ଭୁବନେଶ୍ୱର (ଓଡ଼ିଶା ରିପୋର୍ଟର): ରାଜ୍ୟରେ କ୍ଷମତାକୁ ଫେରିବା ପାଇଁ କଂଗ୍ରେସ ନିଜର ରଣନୀତିରେ ପରିବର୍ତ୍ତନ କରିଛି। ଛତିଶଗଡ଼ରେ ଦଳ ଯେଉଁ ଭଳି ଢାଞ୍ଚାରେ କ୍ଷମତାକୁ ଆସିଛି, ତାକୁ ଓଡ଼ିଶାରେ କାର୍ଯ୍ୟକାରୀ କରିବାକୁ ଉଦ୍ୟମ କରିଛି। ଏଥିପାଇଁ ସୋମବାର ସମସ୍ତ ଲୋକସଭା ଆସନ ପାଇଁ ଇସ୍ତାହାର ସଂଯୋଜକଙ୍କୁ ନିଯୁକ୍ତି ଦେଇଛି।
ସୂଚନା ଅନୁସାରେ ଭୁବନେଶ୍ୱର ଲୋକସଭା ନିର୍ବାଚନ ମଣ୍ଡଳୀ ପାଇଁ ମାନସ ଚୌଧୁରୀଙ୍କୁ ଇସ୍ତାହାର ସଂଯୋଜକ ଭାବେ ନିଯୁକ୍ତି ଦିଆଯାଇଛି। ସେହିପରି କଟକ ପାଇଁ ଦେବେନ୍ଦ୍ର ସାହୁ, କେନ୍ଦ୍ରାପଡ଼ା ପାଇଁ ଅଂଶୁମାନ ମହାନ୍ତି, ପୁରୀ ପାଇଁ ନିଶିକାନ୍ତ ମିଶ୍ର, ଜଗତସିଂହପୁର ପାଇଁ ବିଭୂ ପ୍ରସାଦ ତରାଇ, ଯାଜପୁର ପାଇଁ ମନୋଜ ରାଉତ, ଭଦ୍ରକ ପାଇଁ ଅଶୋକ ଦାସ, ଢେଙ୍କାନାଳ ପାଇଁ ସଂଗ୍ରାମ ମିଶ୍ର, ବଲାଙ୍ଗୀର ପାଇଁ ସମରେନ୍ଦ୍ର ମିଶ୍ର, ଆସ୍କା ପାଇଁ ରମେଶ ଜେନା, ସମ୍ବଲପୁର ପାଇଁ ମହମ୍ମଦ ଆସଫ ଅଲ୍ଲୀ, ବ୍ରହ୍ମପୁର ପାଇଁ ବିସ୍ମୟ ମହାପାତ୍ର, କନ୍ଧମାଳ ପାଇଁ ଚନ୍ଦ୍ର ପରିଡ଼ା, କଳାହାଣ୍ଡି ପାଇଁ ଅନୀଲ ସିଂହଦେଓ, ନବରଙ୍ଗପୁର ପାଇଁ ଭୀମ ହରିଜନ, କୋରାପୁଟ ପାଇଁ ମାରି ସୁରିନ, ମୟୂରଭଞ୍ଜ ପାଇଁ ନିରୋଜ ଦାସ, ବାଲେଶ୍ୱର ପାଇଁ ସୁଦର୍ଶନ ଦାସ, ବରଗଡ଼ ପାଇଁ ରିପୁନାଥ ସେଠ, ସୁନ୍ଦରଗଡ଼ ପାଇଁ ଡାକ୍ତର ପ୍ରଫୁଲ୍ଲ ମାଝୀ ଏବଂ କେନ୍ଦୁଝର ପାଇଁ ବିପ୍ଳବ ମିଶ୍ରଙ୍କୁ ଇସ୍ତାହାର ସଂଯୋଜକ ଭାବେ ନିଯୁକ୍ତି ମିଳିଛି।
ଏହି ନେତାମାନେ ଲୋକଙ୍କ ମତାମତକୁ ଗ୍ରହଣ କରି ଦଳର ଇସ୍ତାହାର ପ୍ରସ୍ତୁତି ପାଇଁ ଆବଶ୍ୟକ ପରାମର୍ଶ ଦେବେ। ଫେବୃଆରୀ ୨୬ତାରିଖ ସୁଦ୍ଧା ଏହି କାର୍ଯ୍ୟ ସାରିବା ପାଇଁ ସେମାନଙ୍କୁ କୁହାଯାଇଥିବା ବେଳେ ସେମାନେ ପ୍ରତ୍ୟେକ ଲୋକସଭା ନିର୍ବାଚନମଣ୍ଡଳୀ ଅଧୀନରେ ଥିବା ବିଧାନସଭା ନିର୍ବାଚନମଣ୍ଡଳୀ ପାଇଁ ଜଣେ ଲେଖାଏ ପ୍ରତିନିଧିଙ୍କୁ ଚୟନ କରିବେ।
ସମସ୍ତ ୧୪୭ଟି ବିଧାନସଭା ଆସନରେ ଦଳର ଇସ୍ତାହାର ପ୍ରତିନିଧି ନିଯୁକ୍ତି ମିଳିବା ପରେ ସେମାନେ ସମାଜର ସବୁ ବର୍ଗର ଲୋକଙ୍କୁ ଭେଟି କଂଗ୍ରେସର ଇସ୍ତାହାରରେ କ’ଣ ରହିବା ଉଚିତ୍, ତାହା ସ୍ଥିର କରିବେ ବୋଲି ସୂଚନା ମିଳିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
