‘ସ୍ୱାଧୀନତା ଦିବସ ଓ ସାଧାରଣତନ୍ତ୍ର ଦିବସ’ ଭିତରେ ଫରକ ଜାଣିନାହାଁନ୍ତି ମାଓବାଦୀ

ରାୟଗଡ଼ା: ଆସନ୍ତାକାଲି ସାଧାରଣତନ୍ତ୍ର ଦିବସ। ଏଥିପାଇଁ ସାରା ଦେଶରେ ଚାଲିଛି ପ୍ରସ୍ତୁତି। କିନ୍ତୁ ସବୁଥର ପରି ଏବର୍ଷ ମଧ୍ୟ ମାଓବାଦୀମାନେ ଜାନୁଆରୀ ୨୬କୁ କଳା ଦିବସ ଭାବେ ପାଳନ କରିବାକୁ ଆହ୍ୱାନ ଦେଇଛନ୍ତି। ଏନେଇ ରାୟଗଡ଼ା ଜିଲ୍ଲା ମୁନିଗୁଡ଼ା ଥାନା କରଡ଼ାବନ୍ଧ ଅଞ୍ଚଳରେ ମାଓବାଦୀମାନେ ବିଭିନ୍ନ ସ୍ଥାନରେ ପୋଷ୍ଟର ମାରିଛନ୍ତି।  ନାଗାବଳି-ଘୁମୁସର-ବାଂଶଧାରା ଡିଭିଜନ ପକ୍ଷରୁ ଏହି ମାଓ ପୋଷ୍ଟର ଗୁଡ଼ିକ ଲଗାଯାଇଛି। ତେବେ ପୋଷ୍ଟରଗୁଡ଼ିକୁ ଦେଖିଲେ ଲାଗୁଛି ମାଓବାଦୀମାନଙ୍କୁ ସ୍ୱାଧୀନତା ଦିବସ ଓ ସାଧାରଣତନ୍ତ୍ର ଦିବସ ମଧ୍ୟରେ ଫରକ ଜଣାନାହିଁ। ସେଥିପାଇଁ ସେମାନେ ଲେଖିଛନ୍ତି,“ଜାନୁଆରୀ ୨୬ ମିଛ ସ୍ୱାଧୀନତା ଦିବସକୁ କଳା ଦିବସ ରୂପେ ପାଳନ କରନ୍ତୁ।”

ଏହି ପୋଷ୍ଟରରେ ମାଓବାଦୀମାନେ ଗ୍ରୀନ୍‌ହଣ୍ଟ ଅପରେସନ୍‌କୁ ବିରୋଧ କରିବା ସହିତ ସେମାନଙ୍କ ସଂଗଠନରେ ସାମିଲ ହେବାକୁ ଆହ୍ୱାନ ଦେଇଛନ୍ତି। ନିୟମଗିରି ଚାରିପଟେ ଥିବା ଏକାଧିକ ସିଆର୍‌ପିଏଫ୍ କ୍ୟାମ୍ପକୁ ମଧ୍ୟ ମାଓବାଦୀମାନେ ବିରୋଧ କରିଛନ୍ତି। ଏଥିଯୋଗୁଁ ସ୍ଥାନୀୟ ଅଞ୍ଚଳରେ ଭୟର ବାତାବରଣ ଦେଖାଯାଇଛି ବୋଲି ସେମାନେ କହିଛନ୍ତି।

ମୁନିଗୁଡ଼ା ପୋଲିସ୍ ପୋଷ୍ଟରଗୁଡ଼ିକୁ ଜବତ କରିଛି।