ଖରାପ ହେବା ପରେ ସତେ ଯେମିତି ଝଡ ମାଡି ଆସିଛି ପରିବାର ଉପରେ। ଗୋଟିଏ ଓଳି ଖାଇବା ପାଇଁ ମଧ୍ୟ ସଂଘର୍ଷ କରିବାକୁ ପଡୁଛି। ସକାଳୁ ଉଠିଲେ ଯେଉଁଠି ଦୁଇ ଓଳି ଖାଇବା କଥା ଚିନ୍ତା କରିବାକୁ ପଡେ ସେଠି ବଦାନୀର ବଡମେଡିକାଲରେ ଚିକିତ୍ସା କରିବା କଥା ତ ସାତ ସପନ।

ଏହି ଘଟଣା ସାମ୍ନାକୁ ଆସିବା ପରେ ଜିଲ୍ଲା ପ୍ରଶାସନ ସହଯୋଗ ପାଇଁ ହାତ ବଢାଇଛି। ବଦାନୀକୁ ଉଦ୍ଧାର କରି ଚିକିତ୍ସା ପାଇଁ କଟକ ବଡ ମେଡିକାଲରେ ଭର୍ତ୍ତି କରାଯାଇଛି। ମାନସିକ ୱାର୍ଡରେ ବଦାନୀର ଚିକିତ୍ସା କରାଯିବ। ଚିକିତ୍ସା ପରେ ବଦଳିଯାଇପାରେ ବଦାନୀ ଜୀବନର ରଙ୍ଗ ।