ଖୋର୍ଦ୍ଧା: ଗ୍ୟାସ ଟ୍ୟାଙ୍କର ଧକ୍କାରେ ଦମ୍ପତି ମୃତ, ପୁଅ ଗୁରୁତର

ଖୋର୍ଦ୍ଧା: ଖୋର୍ଦ୍ଧା  ଜିଲ୍ଲା ବାଘମାରୀଠାରେ ଆଜି ଏକ ଗ୍ୟାସ୍ ଟ୍ୟାଙ୍କର ବାଇକକୁ ଧକ୍କା ଦେବା ଫଳରେ ଦମ୍ପତିଙ୍କର ମୃତ୍ୟୁ ଘଟିଥିବା ବେଳେ ପୁଅ ଗୁରୁତର ଆହତ ହୋଇଛନ୍ତି । ମୃତକ ଦମ୍ପତି ହେଲେ କପାସିଆ ଗାଁର ରସାନନ୍ଦ ଜେନା ଓ ତାଙ୍କ ପତ୍ନୀ ମଂଜୁଲତା ଜେନା। ଆହତ ସନ୍ତୋଷ ଜେନାକୁ ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ତାଙ୍କ ସ୍ୱାସ୍ଥ୍ୟଅବସ୍ଥା ଅଧିକ ଖରାପ ହେବାରୁ ତାଙ୍କୁ ଭୁବନେଶ୍ୱର ସ୍ଥାନାନ୍ତର କରାଯାଇଛି। ଭୁବନେଶ୍ୱରରୁ ବାଇକ ଯୋଗେ ଦମ୍ପତି ଓ ତାଙ୍କ ପୁଅ ବୋଲଗଡ଼ ଯାଉଥିବାବେଳେ ବାଘମାରୀଠାରେ ଗ୍ୟାସ୍ ଟ୍ୟାଙ୍କର ସହ ଧକ୍କା  ହୋଇଥିଲା। ଖବର ପାଇ ବେଗୁନିଆ ଦମକଳ ବାହିନୀ  ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ଡାକ୍ତରଖାନାକୁ ପଠାଇଛି।  ଏହି ଘଟଣାକୁ ନେଇ ସେଠାରେ ଉତ୍ତେଜନା  ଦେଖାଯାଇଥିଲା।