ମାଓବାଦୀଙ୍କୁ ମୁକାବିଲା ପାଇଁ ଆସୁଛନ୍ତି ଲେଡି କମାଣ୍ଡୋ

ଭୁବନେଶ୍ୱର(ଓଡ଼ିଶା ରିପୋର୍ଟର): ନାରୀ ସାଜିଛି ନାରାୟଣୀ। ଲାଲବାହିନୀର ଦୁର୍ଗକୁ ଚୁରମାର କରିବାକୁ ମାଓ ଅଞ୍ଚଳରେ ପଶିଛନ୍ତି ମହିଳା ଯବାନ। ଓଡ଼ିଶାର ସୀମାରେ ଛତିଶଗଡ଼ର ଘଞ୍ଚ ଜଙ୍ଗଲ ଭିତରେ ପଇଁତରା ମାରୁଛନ୍ତି ଏହି ଲେଡି କମାଣ୍ଡୋ। ହାତରେ ଅତ୍ୟାଧୁନିକ ବନ୍ଧୁକ ଓ ଆଉ ଛାତିରେ ଆତ୍ମବିଶ୍ୱାସକୁ ବୋହି ଆରମ୍ଭ କରିଛନ୍ତି ମାଓ ନିପାତ ଅଭିଯାନ।

ଲାଲ୍‌ଗଡ଼ର ଅନ୍ଧାରୀ ଇଲାକାର ଦୀପଶିଖା। ଗରିଲା ଯୋଦ୍ଧାଙ୍କ ମୁକାବିଲା ପାଇଁ ତୟାର ଦୁର୍ଗାବାହିନୀ। ଘଞ୍ଚ ଜଙ୍ଗଲରେ ଆର୍‌ପାର୍‌ ଲଢ଼େଇ ପାଇଁ ତୟାର ଲେଡି ବ୍ରିଗେଡ୍‌। ଓଡ଼ିଶା ସୀମାନ୍ତ ଛତିଶଗଡ଼ର ମାଓପ୍ରବଣ ଅଞ୍ଚଳରେ ମୁତୟନ ହୋଇଛନ୍ତି ଏହି ମହିଳା ସୁରକ୍ଷାକର୍ମୀ। ଲାଲ୍‌ସେନାର ମୁକାବିଲା ପାଇଁ ପଣ କରିଛନ୍ତି ଏହି ଲେଡି କମାଣ୍ଡୋ। ଗଣତନ୍ତ୍ରର ସୁରକ୍ଷା ପାଇଁ ଏମାନେ ନେଇଛନ୍ତି ବଜ୍ର ଶପଥ। ଏମାନେ ହେଉଛନ୍ତି ଛତିଶଗଡ଼ ପୋଲିସର ବଚ୍ଛାବଚ୍ଛା ସିପାହୀ। ସ୍ୱତନ୍ତ୍ର କମାଣ୍ଡୋ ତାଲିମ ପରେ ଏମାନଙ୍କୁ ମୁତୟନ କରାଯାଇଛି ମାଓବାଦୀଙ୍କ ଅଭିଯାନରେ।

ଛତିଶଗଡ଼ ସୁକମା ଜିଲ୍ଲାର କୁଲୁମପାଲୀ ଅଞ୍ଚଳରେ ଏବେ ମୁତୟନ ହୋଇଛନ୍ତି ଗୋଟିଏ କମ୍ପାନୀ ଫୋର୍ସ। କିଛିଦିନ ଭିତରେ ଏହି ଲେଡି କମାଣ୍ଡୋଙ୍କୁ ମିଳିଛି ଛୋଟବଡ଼ ଅପରେସନ୍‌ର ସଫଳତା। ଯାହା ଏହି ମହିଳା ଶସସ୍ତ୍ର ବାହିନୀକୁ ଦମ୍ଭ ଯୋଗାଇଛି। ତେଣୁ ଷଡଯନ୍ତ୍ରର ବାରୁଦକୁ ପାଦରେ ଆଡେଇ ଯେ କୌଣସି ଘାତକ ହମ୍‌ଲାକୁ କରିବାକୁ ଏମାନେ କରିଛନ୍ତି ପଣ।

ଲାଲବାହିନୀର ନାଲିପତାକାକୁ ଖାତିର ନକରି ଏମାନେ ବଢ଼ୁଛନ୍ତି ଆଗକୁ ଆଗକୁ। ଯାହାକୁ ଦେଖି ଭାଙ୍ଗି ଯାଉଛି ନାରୀ ଅବଳାଦୁର୍ବଳା ପରମ୍ପରା।