ଭୁବନେଶ୍ୱର (ଓଡ଼ିଶା ରିପୋର୍ଟର): ରାଜଧାନୀ ଭୁବନେଶ୍ୱରର ନୟାପଲ୍ଲୀ ଥାନା ଅନ୍ତର୍ଗତ ହର୍ଟିକଲଚର୍ ଫାର୍ମ ନିକଟରୁ ଜଣେ ଯୁବକଙ୍କ ମୃତଦେହ ଉଦ୍ଧାର କରାଯାଇଛି। ଏକ ପେଟି ଭିତରେ ତାଙ୍କ ମୃତଦେହ ଥିଲା।
ମୃତକଙ୍କ ନାଁ ଦିଲୀପ ସାହୁ। ତାଙ୍କ ଘର ନୟାଗଡ଼ ଜିଲ୍ଲା କଣ୍ଟିଲୋ ଅଞ୍ଚଳରେ। ସେ ଦୀର୍ଘ ଦିନ ହେବ ନୟାପଲ୍ଲୀ ଅଞ୍ଚଳରେ ଏକ ଅଟାକଳରେ କାମ କରୁଥିଲେ।
ତାଙ୍କୁ ହତ୍ୟା କରି ଫିଙ୍ଗି ଦିଆଯାଇଥିବା ଜଣାପଡ଼ିଛି। ତାଙ୍କୁ ହତ୍ୟା କରିବା ଅଭିଯୋଗରେ ପ୍ରକାଶ ଜେନା ନାମକ ଜଣେ ବ୍ୟକ୍ତିଙ୍କୁ ପୁଲିସ୍ ଗିରଫ କରିଛି। ପ୍ରକାଶ ବି ସେହି ଅଟାକଳରେ କାମ କରୁଥିଲେ। ସେମାନଙ୍କ ମଧ୍ୟରେ ଗତକାଲି ରାତିରେ ପାଟିତୁଣ୍ଡ ହୋଇଥିବା ଜଣାପଡ଼ିଛି। ତେବେ ହତ୍ୟାର କାରଣ ଜଣାପଡ଼ିନି।
ଏହି ହତ୍ୟାକାଣ୍ଡରେ ପ୍ରକାଶଙ୍କ ସହିତ ଆଉ କିଛି ଲୋକ ସଂପୃକ୍ତ ଥିବା ସନ୍ଦେହ କରାଯାଉଛି। ନୂଆପଲ୍ଲୀ ଥାନା ପୁଲିସ୍ ଘଟଣାର ତଦନ୍ତ କରୁଛି।