କିଟ୍‌ ପ୍ରତିଷ୍ଠାତାଙ୍କ ନାମରେ ଏକାଧିକ ମାମଲା: କ’ଣ ସଫେଇ ଦେଲେ ଅଚ୍ୟୁତ ପଢ଼ନ୍ତୁ

<p>ଭୁବନେଶ୍ୱର (ଓଡ଼ିଶା ରିପୋର୍ଟର): ରାଜ୍ୟସଭା ପ୍ରାର୍ଥୀ ତଥା କିଟ୍&zwnj;ର ପ୍ରତିଷ୍ଠାତା ଅଚ୍ୟୁତ ସାମନ୍ତଙ୍କ ନାଁରେ ରହିଛି ଏକାଧିକ ମାମଲା। ଯାହା ସେ ତାଙ୍କ ସତ୍ୟପାଠରେ ଦର୍ଶାଇ ନାହାନ୍ତି। ତେଣୁ ଅଚ୍ୟୁତଙ୍କ ନାମାଙ୍କନପତ୍ର ଖାରଜ କରାଯାଉ ବୋଲି ସ୍ୱାଧୀନ ପ୍ରାର୍ଥୀ ସୁବାସ ପାଣିଗ୍ରାହୀ ଦାବି କରିଥିଲେ। ଏହାର ଜବାବରେ ଅଚ୍ୟୁତ କହିଛନ୍ତି, ସତ୍ୟପାଠରେ ଯାହା ଦିଆଯାଇଛି ସମ୍ପୂର୍ଣ୍ଣ ସତ୍ୟ। ତାକୁ ଯିଏବି ଚାହିଁଲେ ଚ୍ୟାଲେଞ୍ଜ କରିପାରିବେ।</p> <p>ରାଜ୍ୟସଭା ପାଇଁ ଦାଖଲ ପ୍ରାର୍ଥିପତ୍ରର ଆଜି ଥିଲା ଯାଞ୍ଚର ଦିନ। ରିଟର୍ଣ୍ଣିଂ ଅଫିସର ମୁଖ୍ୟନିର୍ବାଚନ ଅଧିକାରୀଙ୍କ ଉପସ୍ଥିତିରେ ଦାଖଲ ହୋଇଥିବା ୪ ଟି ପ୍ରାର୍ଥିପତ୍ରର ଯାଞ୍ଚ ହୋଇଥିଲା। ବିଜେଡିର ୩ ପ୍ରାର୍ଥୀଙ୍କ ସହ ସ୍ୱାଧୀନ ପ୍ରାର୍ଥୀ ସୁବାସ ମହାପାତ୍ର ଉପସ୍ଥିତ ଥିଲେ। ପାଖାପାଖି ୨ ଘଣ୍ଟା ପରେ ପଦାକୁ ଆସିଲେ ସୁବାସ। ଅଭିଯୋଗ କଲେ ବିଜେଡି ପ୍ରାର୍ଥୀ ଅଚ୍ୟୁତ ସାମନ୍ତ ମିଥ୍ୟା ସତ୍ୟପାଠ ପ୍ରଦାନ କରିଛନ୍ତି। ତାଙ୍କ ନାଁରେ ଥିବା ୪ ଟି ଅପରାଧୀକ ମାମଲାକୁ ସେ ସତ୍ୟପାଠରେ ଦେଖାଇ ନାହାଁନ୍ତି। କୋର୍ଟରେ ଦାଖଲ ଅଭିଯୋଗ ଅନୁସାରେ ଗୋଟିଏ ମାମଲାରେ ପୁରୀ ଗଡିଶଗଡ଼ ଥାନାରେ ଆଇପିସିର ଦଫା ୩୪୧, ୩୨୩, ୨୯୪, ୪୫୨, ୩୫୪, ୫୦୬, ୧୨୦ ବି ଓ ୩୪ରେ ମାମଲା ରୁଜୁ ହୋଇଛି। ଅନ୍ୟ ତିନୋଟି ଅପରାଧୀକ ମାମଲା ନଂ 1 CC 4653, 1CC 627, 1 CC 4778&nbsp; ତଥ୍ୟ ମଧ୍ୟ ରିଟର୍ଣ୍ଣିଂ ଅଫିସରଙ୍କ ପାଖରେ ରଖିଥିଲେ ସୁବାସ। ସେହିପରି ଅଚ୍ୟୁତଙ୍କ ନାଁ ୨ ଟି ନିର୍ବାନମଣ୍ଡଳୀର ଭୋଟର ଲିଷ୍ଟରେ ଥିବାର ପ୍ରମାଣ ମଧ୍ୟ ଉପସ୍ଥାପନ କରିଥିଲେ। ଗୋଟିଏ ଥିଲା କଟକ ସଦର ନିର୍ବାଚନମଣ୍ଡଳୀ ଅନ୍ତର୍ଗତ ନିଜ ଗାଁ କଲରାବାଙ୍କ ଓ ଅନ୍ୟଟି ଥିଲା ଭୁବନେଶ୍ୱର ଉତ୍ତର ନିର୍ବାଚନମଣ୍ଡଳୀ ନିଳାଦ୍ରୀ ବିହାରର। ଅଚ୍ୟୁତ ଏବେ କେନ୍ଦ୍ର ସରକାରଙ୍କ ବିଜ୍ଞାନ ଓ କାରିଗରୀ ମନ୍ତ୍ରଣାଳୟ ଅଧୀନରେ ଥିବା ସାଇନ୍ସ କଂଗ୍ରେସର ସଭାପତି ଥିବାରୁ ଏହା ଅଫିସ୍ ଅଫ୍ ପ୍ରଫିଟ୍ ଆଇନରେ ଆସୁଥିବା ନେଇ ଅଭିଯୋଗ କରିଥିଲେ ସୁବାସ। ତେବେ ଏ ସମସ୍ତ ଅଭିଯୋଗକୁ ଖଣ୍ଡନ କରିଛନ୍ତି ଅଚ୍ୟୁତ ସାମନ୍ତ।</p> <p>ସ୍ୱାଧୀନ ପ୍ରାର୍ଥୀ ସୁବାସଙ୍କ ଆବେଦନରେ ଆବଶ୍ୟକ ପ୍ରସ୍ତାବକ ନଥିବାରୁ ତାଙ୍କ ପ୍ରାର୍ଥିପତ୍ର ନାକଚ ହୋଇଯାଇଛି। ଅନ୍ୟ ୩ ଜଣ ବିଜେଡି ପ୍ରାର୍ଥୀଙ୍କ ପ୍ରାର୍ଥିପତ୍ର କାଏମ ରହିଥିବା କହିଛନ୍ତି ବିଜେଡି ପ୍ରାର୍ଥୀ ସୌମ୍ୟରଂଜନ ପଟ୍ଟନାୟକ।</p>