ସଫା କରିବାକୁ ଯାଇ ପାଇପରେ ଫସିଗଲେ

କଟକ(ଓଡ଼ିଶା ରିପୋର୍ଟର): ପାଇପରେ ଫସି ଯାଇଛନ୍ତି ଜଣେ ବ୍ୟକ୍ତି।  କଟକ ସ୍ଥିତ ଓଡ଼ିଶା ପୋଲିସ ସିଗନାଲ୍ ମୁଖ୍ୟାଳୟ ନିକଟ ପମ୍ପିଂ ଷ୍ଟେସନ ପାଇପରେ ପଶି କାମ କରୁଥିବା ବେଳେ ବ୍ୟକ୍ତି ଜଣକ ବାହାରି ପାରୁ ନାହାନ୍ତି। ତାଙ୍କୁ ଉଦ୍ଧାର କରିବାକୁ ଓଡ୍ରାଫ ଏବଂ ଅଗ୍ନିଶମ କର୍ମଚାରୀ ଉଦ୍ୟମ ଚଳାଇଛନ୍ତି।

ଆଜି ସକାଳ ପ୍ରାୟ ସାଢ଼େ ଆଠଟା ସମୟରେ ଜଣେ ସ୍ଥାନୀୟ ବାସିନ୍ଦା ପାଇପ ଜାମ ହୋଇଥିବାରୁ ତାକୁ ସଫା କରିବାକୁ ଛୋଟ ଟାଙ୍କି ମଧ୍ୟକୁ ଯାଇଥିଲେ। ସେଠାରେ ଲାଗିଥିବା ଅଳିଆ ଆବର୍ଜନା କାଢ଼ିବା ପରେ ସେହି ସମୟରେ ଅସାବଧାନତା ବଶତଃ ପମ୍ପିଂ ଷ୍ଟେସନରେ କର୍ମଚାରୀ ପମ୍ପ୍ ଚାଲୁ କରିଦେବା ଫଳରେ  ବ୍ୟକ୍ତି ଜଣକ ପାଣି ପ୍ରେସରେ ପାଇପରେ ୨୦-୨୫ ଫୁଟ୍  ଭିତରକୁ ପଶି ଯାଇଥିଲେ। ପାଇପରେ ଓସାର ପ୍ରାୟ ଅଢ଼େଇ  ଫୁଟ୍ ହୋଇଥିବାରୁ ବ୍ୟକ୍ତି ଜଣକ ବାହାରି ପାରୁନାହାନ୍ତି। ବ୍ୟକ୍ତି ଜଣଙ୍କ ସୁସ୍ଥ ଅଛନ୍ତି। ପାଇପ ଭିତରେ ସେ କଥା କହୁଛନ୍ତି।  ପାଇପ୍ ଭିତରକୁ ଅମ୍ଳଜାନ  ଯୋଗାଇ ଦିଆଯାଉଛି। ପ୍ରାୟ ଅଢ଼େଇ ଘଣ୍ଟା ଧରି ପାଇପ୍  ଭିତରେ ବ୍ୟକ୍ତି ଜଣକ ଫସି ରହିଛନ୍ତି।

ମୁଖ୍ୟ ଫାୟାର ଅଫିସର ସୁକାନ୍ତ ସେଠୀ କହିଛନ୍ତି,“ପମ୍ପିଂ ଷ୍ଟେସନ ପାଇପରେ ଫସିଥିବା ବ୍ୟକ୍ତି ବିପଦମୁକ୍ତ। ତାଙ୍କୁ ଜୀବନ୍ତ ଉଦ୍ଧାର କରାଯିବା ନେଇ ଦମକଳ ବାହିନୀ ଆଶାବାଦୀ ଅଛନ୍ତି। ଖୁବ୍ କମ୍ ସମୟ ମଧ୍ୟରେ ଫସି ରହିଥିବା ବ୍ୟକ୍ତିଙ୍କୁ ଉଦ୍ଧାର କରାଯିବ। ଫସି ରହିଥିବା ପାଇପ୍ ମଧ୍ୟକୁ ଅକ୍ସିଜେନ୍ ଛଡ଼ା ଯାଉଛି।”