ନବରଙ୍ଗପୁର (ସନ୍ତୋଷ ପଲାଇ/କାର୍ତ୍ତିକ ମଲ୍ଲିକ/ଟି.ଗୌରୀଶରଙ୍କ): କାନ୍ଦ ବୋବାଳିରେ ଫାଟି ପଡୁଥିଲା ସମଗ୍ର ପରିବେଶ। ୨ ବୋହୂ ଓ ଜଣେ ଝିଅର ମୃତ୍ୟୁ ଉଜାଡ଼ି ଦେଇଛି ସଂସାର। ନବରଙ୍ଗପୁର ଜିଲ୍ଲା ମଇନାପଦର ଗାଁର ଏହି ହସଖୁସିର ପରିବାରକୁ ଢ଼ାଙ୍କି ଦେଇଛି ଦୁଃଖର କଳାବାଦଲ।
ଇତିମଧ୍ୟରେ ଘଟଣାକୁ ବିତିଯାଇଛି ୪୮ ଘଣ୍ଟା ବିତିଲାଣି। ହେଲେ ସରକାରୀ ସ୍ତରରେ ସ୍ପଷ୍ଟ ହୋଇନି ମୃତ୍ୟୁର କାରଣ। କିନ୍ତୁ ପରିବାର ଲୋକେ କହୁଛନ୍ତି, ଆମ୍ବଟାକୁଆରୁ ପ୍ରସ୍ତୁତ ପିଠା ଖାଇବାରୁ ଏଭଳି ଘଟଣା ଘଟିଛି।
ଦୁଇ ବୋହୂଙ୍କ ସହ ୪ଜଣ ମିଶି ୩ ଦିନ ତଳର ବାସି ପିଠା ଖାଇଥିଲେ। ଘରେ ସେମିତି କିଛି ଅଭାବ ଅସୁବିଧା ନଥିଲେ ମଧ୍ୟ ଆମ୍ବଟାକୁଆରୁ ପ୍ରସ୍ତୁତ ପିଠା ବିଷାକ୍ତ ହେବାରୁ ଏଭଳି ଘଟଣା ଘଟିଥିବା କହିଛନ୍ତି ପରିବାର ଲୋକେ। ଗୁରୁତର ଥିବା ଅନ୍ୟ ୬ ବର୍ଷର ଶିଶୁର ସ୍ୱାସ୍ଥ୍ୟବସ୍ଥା ସ୍ଥିର ଥିବା ଡାକ୍ତର କହିଛନ୍ତି।
ସେପଟେ ଆଜି ଗାଁକୁ ଯାଇ ସ୍ଥିତିର ଅନୁଧ୍ୟାନ କରିବା ସହ ବିଭିନ୍ନ ଲୋକଙ୍କ ଘରୁ ଆମ୍ବଟାକୁଆ ସବୁ ଜବତ କରିଛି ଜିଲ୍ଲା ପ୍ରଶାସନ।
ଅଭାବରୁ ହେଉ କିମ୍ବା ଅଭ୍ୟାସରୁ ଆମ୍ବଟାକୁଆରୁ ପ୍ରସ୍ତୁତ ଖାଦ୍ୟ ଯେ ଜୀବନ ନେଇଛି, ତାହା ପୂର୍ବ ଘଟଣାରୁ ପ୍ରମାଣିତ ହୋଇସାରିଛି। ଖାଦ୍ୟ ଅଭାବରୁ ୨୦୦୧ରେ ରାୟଗଡ଼ା ଜିଲ୍ଲା କାଶୀପୁର, ୨୦୧୨ ଓ ୨୦୧୩ରେ କୋରାପୁଟ ଲକ୍ଷ୍ମୀପୁର ଓ ୨୦୧୬ ଅଗଷ୍ଟରେ ପୁଣି ରାୟଗଡ଼ା କାଶୀପୁର ବ୍ଲକରେ ମୃତ୍ୟୁର ତାଣ୍ଡବ ରଚିଥିଲା ଆମ୍ବଟାକୁଆ। ଆଉ ଏବେ ଏହି ଘଟଣାର ପୁନରାବୃତ୍ତି ହୋଇଛି ନବରଙ୍ଗପୁର ଜିଲ୍ଲା ମଇନାପଦର ଗାଁରେ।
ତେବେ ଏଠି ପ୍ରଶ୍ନ ଉଠୁଛି, କାହିଁକି ଆମ୍ବ ଟାକୁଆକୁ ଲୋକେ ଖାଦ୍ୟ ଭାବେ ଗ୍ରହଣ କରୁଛନ୍ତି? ବାରମ୍ବାର ଏଭଳି ଘଟଣା ଘଟୁଥିବା ସତ୍ତ୍ୱେ ସରକାରୀ ସଚେତନତାକୁ ବ୍ୟାପକ କରାଯାଇପାରୁନି କାହିଁକି? ନା ସରକାରୀ ଅଧିକାରୀଙ୍କ ଚାପ ବା ପ୍ରଲୋଭନ ଯୋଗୁ ପରିବାରର କୌଣସି ଅଭାବ ନଥିଲା ବୋଲି ପୀଡ଼ିତ ଲୋକେ ଏବେ କହୁଛନ୍ତି? ଏ ସବୁ ପ୍ରଶ୍ନ ଏବେ ସମସ୍ତଙ୍କୁ ଆନ୍ଦୋଳିତ କରିବା ସ୍ୱାଭାବିକ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
