ହୁସିଆର! ପେଟ୍ରୋଲ ପମ୍ପରେ ଲାଗିଛି ଜାପାନିଜ ଚିପ୍

<p>ଭୁବନେଶ୍ୱର (ଓଡ଼ିଶା ରିପୋର୍ଟର): ପେଟ୍ରୋଲ ପମ୍ପରେ ତେଲ ଚୋରି ହେଉଛି। ଏକ ଲିଟର୍ ପେଟ୍ରୋଲରେ ୧ ଟଙ୍କା ୪୦ ପଇସାର ଠକେଇ ହେଉଛି। ଟ୍ୟାମ୍ପର୍ଡ ଚିପ ଲଗାଇ ଗ୍ରାହକଙ୍କୁ ଏମିତି ଚୂନ ଲଗାଉଛନ୍ତି ଡିଲର। ଓଡ଼ିଶାରେ ୮୬ଟି ପେଟ୍ରୋଲ ପମ୍ପରେ ଏଭଳି ଚିପ୍ ଲାଗିଥିବା ନେଇ ଜଣେ ଅଭିଯୁକ୍ତ ଖୁଲାସା କରିବା ପରେ ତନାଘନା ଆରମ୍ଭ କରିଥିଲା ମାପ ଓ ଓଜନ ବିଭାଗ। ରାଜ୍ୟବ୍ୟାପୀ ପେଟ୍ରୋଲ୍ ପମ୍ପଗୁଡିକ ଉପରେ ଅତର୍କିତ ଚଢାଉ କରାଯାଇଥିଲା। ତେବେ ଡିଲରଙ୍କ ଚତୁରତା ଆଗରେ ଫେଲ ମାରିଥିଲା ବିଭାଗର ବୁଦ୍ଧି। କେମିତି ହେଉଛି ଠକେଇ, ତାର ଫଣ୍ଡା ପାଇଲାନି ବିଭାଗ। ଜାପାନିଜ୍ ଚିପ୍ ଲଗାଇ ପମ୍ପ ମାଲିକ ଠକେଇ କରୁଥିବା ସୁରାକ ମିଳିବା ପରେ ଏହାକୁ ରୋକିବା ଲାଗି ପୁଣି ଥରେ ଅଣ୍ଟା ଭିଡିଛି ମାପ ଓ ଓଜନ ବିଭାଗ। ଆଗକୁ ଚଢାଉକୁ ଜୋରଦାର କରାଯିବ। ତେବେ ଚଢାଉ ସ୍କ୍ୱାଡ଼ରେ ଜାପାନିଜ୍ ଚିପ୍ ଉପରେ ବିଶେଷ ଜ୍ଞାନ ଥିବା ବିଶେଷଜ୍ଞ ରହିବେ। ଏହାଦ୍ୱାରା ଠକେଇ ଧରାପଡିବ ବୋଲି ଯୋଗାଣ ମନ୍ତ୍ରୀ ସୂର୍ଯ୍ୟ ନାରାୟଣ ପାତ୍ର କହିଛନ୍ତି।</p> <p>ତେଲ ଠକେଇ ଅଭିଯୋଗ ଆସିଥିବା ରାଜ୍ୟର ୮୬ଟି ପେଟ୍ରୋଲ ପମ୍ପକୁ ନୋଟିସ୍ କରଯାଇଥିଲା। ଡିଲରମାନେ ନୋଟିସର ଉତ୍ତର ମଧ୍ୟ ଦେଇଥିଲେ। ତେବେ ପ୍ରଥମ ପର୍ଯ୍ୟାୟରେ ଚଢାଉ ପରେ ଡିଲରମାନେ ଟ୍ୟାମ୍ପର୍ଡ ଚିପ୍&zwnj; କାଢି ଦେଇଥିବା କୁହାଯାଉଛି। ତେବେ ଉତ୍କଳ ପେଟ୍ରୋଲିୟମ୍ ଡିଲର୍ ସଂଘ ଏଭଳି ଅଭିଯୋଗକୁ ଖଣ୍ଡନ କରିଛି।</p> <p>ଉତ୍କଳ ପେଟ୍ରୋଲିୟମ୍ ଡିଲର୍ ସଂଘ ସାଧାରଣ ସଂପାଦକ ସଂଜୟ ଲାଟ୍ କହିଛନ୍ତି-&ldquo;ଓଡ଼ିଶା କୌଣସି ପେଟ୍ରୋଲ ପମ୍ପରେ ଚିପ୍&zwnj; ଲଗାଯାଇନାହିଁ। ଏଥିପାଇଁ ଆମେ ସବୁ ପ୍ରକାର ତଦନ୍ତକୁ ସାମ୍ନା କରିବାକୁ ପ୍ରସ୍ତୁତ।&rdquo;</p> <p>ରାଜ୍ୟରେ ଏବେ ୧୬୨୦ଟି ପେଟ୍ରୋଲପମ୍ପ ରହିଛି। ସେହିପରି ରାଜ୍ୟରେ ଦୈନିକ ୧୮ ଲକ୍ଷ ୫୦ ହଜାର ଲିଟର୍ ତେଲର ଆବଶ୍ୟକତା ରହିଛି। ମିଟର ଟ୍ୟାମ୍ପରିଂ ଅଭିଯୋଗ ସତ ଯଦି ସତ ହୋଇଥିବ, ପେଟ୍ରୋଲ ପମ୍ପ ମାଲିକ କେମିତି ଚତୁରତାର ସହ ଗ୍ରାହକଙ୍କଠାରୁ କୋଟି କୋଟି ଟଙ୍କା ଲୁଟ୍ କରୁଛନ୍ତି ତାହା ସ୍ପଷ୍ଟ ହେଉଛି।</p>