ପଥର ମାଡ଼ରେ ପୋଲିସ ବାବୁଙ୍କ ମୁଣ୍ଡ ଫାଟିଲା

ରାଉରକେଲା (ଓଡ଼ିଶା ରିପୋର୍ଟର): ରାଉରକେଲା ରିଂ ରୋଡ୍‌ରେ ଘଟିଥିବା ଦୁର୍ଘଟଣାରେ ଦୁଇ ଦିନରେ ଦୁଇ ଜଣଙ୍କର ମୃତ୍ୟୁ ଘଟିଥିଲା। ଏହାକୁ ନେଇ ଆଜି ଘଟଣାସ୍ଥଳରେ ଉତ୍ତେଜପା ପ୍ରକାଶ ପାଇଛି। ଉତ୍ତ୍ୟକ୍ତ ଲୋକେ ରାସ୍ତାରୋକ କରିଥିଲେ। ଘଉଡାଇବାକୁ ଆସିଥିବା ପୋଲିସ୍‌ ଉପରକୁ ଆନ୍ଦୋଳନରତ ଲୋକେ ଟେକା ପଥର ମାଡ଼ କରିଥିଲେ। ଫଳରେ ଜଣେ ପୋଲିସ ବାବୁଙ୍କ ମୁଣ୍ଡ ଫାଟିଥିବା ବେଳେ ଉତ୍ତ୍ୟକ୍ତ ଲୋକେ ୨ରୁ ୩ଟି ଗାଡ଼ି ଭାଙ୍ଗି ଦେଇଥିବା ଅଭିଯୋଗ ହୋଇଛି। ବର୍ତ୍ତମାନ ସ୍ଥିତି ଉତ୍ତେଜନା ପୂର୍ଣ୍ଣ ରହିଛି। ସୁରକ୍ଷା ଦୃଷ୍ଟିରୁ ୩ ପ୍ଲାଟୁନ୍‌ ପୋଲିସ୍‌ ମୁତୟନ ରହିଛନ୍ତି। ରାଉରକେଲା ଏସ୍‌ପି ଘଟଣା ଉପରେ ତୀକ୍ଷିଣ ନଜର ରଖିଛନ୍ତି।

ଗତକାଲି ରିଂ ରୋଡ୍‌ରେ ହୋଇଥିବା ଦୁର୍ଘଟଣାରେ ଦୁଇ ଜଣ ଆହତ ହୋଇଥିଲେ। ସେମାନଙ୍କୁ ରାଉରକେଲା ଆଇଜିଏଚ୍‌ରେ ଭର୍ତ୍ତି କରାଯାଇଥିଲା। ଚିକିତ୍ସାଧୀନ ଅବସ୍ଥାରେ ଗତକାଲି ଜଣେ ଓ ଆଜି ଅନ୍ୟ ଜଣଙ୍କ ମୃତ୍ୟୁ ଘଟିଥିଲା। ମୃତକଙ୍କୁ କ୍ଷତିପୂରଣ ଓ ରିଂ ରୋଡ୍‌ରେ ଗାଡ଼ିର ବେଗ ନିୟନ୍ତ୍ରଣ ଦାବିରେ ସ୍ଥାନୀୟ ଲୋକେ ରାସ୍ତାରୋକ କରିଥିଲେ। ପୋଲିସ ଆନ୍ଦୋଳନରତ ଲୋକଙ୍କୁ ଘଉଡାଇବା ବେଳେ ଟେକା ଓ ପଥର ମାଡ଼ରେ ଜଣେ ସବ୍‌ଇନ୍ସପେକ୍ଟର ଆହତ ହୋଇଛନ୍ତି। ତାଙ୍କୁ ମେଡ଼ିକାଲରେ ଭର୍ତ୍ତି କରାଯାଇଛି।