ପାରାଦୀପ (ରମାକାନ୍ତ ନାୟକ): ପାଞ୍ଚ ନମ୍ବର (କ) ଜାତୀୟ ରାଜପଥର ହାତୀଟାଙ୍କି ନିକଟରେ ଆଜି ଏକ ସଡ଼କ ଦୁର୍ଘଟଣା ଘଟିଛି। ପାରାଦୀପ ଆଡ଼କୁ ଯାଉଥିବା ଏକ ୧୪ ଚକିଆ ଟ୍ରକ୍ ଧକ୍କାରେ ଦୁଇ ଜଣ ବାଇକ୍ ଆରୋହୀ ଗୁରୁତର ଆହତ ହୋଇଥିଲେ। ସେମାନଙ୍କ ମଧ୍ୟରୁ ଜଣଙ୍କ ମୃତ୍ୟୁ ହୋଇଯାଇଥିବା ବେଳେ ଅନ୍ୟ ଜଣେ ଗୁରୁତର ଅଛନ୍ତି।
ମୃତକଙ୍କ ନାଁ ଅଞ୍ଜନ ଦାସ। ଆହତଙ୍କ ନାଁ ତପନ ସାହୁ।
ତପନଙ୍କ ଘର ମହାକାଳପଡ଼ା ବ୍ଲକ୍ ଅନ୍ତର୍ଗତ ତିଖିରୀ ଗାଁରେ ହୋଇଥିବା ବେଳେ ଅଞ୍ଜନ ଛେଡ଼କାଣୀ ଗାଁର ବାସିନ୍ଦା ଥିଲେ।
ତପନଙ୍କ ଭଳି ଅଞ୍ଜନ ବି ପାରାଦୀପର ଏକ କଂପାନୀରେ କାମ କରୁଥିଲେ। କାମ ସାରି ଘରକୁ ଫେରୁଥିବା ବେଳେ ସେମାନେ ଦୁର୍ଘଟଣାର ସମ୍ମୁଖୀନ ହୋଇଥିଲେ।
ଅଞ୍ଜନଙ୍କର ଡାହାଣ ଗୋଡ଼ ପୂରା ନଷ୍ଟ ହୋଇଯାଇଥିଲା ଓ ପ୍ରବଳ ରକ୍ତସ୍ରାବ ହୋଇଥିଲା। ସେମାନେ ପେଟ୍ରୋଲ୍ ଟାଙ୍କିରେ ତେଲ ପକାଇ ରାସ୍ତାକୁ ବାହାରୁଥିବା ବେଳେ ଟ୍ରକ୍ଟି ସେମାନଙ୍କୁ ପିଟି ଦେଇଥିଲା।
ଏହି ଦୁର୍ଘଟଣା ପରେ ଘଟଣାସ୍ଥଳରେ ଚାପା ଉତ୍ତେଜନା ଦେଖା ଦେଇଥିଲା। ସ୍ଥାନୀୟ ଲୋକେ ସେଠାରେ ରାସ୍ତାରେ ଥିବା କଟ୍ ବନ୍ଦ କରିବାକୁ ଓ ହଂପ୍ସ ତିଆରି କରିବାକୁ ଦାବି କରିଛନ୍ତି।