ଆରମ୍ଭ ହେଲା ଖରିଫ ଧାନ ସଂଗ୍ରହ ପାଇଁ ଚାଷୀ ପଞ୍ଜିକରଣ

ଭୁବନେଶ୍ୱର (ଓଡ଼ିଶା ରିପୋର୍ଟର): ଖରିଫ ଧାନ ସଂଗ୍ରହ ଅନଲାଇନ୍ ମାଧ୍ୟମରେ ଚାଷୀଙ୍କ ନାମ ପଞ୍ଜିକରଣ କାର୍ଯ୍ୟ ଆଜିଠାରୁ ଆରମ୍ଭ ହୋଇଛି। ଏହି ପଞ୍ଜିକରଣ ପ୍ରକ୍ରିୟା ଅଗଷ୍ଟ ୧୬ତାରିଖ ପର୍ଯ୍ୟନ୍ତ ଚାଲିବ। ଚାଷୀ ନିଜର ବିଷଦ ବିବରଣୀ ସହ ସମିତିରୁ ପଞ୍ଜିକରଣ ଫର୍ମ ସଂଗ୍ରହ କରିବେ ଏବଂ ତାହା ପୂରଣ କରି ଆଜିଠାରୁ ଆସନ୍ତା ଅଗଷ୍ଟ ୧୬ ତାରିଖ ମଧ୍ୟରେ ଦାଖଲ କରିବେ।

ଚଳିତ ବର୍ଷ ଚାଷୀଙ୍କ ନବୀକରଣ ପଦ୍ଧତି ଉଚ୍ଛେଦ କରାଯାଇଛି। ତେଣୁ ଚାଷୀଙ୍କୁ ପୁଣିଥରେ ନୂଆକରି ପଞ୍ଜିକରଣ କରିବା ଆବଶ୍ୟକ। foododisha.in ୱେବସାଇଟରେ ଏହି ଫର୍ମ ଉପଲବ୍ଧ ହେଉଛି। ନୂଆ ଫର୍ମରେ ଚାଷୀଙ୍କ ସମସ୍ତ ବ୍ୟକ୍ତିଗତ ତଥ୍ୟ ସହ ଚାଷ ହୋଇଥିବା ଜମିର ବିଷଦ ବିବରଣୀ ଦେବାକୁ ହେବ। ଏଥିଲାଗ ବ୍ୟାଙ୍କ ପାସବୁକ୍, ଆଧାରକାର୍ଡ, ଜମିର ବିବରଣୀ, ମୋବାଇଲ ଫୋନ ନମ୍ବର ଭଳି ତଥ୍ୟ ପ୍ରଦାନ କରିବାକୁ ହେବ।

ଭାଗ ଚାଷୀମାନେ ମଧ୍ୟ ମଧ୍ୟ ଏଥିଲାଗି ପଞ୍ଜିକରଣ କରିବେ। ଭାଗଚାଷୀ ସମ୍ପୃକ୍ତ ଜମି ମାଲିକଙ୍କ ସହମତି ପତ୍ର ସହ ଆଧାରକାର୍ଡ ନକଲ ଦାଖଲ କରିବାକୁ ହେବ। ଏହି ନୂତନ ପଞ୍ଜିକରଣ ପ୍ରକ୍ରିୟା ଦ୍ୱାରା ଅଧିକରୁ ଅଧିକ କ୍ଷୁଦ୍ର ଓ ନାମମାତ୍ର ଚାଷୀଙ୍କୁ ଧାନ ସଂଗ୍ରହରେ ଅନ୍ତର୍ଭୁକ୍ତ କରିବା ଲକ୍ଷ୍ୟ ରହିଛି। ନୂତନ ଚାଷୀଙ୍କ ପଞ୍ଜିକରଣ ପରେ ଆସନ୍ତା ନଭେମ୍ବର ପହିଲା ୨୦୨୧ରୁ ମାର୍ଚ୍ଚ ୩୧, ୨୦୨୨ ମଧ୍ୟରେ ଖରିଫ ଧାନ ସଂଗ୍ରହ ପ୍ରକ୍ରିୟା ଚାଲିବ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।