ଭୁବନେଶ୍ୱର (ଓଡ଼ିଶା ରିପୋର୍ଟର) : ବାତ୍ୟା ‘ଫୋନି’ ପରେ ଏବେ ଅନ୍ଧକାର ଭିତରେ ରହିଛି ଟ୍ୱିନ୍ ସିଟି ‘ଭୁବନେଶ୍ୱର ଓ କଟକ’। ତା’ସହିତ ପୂରା ପୁରୀ ଜିଲ୍ଲା ବି ଅନ୍ଧକାରରେ ରହିଛି। ଆଉ ଏହାକୁ ନେଇ ଆମେରିକୀୟ ମହାକାଶ ଗବେଷଣା ସଂସ୍ଥା ‘ନାସା’ ପକ୍ଷରୁ କିଛି ଫଟୋ ଜାରି କରାଯାଇଛି। ସ୍ୟାଟେଲାଇଟ୍ ଯୋଗେ ଏହି ଫଟୋଗୁଡ଼ିକୁ ଉଠାଯାଇଛି। ଏଥିରେ କଟକ ଓ ଭୁବନେଶ୍ୱରର ରାତିର ଫଟୋ ରହିଛି।
‘ନାସା’ର ଅଫିସିଆଲ୍ ୱେବସାଇଟ୍ରେ ଏହି ଫଟୋଗୁଡ଼ିକୁ ସ୍ଥାନିତ କରାଯାଇଛି। ତା’ସହିତ ‘ନାସା’ ତା’ ଟ୍ୱିଟ୍ର ଆକାଉଣ୍ଟରେ ଏହି ଦୁଇ ସହରର ଉଭୟ ବାତ୍ୟା ପୂର୍ବ ଓ ପରର ଚିତ୍ରକୁ ପୋଷ୍ଟ୍ କରିଛି ଏବଂ ଏକ ତୁଳନାତ୍ମକ ଚିତ୍ର ଦେବାକୁ ପ୍ରୟାସ କରିଛି।
‘ନାସା’ ଭୁବନେଶ୍ୱରର ଦୁଇଟି ଓ କଟକର ଦୁଇଟି ଫଟୋ ପୋଷ୍ଟ୍ କରିଛି। ଭୁବନେଶ୍ୱରର କିଛି ନିର୍ଦ୍ଦିଷ୍ଟ ଅଞ୍ଚଳକୁ ନେଇ ଏପ୍ରିଲ୍ ୩୦ ତାରିଖରେ ଗୋଟିଏ ଫଟୋ ଉଠା ଯାଇଥିବା ବେଳେ ସେହି ନିର୍ଦ୍ଦିଷ୍ଟ ଅଞ୍ଚଳକୁ ନେଇ ‘ଫୋନି’ ଯିବା ପରେ ମେ’ ୫ ତାରିଖରେ ଆଉ ଗୋଟିଏ ଫଟୋ ଉଠାଯାଇଛି। ସେହିପରି କଟକର କିଛି ନିର୍ଦ୍ଦିଷ୍ଟ ଅଞ୍ଚଳକୁ ନେଇ ଏପ୍ରିଲ୍ ୩୦ ତାରିଖରେ ଗୋଟିଏ ଫଟୋ ଉଠା ଯାଇଥିବା ବେଳେ ମେ’ ୪ ତାରିଖରେ ଅର୍ଥାତ୍ ବାତ୍ୟା ପର ଦିନ ସେହି ଅଞ୍ଚଳକୁ ନେଇ ଆଉ ଗୋଟିଏ ଫଟୋ ଉଠାଯାଇଛି।
Power outages in #Bhubaneswar and #Cuttack after Cyclone #Fani. https://t.co/X7A9NYDsGi #NASA #India pic.twitter.com/fA4raahpyb
— NASA Earth (@NASAEarth) May 8, 2019
ସୂଚନାଯୋଗ୍ୟ, ମେ’ ୩ ତାରିଖରେ ସାମୁଦ୍ରିକ ଝଡ଼ ‘ଫୋନି’ ଓଡ଼ିଶାରେ ଲ୍ୟାଣ୍ଡଫଲ୍ କରିଥିଲା। ପୁରୀ ଓ ଖୋର୍ଦ୍ଧା ଜିଲ୍ଲା ଏଥିରେ ସର୍ବାଧିକ କ୍ଷତିଗ୍ରସ୍ତ ହୋଇଥିବା ବେଳେ ରାଜଧାନୀ ଭୁବନେଶ୍ୱର ବି ଖିନ୍ଭିନ୍ ହୋଇଯାଇଛି। ବାତ୍ୟା ଯିବାର ୬ ଦିନ ପରେ ବି ଭୁବନେଶ୍ୱର ଅନ୍ଧାରରେ ରହିଛି। ଯଦିଓ ଗତକାଲି ସୁଦ୍ଧା କିଛି ଅଞ୍ଚଳକୁ ବିଦ୍ୟୁତ୍ ସଂଯୋଗ ଦିଆଯାଇଛି, ତେବେ ସଂପୂର୍ଣ୍ଣ ସହରକୁ ୧୨ ତାରିଖ ସୁଦ୍ଧା ବିଦ୍ୟୁତ୍ ଯୋଗାଣ କରାଯିବ ବୋଲି ସରକାର କହିଛନ୍ତି।
[caption id="attachment_378356" align="alignnone" width="730"]
କଟକର ଏହି ଫଟୋ ନାସା ଜାରି କରିଛି।[/caption]
ଯୁଦ୍ଧକାଳୀନ ଭିତ୍ତିରେ ବିଦ୍ୟୁତ୍ ମରାମତି କାମ ଉପରେ ଗୁରୁତ୍ୱ ଦିଆଯାଇଥିବା ବେଳେ ପୂରା ପୁରୀ ଜିଲ୍ଲାକୁ ବିଦ୍ୟୁତ୍ ସଂଯୋଗ ଦେବା ପାଇଁ ଆହୁରି ମାସେ ଲାଗିବ ବୋଲି ସରକାରଙ୍କ ତରଫରୁ କୁହାଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
