ପେଟ୍ରୋଲ ପମ୍ପ ଚଳାଇବେ କଏଦୀ!

ଭୁବନେଶ୍ୱର(ଓଡ଼ିଶା ରିପୋର୍ଟର): ଆଜୀବନ ଜେଲ ଦଣ୍ଡ ଭୋଗୁଥିବା କଏଦୀ ଏବେ ଚଳାଇବେ ପେଟ୍ରୋଲ ପମ୍ପ। କଥାଟା ଆପଣଙ୍କ ମନରେ ଅନେକ ପ୍ରଶ୍ନବାଚୀ ସୃଷ୍ଟି କରିପାରେ। ମାତ୍ର କଥାଟା ସମ୍ପୂର୍ଣ୍ଣ ସତ। ଓଡିଶା ଜେଲ୍ ବିଭାଗ ଜେଲ୍ ସଂସ୍କାର ଓ ଥଇଥାନ ଯୋଜନା ଅନୁଯାୟୀ ଆଜିବନ କଏଦୀମାନଙ୍କୁ ଏପରି ନିଯୁକ୍ତି ଦେବେ। ଏନେଇ ଜେଲ୍‌ ବିଭାଗ ତରଫରୁ ରାଜ୍ୟ ସରକାରଙ୍କୁ ପ୍ରସ୍ତାବ ଦିଆଯାଇଛି।

ଓଡ଼ିଶାର ପଡୋଶୀ ରାଜ୍ୟ ତେଲେଙ୍ଗାନା। ଏଠାରେ ପେଟ୍ରୋଲ ପମ୍ପରେ କାମ କରୁଛନ୍ତି ଆଜିବନ ଜେଲଦଣ୍ଡ ପାଇଥିବା କଏଦୀ। ଏଭଳି ୧୦ରୁ ଅଧିକ ପେଟ୍ରୋଲ ପମ୍ପକୁ ଚଳାଉଛନ୍ତି କଏଦୀ। ଜେଲ୍ ସଂସ୍କାର ଓ ଥଇଥାନ ଯୋଜନା ଅନୁଯାୟୀ ନିଆଯାଇଥିବା ଏହି ପଦକ୍ଷେପ ତେଲେଙ୍ଗାନାରେ ଠିକ୍ ଭାବେ କାର୍ଯ୍ୟ କରାଯାଉଛି। ତେଲେଙ୍ଗାନା ସରକାରଙ୍କ ପଦକ୍ଷେପକୁ ଆପଣେଇବାକୁ ଚେଷ୍ଟା କରୁଛନ୍ତି ଓଡ଼ିଶା। ଏଥିପାଇଁ ପାଇଲଟ ପ୍ରୋଜେକ୍ଟ ଭାବେ ଜାମୁଝରି, ବାରିପଦା ଓ ବ୍ରହ୍ମପୁର ସର୍କଲ ଜେଲ ବାହାରେ ପୋଟ୍ରୋଲ ପମ୍ପ କରାଯିବ। ଆଜିବନ ସଜା ପାଇଥିବା କଏଦୀଙ୍କ ମଧ୍ୟରୁ ଯାହାର ଆଚରଣ ଓ ବ୍ୟବହାର ଭଲଥିବ, ସେମାନଙ୍କୁ ଏଠାରେ ନିୟୋଜିତ କରାଯିବ। ଜେଲର ଦୁଇଜଣ ଷ୍ଟାଫ ସୁଫର ଭାଇଜର ଓ ଆକାଉଣ୍ଟାଣ୍ଟ ଭାବେ  ସେଠାରେ ନିୟୋଜିତ ହେବେ। ସେଥିରୁ ମିଳିବାକୁ ଥିବା ଲାଭାଂଶ ଜେଲର ୱେଲ୍‌ଫେୟାର ଫଣ୍ଡକୁ ଯିବ। ଏହାସହ କଏଦୀଙ୍କୁ ଇନ୍‌ସେନଣ୍ଟିଭ ମଧ୍ୟ ଦିଆଯିବ। ୨୦୧୭ ଡିସେମ୍ବର ୨୩ ତାରିଖରେ ଏନେଇ ଜେଲ୍‌ ବିଭାଗ ଗୃହ ବିଭାଗକୁ ଏହି ପ୍ରାଇଲଟ ପ୍ରୋଜେକ୍ଟ କାର୍ଯ୍ୟାକାରୀ କରିବା ପାଇଁ  ପ୍ରସ୍ତାବ ଦେଇଥିଲେ।

ଜେଲ ସଂସ୍କାର ଓ ଥଇଥାନ ବ୍ୟବସ୍ଥାକୁ ଆହୁରି ସୁଦର ପ୍ରସାରୀ କରିବା ପାଇଁ ଏହି ପଦକ୍ଷେପ ହାତକୁ ନିଆଯାଉଛି। ଏହି ପ୍ରୋଜେକ୍ଟ ପାଇଁ ଆଇଓସିଏଲ, ବିପିସିଏଲ, ଓ ଏଚ୍‌ପିସିଏଲ୍‌ ଗ୍ରୀନ ସିଗନାଲ ଦେଇସାରିଛନ୍ତି। ସଂପୃକ୍ତ ସଂସ୍ଥା ସେଠାରେ ପେଟ୍ରୋଲ ପମ୍ପ କରିବେ। ଏଥିରେ ଦୁଇଟି ସିଫ୍ଟରେ ୧୫ରୁ ଅଧିକ କଏଦୀ ନିୟୋଜିତ ହେବେ। ତେବେ ଦେଖିବାର କଥା ରାଜ୍ୟ ସରକାର ଏହି ପାଇଲଟ୍‌ ପ୍ରୋଜେକ୍ଟ କେବେ ମଞ୍ଜୁର କରୁଛନ୍ତି।