ସଜେଇ ହେଲାଣି ଖଣ୍ଡଗିରି ଓ ଉଦୟଗିରି: ଯାତ୍ରା ମହାସମର ପାଇଁ କାଉଣ୍ଟ୍‌ଡାଉନ୍‌ ଆରମ୍ଭ

ଭୁବନେଶ୍ୱର(ଓଡ଼ିଶା ରିପୋର୍ଟର): ସଜେଇ ହେଲାଣି ଖଣ୍ଡଗିରି ଓ ଉଦୟଗିରି ପାଦଦେଶ। କାରଣ ରାତି ପାହିଲେ ମାଘସପ୍ତମୀ ସାଙ୍ଗକୁ ପ୍ରସିଦ୍ଧ କୁମ୍ଭମେଳା ଆରମ୍ଭ ହେବ। ସେଥିପାଇଁ ଖଣ୍ଡଗିରିକୁ ସୁଅ ଛୁଟିଲାଣି ସାଧୁସନ୍ଥଙ୍କର। ତା’ ସାଙ୍ଗକୁ ପୁଣି କୁମ୍ଭମେଳାରେ ଜମିବ ଯାତ୍ରାର ମହାସମର। ସେଥିପାଇଁ ଯାତ୍ରା ପାର୍ଟିମାନେ ମଧ୍ୟ ଫୁଲ୍ ଦମ୍‌ରେ ଷ୍ଟେଜ ନିର୍ମାଣରେ ଲାଗିପଡ଼ିଛନ୍ତି। ଏଥର ଖଣ୍ଡଗିରି ମେଳାର ଆଉ ଏକ ଆକର୍ଷଣ ସାଜିବ ପ୍ରଥମ ଥର ପାଇଁ ଆୟୋଜନ କରାଯାଉଥିବା ଖଣ୍ଡଗିରି-ଉଦୟଗିରି ମହୋତ୍ସବ।

ଶିଶୁପାଳଗଡ ମହୋତ୍ସବ, କେଦାରଗୌରୀ ମହୋତ୍ସବ ପରେ ଏଥର ଜମିବ ଖଣ୍ଡଗିରି-ଉଦୟଗିରି ମହୋତ୍ସବ। ଏଥିପାଇଁ ସମସ୍ତ ପ୍ରସ୍ତୁତି ଶେଷ ହୋଇଛି। ଓଡ଼ିଶାର କଳା, ସଂସ୍କୃତି ଓ ଐତିହ୍ୟ ସମ୍ପର୍କରେ ସାଧାରଣ ଲୋକ ଜାଣିବାକୁ ସୁଯୋଗ ପାଇବେ। ତା’ସାଙ୍ଗକୁ ସମ୍ରାଟ ଖାରବେଳଙ୍କ ସହ ଖଣ୍ଡଗିରି-ଉଦୟଗିରିର ସମ୍ପର୍କ ସମ୍ପର୍କରେ ଲୋକେ ଜାଣିପାରିବେ। ଏଥଥିପାଇଁ ରାଜ୍ୟ ସରକାରଙ୍କ ସଂସ୍କୃତି ଓ ପର୍ଯ୍ୟଟନ ବିଭାଗ, ବିଏମ୍‌ସି ଓ ଓଟିଡିସିର ମିଳିତ ସହଯୋଗରେ କରାଯିବ ଏହି ମହୋତ୍ସବ।

୨୫ ତାରିଖରୁ ଏହି ମହୋତ୍ସବ ଆରମ୍ଭ ହୋଇ ୨୮ ତାରିଖ ପର୍ଯ୍ୟନ୍ତ ଚାଲିବ। ଏହି ୪ ଦିନିଆ ମହୋତ୍ସବରେ ଓଡିଶାର ଇତିହାସ ସମ୍ପର୍କିତ ବିଭିନ୍ନ ତଥ୍ୟ ଡିଜିଟାଲ୍ ମାଧ୍ୟମରେ ଲୋକଙ୍କ ପାଖରେ ପହଞ୍ଚାଇବା ସହ ରାଜ୍ୟର ବିଭିନ୍ନ  ସ୍ଥାନରୁ ଆସିଥିବା କଳାକାରଙ୍କ ଦ୍ୱାରା ପାରମ୍ପାରିକ ନୃତ୍ୟ ପରିବେଷିତ ହେବ।

ସେପଟେ ଖଣ୍ଡଗିରି ମେଳାରେ ଯାତ୍ରା ପରିବେଷଣ କରିବେ ୧୩ଟି ବଛା ବଛା ଯାତ୍ରା ପାର୍ଟି। ଏଥିପାଇଁ ଏବେଠାରୁ ହିଁ ଖଣ୍ଡଗିରି ଛକରେ ବିଭିନ୍ନ ଯାତ୍ରା ପାର୍ଟି ପକ୍ଷରୁ ଆରମ୍ଭ ହୋଇଯାଇଛି ପୋଷ୍ଟର ଓ୍ୱାର୍।   ଆସନ୍ତାକାଲିଠାରୁ ଖଣ୍ଡଗିରି ମେଳା ଆରମ୍ଭ ହେଉଥିବା ବେଳେ ୨୬ ତାରିଖରୁ ହେବ ଯାତ୍ରା ମହାସମର।  ୧୨ ଦିନରେ ୭ଟି ପେଣ୍ଡାଲରେ ଯାତ୍ରା ପ୍ରଦର୍ଶନ କରିବେ ୧୩ଟି ଯାତ୍ରା ପାର୍ଟି।