ନବୀନଙ୍କୁ ଆଦର୍ଶ ମୁଖ୍ୟମନ୍ତ୍ରୀ ମୁକୁଟ, ସମ୍ମାନୀତ କଲା ପୁନେ ଏମ୍ଆଇଟି

ପୁନେ(ଓଡିଶା ରିପୋର୍ଟର): ନବୀନଙ୍କୁ ମିଳିଲା ଆଦର୍ଶ ମୁଖ୍ୟମନ୍ତ୍ରୀର ସମ୍ମାନ। ଆଜି ପୁନେସ୍ଥିତ ଏମ୍‌ଆଇଟି ଓ୍ୱାଲର୍ଡ ପିସ୍ ୟୁନିଭରସିଟି ପକ୍ଷରୁ ନବୀନ ପଟ୍ଟନାୟକଙ୍କୁ ଦିଆଯାଇଛି ଏହି ସମ୍ମାନ।  ସ୍ୱଚ୍ଛ ଶାସନ,  କ୍ରାନ୍ତିକାରୀ ବିଚାରଧାରା ଓ ଭଷ୍ଟ୍ରାଚାର ବିରୋଧରେ ଲଢେଇ ସହ ଓଡିଶାକୁ ଆଦର୍ଶ ରାଜ୍ୟ ଭାବେ ଗଢିତୋଳିବାର ପ୍ରୟାସ ପାଇଁ ନବୀନଙ୍କୁ ମିଳିଛି ଏହି ପୁରସ୍କାର। ମହାରାଷ୍ଟ୍ରର ପୁନେସ୍ଥିତ ଏମଅାଇଟି ଓ୍ୱାଲର୍ଡ ପିସ୍ ୟୁନିଭରସିଟି ପକ୍ଷରୁ ଅାୟୋଜିତ ଭବ୍ୟ ଉତ୍ସବରେ ପୂର୍ବତନ ରାଷ୍ଟ୍ରପତି ପ୍ରତିଭା ପାଟିଲ ଓ ବରିଷ୍ଠ ବିଜେପି ନେତା ମୁରଲୀ ମନୋହର ଯୋଶୀ ଯୋଗଦେଇ ମୁଖ୍ୟମନ୍ତ୍ରୀଙ୍କୁ ଏହି ସମ୍ମାନ ପ୍ରଦାନ କରିଛନ୍ତି। ନିଜ ଅଭିଭାଷଣରେ ନବୀନ କହିଛନ୍ତି ସାଧାରଣ ଲୋକଙ୍କ ଜବୀନ ପରିବର୍ତ୍ତନର ସବୁଠାରୁ ବଡ ମାଧ୍ୟମ। ଏଣୁ ଲୋକଙ୍କ ସେବାକୁ ପ୍ରାଥମିକତା ଦେଲେ ସରକାରୀ ବିରୋଧୀ ହାୱା ରହିବ ନାହିଁ।

ଏଣେ ଏଭଳ ପୁରସ୍କାରକୁ ପ୍ରାୟୋଜିତ କାର୍ଯ୍ୟକ୍ରମ ବୋଲି କହିଛି ବିଜେପି। ନିଜେ ପ୍ରଶ୍ନପତ୍ର ପ୍ରସ୍ତୁତ କରି ପରୀକ୍ଷାରେ ଫାଷ୍ଟ ହେବା ଯାହା, ନବୀନ ଆଦର୍ଶ ମୁଖ୍ୟମନ୍ତ୍ରୀ ସମ୍ମାନ ପାଇବା ସେଇଆ ବୋଲି କହିଛି ବିଜେପି । କଂଗ୍ରେସ ମଧ୍ୟ ପ୍ରାୟୋଜିତ ପୁରସ୍କାର କହି ନବୀନଙ୍କୁ କଟାକ୍ଷ କରିଛି।

ଏଣେ ନବୀନଙ୍କୁ ଏହି ସମ୍ମାନ ମିଳିବା ପରେ ଭୁବନେଶ୍ୱରରେ ମୁଖ୍ୟମନ୍ତ୍ରୀଙ୍କୁ ସ୍ୱାଗତ ପାଇଁ ବିଜେଡି କରିଛି ଭବ୍ୟ ଆୟୋଜନ।  ଏଥିପାଇଁ ରାଜଧାନୀରେ ଏବେଠାରୁ ଛାଇ ଗଲାଣି ନବୀନଙ୍କ ପୋଷ୍ଟର, ବ୍ୟାନର।  ଏହି ମୌକାରେ ଦଳ ଭୁବନେଶ୍ୱରରେ ଶକ୍ତି ପ୍ରଦର୍ଶନ କରି ନବୀନ ବ୍ରାଣ୍ଡକୁ ପ୍ରମୋଟ କରିବାକୁ ଯୋଜନା କରିଛି । ସୂଚନାଯାଗ୍ୟ,  ଗତବର୍ଷ ଅଗଷ୍ଟ ୧୯ରେ ଇଂରାଜୀ ପତ୍ରିକା ଆଉଟଲୁକ ନବୀନଙ୍କୁ ଦେଇଥିଲା ଶ୍ରେଷ୍ଠ ପ୍ରଶାସକର ସମ୍ମାନ ।