ଭୁବନେଶ୍ୱର(ଓଡ଼ିଶା ରିପୋର୍ଟର): ବଦଳିବ ବିଜେପୁର ଉପନିର୍ବାଚନରେ ଟ୍ରମ୍ପକାର୍ଡ ସାଜିଥିବା ଗଙ୍ଗାଧର ମେହେର ଉଠା ଜଳସେଚନ ପ୍ରକଳ୍ପର ଡିଜାଇନ୍ । ଘୋଷଣାର ଅଢେଇ ବର୍ଷ ପରେ ବି ପ୍ରକଳ୍ପ କାମ ଆରମ୍ଭ ହୋଇନଥିବା ବେଳେ ନୂଆ ଡିଜାଇନ ପାଇଁ ଆହୁରି ୭୫୦ କୋଟିର ବ୍ୟୟ ଅଟକଳ କରାଯାଇଛି । ବଡ଼କଥା ହେଉଛି ୨୦ ମାସ ଅନ୍ତରରେ ୩-୩ଟି ନିର୍ବାଚନ ଦେଖିଥିବା ବିଜେପୁରର ଦାୟିତ୍ୱ ଖୋଦ୍ ମୁଖ୍ୟମନ୍ତ୍ରୀ ନେବା ପରେ ବିଜେପୁର ପ୍ୟାକେଜ ଭିତରେ କେବଳ ଜଳସେଚନ ପାଇଁ ୧୨ଶହ ୪୬ କୋଟିର ପ୍ରକଳ୍ପ ଘୋଷଣା କରିଥିଲେ। ତେବେ ନିର୍ବାଚନ ପରେ ମୁଖ୍ୟମନ୍ତ୍ରୀଙ୍କ ଘୋଷଣା ଓ ବାସ୍ତବତା ଭିତରେ ଫରକ କେତେ ଆସନ୍ତୁ ଜାଣିବା।
ବିଜେପୁରର ଦାୟିତ୍ୱ ନିଜେ ନେଲେ ବୋଲି କହି ୨୦୧୮ ଉପନିର୍ବାଚନରେ ରୀତା ସାହୁଙ୍କ ପାଇଁ ପ୍ରଚାର କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। କେବଳ ଥରେ ନୁହେଁ ୨୦ ମାସ ଅନ୍ତରରେ ରେ ୩-୩ ଟି ନିର୍ବାଚନ ବେଳେ ସମାନ କଥା କହି ବିଜେପୁରରେ ଭୋଟ୍ ମାଗିଥିଲେ ନବୀନ। ଗଙ୍ଗାଧର ମେହେରଙ୍କ ନାଁରେ ଘୋଷଣା କରିଥିଲେ ୧୨୪୬ କୋଟି ଟଙ୍କାର ଜଳସେଚନ ପ୍ରକଳ୍ପ। ତେବେ ପାଖାପାଖି ୩ ବର୍ଷ ପରେ କେତେ କାମ ହୋଇଛି ଏହି ବହୁ ଚର୍ଚ୍ଚିତ ଜଳସେଚନ ପ୍ରକଳ୍ପର? ପ୍ରକଳ୍ପର କାଯର୍ୟକାରିତା ପାଇଁ ବିଜେପୁରରେ ଖୋଲିଥିବା ଜଳସେଚନ ବିଭାଗର ନିର୍ବାହୀଯନ୍ତ୍ରୀଙ୍କ କାର୍ଯ୍ୟାଳୟରେ ୨୪ ଘଣ୍ଟା ତାଲା ଝୁଲୁଛି। ୭ ଜଣ କର୍ମଚାରୀ ରହିବା କଥା । ତେବେ କେହି ବି ଆସୁ ନଥିବାରୁ ଅଫିସ୍ ବନ୍ଦ । ଗୋଟିଏ କୋଣରେ ପଡିଛି ମୁଖ୍ୟମନ୍ତ୍ରୀ ଉଦ୍ଘାଟନ କରିଥିବା ଭିତ୍ତିପ୍ରସ୍ତରର ଫଳକ। ବିଜେପୁର ସମେତ ସୋହେଲା ଓ ବରପାଲିର ୧୧୯ଟି ଓ ସୁବର୍ଣପୁର ଜିଲ୍ଲା ଡୁଙ୍ଗୁରୀପାଲି ବ୍ଲକର ୫ଟି ଗାଁକୁ ମିଶାଇ ମୋଟ ୧୨୪ଟି ଗାଁର ୨ଲକ୍ଷ ୬୫ ହଜାର ହେକ୍ଟର ଜମିକୁ ଜଳସେଚନର ଲକ୍ଷ୍ୟ ରଖାଯାଇଥିଲା । ଏହା ଭିତରେ କିଛି ବି କାମ ଆରମ୍ଭ ହୋଇ ଥିବାରୁ ଚାଷୀଙ୍କ ଭିତରେ ଅସନ୍ତୋଷ ତେଜିଛି ।
ଘୋଷଣାର ଅଢେଇ ବର୍ଷ ପରେ ଏ ବହୁ ପ୍ରତୀକ୍ଷିତ ଜଳସେଚନ ପ୍ରକଳ୍ପର ଡିଜାଇନକୁ ବଦଳାଇଛନ୍ତି ସରକାର । ପ୍ରଥମେ ହୀରାକୁଦରୁ ବରଗଡ କେନାଲର ୩୪ କିଲୋମିଟର ଯାଏ ପାଣି ଯିବା ପରେ ପ୍ରକଳ୍ପକୁ ପାଣି ପହଞ୍ଚାଯାଇପାରିବ ବୋଲି କୁହାଯାଇଥିଲା । ତେବେ ଏହା ଭିତରେ ଗତ ମାର୍ଚ୍ଚରେ ଏ ପ୍ରସ୍ତାବକୁ ବାତିଲ କରି କେନାଲ କଡେ କଡେ ପାଇପରେ ପାଣି ନେବାକୁ ଯୋଜନା ହୋଇଛି । ଏଥିପାଇଁ ୭୫୦ କୋଟିର ବ୍ୟୟ ଅଟକଳ ବି ପ୍ରସ୍ତୁତ ହୋଇଛି । ତେବେ ଅଢେଇ ବର୍ଷ ପରେ ସରକାର କାହିଁକି ମୂଳ ଡିଜାଇନ ପରିବର୍ତ୍ତନ ସେନେଇ ଜଳସମ୍ପଦ ମନ୍ତ୍ରୀ କହିଛନ୍ତି ବ୍ୟୟ ଅଟକଳ ବଢିବ ଓ ପ୍ରକଳ୍ପ ପାଇଁ ପୁଣି କ୍ୟାବିନେଟରେ ଅନୁମତି ନେବାକୁ ପଡିବ। ଏବେ ପ୍ରଶ୍ନ ଅଢେଇ ବର୍ଷ ଭିତରେ ଶେଷ ହେବାକୁ ଥିବା ପ୍ରକଳ୍ପର ଭାଗ୍ୟ ପୁଣି ଏକ ଉପନିର୍ବାଚନକୁ ଅପେକ୍ଷା କରିବ ନାହିଁ ତ?
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
