ଭୁବନେଶ୍ୱର(ଓଡ଼ିଶା ରିପୋର୍ଟର):ରଥଯାତ୍ରାକୁ ନେଇ ରାଜ୍ୟ ସରକାର ବିଳମ୍ବରେ ନିଷ୍ପତ୍ତି ନେଲେ। କରୋନା ଯୋଗୁ ନିଷ୍ପତ୍ତି ନେବାକୁ ଭୟ କଲେ ରାଜ୍ୟ ସରକାର। ଯାହା ଫଳରେ କଳାପାହାଡ଼ ଭଳି ଇତିହାସ ପୁଣି ଥରେ ସୃଷ୍ଟି ହେଲା ।
ଆଜି ଏପରି ଢଙ୍ଗରେ ରାଜ୍ୟ ସରକାରଙ୍କୁ ସମାଲୋଚନା କରିଛନ୍ତି ପିସିସି ସଭାପତି ନିରଞ୍ଜନ ପଟ୍ଟନାୟକ। ରଥଯାତ୍ରା ହେଲେ କରୋନା ବ୍ୟାପିବା ଆଶଙ୍କା କରି ରାଜ୍ୟ ସରକାର ଚୁପ୍ ରହିଲେ। ତେଣୁ ସୁପ୍ରିମକୋର୍ଟଙ୍କୁ ଏନେଇ ନିଷ୍ପତ୍ତି ନେବାକୁ ପଡ଼ିଲା । ବର୍ତ୍ତମାନ ଲୋକେ ଘରୁ ବାହାରୁ ନାହାନ୍ତି, ବସ୍ରେ ଯାତ୍ରୀ ହେଉନାହାନ୍ତି । ଯଦି ସ୍ନାନ ଭଳି ରଥଯାତ୍ରା କରାଇପାରିଥାନ୍ତେ ତାହେଲେ ବିନା ଭକ୍ତରେ ରଥଯାତ୍ରା ସମ୍ଭବ ଥିଲା । ସେପଟେ ସୁପ୍ରିମକୋର୍ଟଙ୍କ ଉପରେ ଏବେ ନଜର ରହିଛି । ମୋଡିଫିକେସନ୍ ଆବେଦନ ଉପରେ ଯାହା ରାୟ ଦେବେ ସେ ନେଇ କାର୍ଯ୍ୟ କରାଯିବ ବୋଲି କହିଛନ୍ତି ବରିଷ୍ଠ ବିଜେଡି ନେତା ପ୍ରଫୁଲ୍ଲ ଘଡ଼ାଇ। ତେବେ ଟିଭିରେ ଭକ୍ତ ରଥଯାତ୍ରା ଦେଖିବାକୁ ଚାହୁଁଥିଲେ । ତେଣୁ ଏବେ ନିରାଶ ହେବା ସ୍ୱାଭାବିକ ।
ସେପଟେ ରଥଯାତ୍ରା ପ୍ରସଙ୍ଗକୁ ନେଇ ପୁଣି ଥରେ ରାଜ୍ୟ ସରକାରଙ୍କୁ ସମାଲୋଚନା କରିଛନ୍ତି କଂଗ୍ରେସ ବିଧାୟକ ସୁର ରାଉତରାୟ । ସିଂହଦ୍ୱାର ସମ୍ମୁଖରେ ବନ୍ଦେ ଉତ୍କଳ ଜନନୀ ଗାଇବା ବେଳେ ଲୋକଙ୍କ ଗହଳିକୁ ଭୁଲି ଗଲେ ସରକାର। କିନ୍ତୁ ଏବେ ରଥଯାତ୍ରା ପ୍ରସଙ୍ଗରେ ରାଜ୍ୟ ସରକାର କାହିଁକି ଚୁପ୍ ରହିଲେ । ପରିଚାଳନା କମିଟି ନିଷ୍ପତ୍ତିକୁ ଅଣଦେଖା କାହିଁକି କରାଗଲା ବୋଲି ତାଙ୍କୁ ପ୍ରଶ୍ନ କରିଛନ୍ତି । ସ୍ନାନ ଭଳି ରଥଯାତ୍ରା କରାଯାଉ, ସରକାର ଏନେଇ ସୁପ୍ରିମକୋର୍ଟରେ ପୁଣି ଥରେ ଆବେଦନ କରନ୍ତୁ ବୋଲି ସୁର ଦାବି ରଖିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
