ସମ୍ବଲପୁର: ୨୦ ହଜାର ଟଙ୍କାରେ ଦୁଇ ନାବାଳିକା ଝିଅଙ୍କୁ ବିକିଦେଲେ ବାପା-ମାଆ

ସମ୍ବଲପୁର:  ୨୦ ହଜାର ଟଙ୍କ।ରେ ଦୁଇ ନାବାଳିକା ଝିଅଙ୍କୁ ବିକିଦେଲେ ବାପା-ମାଆ। ନିଜ ବାପା-ମାଆଙ୍କ ବିରୋଧରେ ଏଭଳି ଗୁରୁତର ଅଭିଯୋଗ ଆଣିଛନ୍ତି ତାଙ୍କ ବଡ଼ ଝିଅ। ସମ୍ୱଲପୁର ଟାଉନ୍ ଥାନା ଅନ୍ତର୍ଗତ ଚେରୁଆପଡ଼ା ଅଞ୍ଚଳରେ ଘଟିଛି ଏହି ଅଭାବନୀୟ ଘଟଣା। ଅଭିଯୋଗକାରିଣୀ ବଡ଼ ଝିଅ ପୁଷ୍ପା ସାହା କିଛି ମହିଳା ସ୍ୱେଚ୍ଛାସେବୀଙ୍କ ସହ ସମ୍ୱଲପୁର ଟାଉନ୍ ଥାନା ଆସି ଏଭଳି ଅଭିଯୋଗ କରିଛନ୍ତି। ଅଭିଯୋଗ ଅନୁସାରେ ଚେରୁଆପଡ଼ା ଅଞ୍ଚଳରେ ରହୁଥିବା ମନଭୋଲା ନାୟକ ଓ ତାଙ୍କ ପତ୍ନୀ ପ୍ରଭାସିନୀ ଜଣେ ପଡେ଼ାଶୀଙ୍କ ଜରିଆରେ ୧୩ବର୍ଷର ଝିଅ ଜୟନ୍ତୀ ଓ ୧୪ବର୍ଷର ଝିଅ ଅଞ୍ଜଳୀକୁ ମଧ୍ୟପ୍ରଦେଶର ପଥୁରିଆ ଅଞ୍ଚଳରେ ୨୦ ହଜାର ଟଙ୍କ।ରେ ବିକ୍ରି କରିଦେଇଛନ୍ତି। ତେବେ ପ୍ରାଥମିକ ତଦନ୍ତ ପରେ ପୋଲିସ କହିଛି ଏହା ଝିଅ ବିକ୍ରି ନୁହେଁ ବରଂ ଅଭିଯୁକ୍ତ ବାପା-ମାଆ ଦୁଇ ଝିଅଙ୍କୁ ମଧ୍ୟପ୍ରଦେଶରେ ବାହା କରି ଦେଇଛନ୍ତି। ଉଭୟଙ୍କୁ ଉଦ୍ଧାର କରିବା ଲାଗି ଏକ ଟିମ୍ ମଧ୍ୟପ୍ରଦେଶ ଯାଇଥିବା ସମ୍ୱଲପୁର ସଦର ଏସଡିଓ କହିଛନ୍ତି।