ଡ୍ରୋନ୍‌ ନଜରରେ ପେଣ୍ଠକଟା

ପୁରୀ(ଓଡ଼ିଶା ରିପୋର୍ଟର): ପୁରୀ ଜିଲ୍ଲାରେ କରୋନା ଆକ୍ରାନ୍ତଙ୍କ ସଂଖ୍ୟା ହୁ ହୁ ବଢ଼ି ଚାଲିଥିବା ବେଳେ ହଟସ୍ପଟ ପାଲଟିଛି ପେଣ୍ଠକଟା । କେବଳ ପେଣ୍ଠକଟା ଅଞ୍ଚଳରୁ ୪୭ ଜଣ ପଜିଟିଭ୍ ଚିହ୍ନଟ ହୋଇ ସାରିଲେଣି। ଏହାସତ୍ତ୍ୱେ କରୋନା କଟକଣାକୁ ଲୋକଙ୍କ ଖାତିର ନାହିଁ। ତେଣୁ ପେଣ୍ଠକଟା ଉପରେ କଡ଼ା ନଜର ରଖିବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ଡ୍ରୋନ କ୍ୟାମେରାର ବ୍ୟବସ୍ଥା କରାଯାଇଛି।  ଡ୍ରୋନ୍ ଦ୍ୱାରା ଟିକିନିଖ୍ ଖବର ସହ ଲୋକଙ୍କ ଗତିବିଧି ଉପରେ ମଧ୍ୟ ନଜର ରଖାଯାଇ ପାରିବ।

ବିଶେଷ କରି ପେଣ୍ଠକଟାରେ ପ୍ରବେଶ କରୁଥିବା ଲୋକଙ୍କ ଉପରେ ଡ୍ରୋନ୍ ନଜର ରଖିଛି। ଏହି ଅଞ୍ଚଳକୁ ଆନ୍ଧ୍ରପ୍ରଦେଶରୁ ଲୋକମାନଙ୍କୁ ନିୟମିତ ବ୍ୟବଧାନରେ ଅଣାଯାଉଥିବା ସୂଚନା ମିଳିଛି। ସେହି ଗାଡିରେ ବେଆଇନ୍ ଦ୍ରବ୍ୟ ଏବଂ ନିଶା ଦ୍ରବ୍ୟ ଚାଲାଣ କରାଯାଉଥିବା ମଧ୍ୟ  ବିଶ୍ୱସ୍ତ ସୂତ୍ରରୁ ଖବର ମିଳିଛି।

ଏଥିସହ ପେଣ୍ଠକଟା ଅଞ୍ଚଳରେ ଯେଉଁ ଦୋକାନଗୁଡିକ ଖୋଲୁଛି, ସେଠାରେ ଲୋକମାନେ ଏକତ୍ରିତ ହେଉଛନ୍ତି । ସାମାଜିକ ଦୂରତ୍ୱକୁ ଖାତିର କରୁ ନାହାନ୍ତି।  ତେଣୁ ସାମାଜିକ ଦୂରତ୍ୱ ନିୟମ ବଜାୟ ନ ରହିଲେ, କରୋନା ବ୍ୟାପିବାର ଆଶଙ୍କା ଥିବାରୁ ଏକ ଟିମ୍ ଗଠନ କରାଯାଇଛି । ଏହି ଟିମ୍ ଲୋକଙ୍କୁ ତାଗିଦ୍ କରୁଛି । ବଡ଼ଦାଣ୍ଡରେ ମଧ୍ୟ ଡ୍ରୋନ୍ କ୍ୟାମେରା ବୁଲି ଭିଡିଓ ଉତ୍ତୋଳନ କରୁଛି ।

ଆଜି ସୁଦ୍ଧା ପୁରୀ ସହର ସମୁଦାୟ ଆକ୍ରାନ୍ତଙ୍କ ସଂଖ୍ୟା ୬୯୨ରେ ପହଞ୍ଚିଥିବା ବେଳେ ସେମାନଙ୍କ ମଧ୍ୟରୁ ୩୬୨ ଜଣ ସୁସ୍ଥ ହୋଇ ଘରକୁ ଫେରିଲେଣି। ଏହାବ୍ୟତୀତ ୩୨୬ ଜଣ ଚିକିତ୍ସାଧୀନ ଥିବା ବେଳେ କରୋନା ଯୋଗୁ ଜିଲ୍ଲାରେ ୨ ଜଣଙ୍କ ମୃତ୍ୟୁ ହୋଇଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।