ପ୍ରେମିକର ମୃତ୍ୟୁ ଷଡ଼ଯନ୍ତ୍ର ରଚିଲା ପ୍ରେମିକା: ରାତିଅଧରେ ଫୋନ୍ କରି ଡାକିଲା, ମର୍ଡ଼ର କଲେ ଦୁଇ ନମ୍ବର ପ୍ରେମିକ  

ବୌଦ୍ଧ🙁ଓଡ଼ିଶା ରିପୋର୍ଟର): ତ୍ରିକୋଣୀୟ ପ୍ରେମରୁ ଜଘନ୍ୟ ହତ୍ୟା।  ଜଣେ ଯୁବତୀଙ୍କୁ ଦୁଇ ଜଣ ଯୁବକ ପ୍ରେମ କରୁଥିବା ବେଳେ ଶେଷରେ ଜଣେ ପ୍ରେମିକର ଜୀବନ ଯାଇଛି।  ଏମିତି ପ୍ରେମ କାହାଣୀକୁ ନେଇ ବୌଦ୍ଧ ଜିଲ୍ଲା ମନମୁଣ୍ଡା ଥାନା ଘୁଲୁଘୁଲା ପଦର ଗାଁରେ ଘଟିଛି ବୀଭତ୍ସ ହତ୍ୟାକାଣ୍ଡ।  ଏ ଘଟଣାରେ ପୋଲିସ ଯୁବତୀଙ୍କୁ ଅଟକ ରଖି ପଚରାଉଚରା କରୁଥିବା ବେଳେ ଅଭିଯୁକ୍ତ ପ୍ରେମିକ କିନ୍ତୁ ଫେରାର ହୋଇଯାଇଛି।  ହତ୍ୟାକାଣ୍ଡରେ  ଶିକାର ହୋଇଛନ୍ତି ଶାନ୍ତନୁ କଅଁର । ପରିବାର ଲୋକଙ୍କ ଅଭିଯୋଗ, ତ୍ରିକୋଣୀୟ ପ୍ରେମ ପାଇଁ ଶାନ୍ତନୁଙ୍କୁ ହତ୍ୟା କରାଯାଇଛି । ସେହି ଗାଁର ଜଣେ ଯୁବତୀ ଓ ତାଙ୍କ ପ୍ରେମିକ ମିଶି ଏଭଳି ଜଘନ୍ୟ ହତ୍ୟାକାଣ୍ଡ ଘଟାଇଥିବା କହିଛନ୍ତି ତାଙ୍କ ପରିବାର ଲୋକେ।

 ଅଭିଯୋଗ ଅନୁସାରେ ଘୁଘୁଲପଦର ଗାଁର ଶାନ୍ତନୁଙ୍କର ସେହି ଗାଁର ଜଣେ ଯୁବତୀଙ୍କ ସହ ଥିଲା ପ୍ରେମ ସମ୍ପର୍କ ।  ହେଲେ ସଂପୃକ୍ତ ଯୁବତୀଙ୍କୁ ଭଲ ପାଉଥିଲେ ପାଖ ପିପିଲିପାଲି ଗାଁର ଆଉ ଜଣେ ଯୁବକ ସୁବ୍ରତ ବାଘ। ଗତକାଲି ରାତିରେ ଶାନ୍ତନଙ୍କୁ ଯୁବତୀ ଜଣକ ଫୋନ୍ କରି ଡକାଇଥିଲେ।   ରାତି ପ୍ରାୟ ତିନିଟା ବେଳେ ଘରୁ ବାହାରି ଆସିଥିଲେ ଶାନ୍ତନୁ । ଗାଁ ମୁଣ୍ଡ କ୍ଷେତ ନିକଟରେ ଶାନ୍ତୁନୁ ଓ ଯୁବତୀ କଥା ହେଉଥିବା ବେଳେ, ପୂର୍ବ ଯୋଜନା ଅନୁସାରେ ଆସିଥିଲେ ଯୁବତୀଙ୍କ ଅନ୍ୟ ଜଣେ ପ୍ରେମିକ ସୁବ୍ରତ।   

ପ୍ରଥମେ ଦୁଇ ପ୍ରେମିକଙ୍କ ମଧ୍ୟରେ ଯୁକ୍ତିତର୍କ ପରେ ହାତାହାତି ବି ହୋଇଥିଲା । ଆଉ ପରେ ଶାନ୍ତନୁଙ୍କୁ ନିର୍ମମ ଭାବେ ଶାବଳରେ ପିଟି ହତ୍ୟା ପରେ ଫେରାର ହୋଇଯାଇଥିଲା ଅଭିଯୁକ୍ତ ସୁବ୍ରତ। ତ୍ରିକୋଣୀୟ ପ୍ରେମରୁ ଏ ହତ୍ୟାକାଣ୍ଡ ଘଟିଥିବା ଗାଁ ଲୋକେ କହୁଥିବା ବେଳେ ପୋଲିସ ମୃତଦେହ ନିକଟରୁ ଏକ ଭ୍ୟାନିଟି ବ୍ୟାଗ୍ ଜବତ କରିଛି । ଘଟଣାରେ ସଂପୃକ୍ତ ଯୁବତୀଙ୍କୁ ଅଟକ ରଖି ପଚରାଉଚରା କରୁଥିବା ବେଳେ ଅଭିଯୁକ୍ତ ସୁବ୍ରତ ଫେରାର ଥିବା ସୂଚନା ମିଳିଛି।