ଭୁବନେଶ୍ୱର (ଓଡ଼ିଶା ରିପୋର୍ଟର): ଆଜି ଯୁକ୍ତ ଦୁଇ ବିଜ୍ଞାନ ପରୀକ୍ଷା ଫଳ ପ୍ରକାଶ ପାଇଛି। ମୋଟ ୯୭, ୭୫୦ ଛାତ୍ରଛାତ୍ରୀ ପରୀକ୍ଷା ଦେଇଥିବା ବେଳେ ୭୦,୭୦୬ ପାସ୍ କରିଛନ୍ତି। ତେବେ ୯ଟି କଲେଜର ପରୀକ୍ଷା ଫଳ ‘ଶୂନ’ ହୋଇଛି। ଅର୍ଥାତ୍ ଏହି ସବୁ କଲେଜ୍ ଗୁଡ଼ିକରେ କୌଣସି ପରୀକ୍ଷାର୍ଥୀ ପାସ୍ କରି ନାହାନ୍ତି।
ଏ ନେଇ ସ୍କୁଲ୍ ଓ ଗଣଶିକ୍ଷା ମନ୍ତ୍ରୀ କହିଛନ୍ତି ଯେ, ଏହି ସବୁ କଲେଜ୍ ଗୁଡ଼ିକର କୌଣସି ଛାତ୍ରଛାତ୍ରୀ କାହିଁକି ପାସ୍ କରିପାରିଲେ ନାହିଁ, ସେ ନେଇ ଅନୁଧ୍ୟାନ କରାଯିବ। ତା’ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
୨୯ଟି କଲେଜରେ ଶତ ପ୍ରତିଶତ ରେଜଲ୍ଟ ହୋଇଛି। ଅର୍ଥାତ୍ ଏ ସବୁ କଲେଜ୍ରେ ସବୁ ପରୀକ୍ଷାର୍ଥୀ ପାସ୍ କରିଛନ୍ତି। ସେହିପରି ୬୦ ଜଣ ଛାତ୍ରଛାତ୍ରୀ ୯୦% ବା ତା’ଠୁ ଅଧିକ ନମ୍ବର ରଖିଛନ୍ତି। ଗତଥର ୪୧ ଜଣ ଛାତ୍ରଛାତ୍ରୀ ୯୦% ବା ତା’ଠୁ ଅଧିକ ନମ୍ବର ରଖିଥିଲେ।
ବାଲେଶ୍ୱର ଜିଲ୍ଲାରେ ସବୁଠୁ ଭଲ ରେଜଲ୍ଟ ହୋଇଛି। ଏଠାରେ ୮୬.୫୬% ଛାତ୍ରଛାତ୍ରୀ ପାସ୍ କରିଛନ୍ତି। ଅନ୍ୟପକ୍ଷରେ ଗଜପତି ଜିଲ୍ଲାରେ ସର୍ବନିମ୍ନ ୩୬.୨୦% ପିଲା ପାସ୍ କରିଛନ୍ତି।