ସରିଲା ଘୋଷଯାତ୍ରା: ରତ୍ନ ସିଂହାସନରେ ଅଧିଷ୍ଠିତ ହେଲେ ଶ୍ରୀଜିଉ

ପୁରୀ: ନବ ଦିନାତ୍ମକ ଘୋଷଯାତ୍ରାରୁ ଫେରି ରତ୍ନ ସିଂହାସନରେ ଅଧିଷ୍ଠିତ ହୋଇଛନ୍ତି ଶ୍ରୀଜିଉ।  ପୁଣି ଶ୍ରୀମନ୍ଦିରରେ ଆରମ୍ଭ ହୋଇଛି ଭକ୍ତଙ୍କ ଗହଳିଚହଳି। ଗତକାଲି ରାତିରେ ଚତୁର୍ଦ୍ଧାମୂର୍ତ୍ତୀଙ୍କ ଘୋଷଯାତ୍ରାର ଶେଷ ପର୍ଯ୍ୟାୟ ନିଳାଦ୍ରୀ ବିଜେ ନୀତି ଅନୁଷ୍ଠିତ ହୋଇଥିଲା । ପରମ୍ପରା ଅନୁସାରେ ପ୍ରଥମେ ରାମକୃଷ୍ଣ ଓ ମଦନ ମୋହନ ଦକ୍ଷିଣ ଘରକୁ ବିଜେ କରିଥିଲେ। ପରେ ଶ୍ରୀସୁଦର୍ଶନ, ପରେ ବଡ଼ ଠାକୁର ବଳଭ୍ରଦ ଓ ଦେବୀ ସୁଭ୍ରଦା ରତ୍ନ ସିଂହାସନକୁ ବିଜେ ହୋଇଥିଲେ । ଶେଷରେ ହୋଇଥିଲା କାଳିଆ ସାଆନ୍ତଙ୍କ ପହଣ୍ଡି ବିଜେ । ଚାରମାଳ ଆସିବା ପରେ ଭେଟ ମଣ୍ଡପରେ ମହାଲକ୍ଷ୍ମୀ ଓ ଶ୍ରୀଜଗନ୍ନାଥଙ୍କ ଭେଟନୀତି କରାଯାଇଥିଲା। ରାତି ୧୧ଟା ୫୦ ମିନଟ ବେଳକୁ ଜଗନ୍ନାଥ ମହାପ୍ରଭୁ ସିଂହଦ୍ୱାର ପ୍ରବେଶ କରିଥିଲେ । ମହାପ୍ରଭୁ ଜୟବିଜୟ ଦ୍ୱାରକୁ ଯିବା ପରେ ସେଠାରେ ମହାଲକ୍ଷ୍ମୀ ଦ୍ୱାର ବନ୍ଦ କରି ଦେଇଥିଲେ । ପରମ୍ପରା ଅନୁସାରେ ସେଠାରେ ବଚନିକା ନୀତି କରାଯାଇଥିଲା। ପରେ ବିବାହ ଗଇଁଠାଳ ନୀତି ଓ ରସଗୋଲା ଭୋଗ ପରେ ରତ୍ନ ସିଂହାସନକୁ ବିଜେ କରଥିଲେ କାଳିଆ ଠାକୁର । ତିନି ଠାକୁର ରତ୍ନ ସିଂହାସନରେ ବିଜେ କରିବା ପରେ ବିଳମ୍ୱିତ ରାତିରେ ରୁନ୍ଧ କାର୍ଯ୍ୟ ଓ ଅନ୍ୟାନ୍ୟ ନୀତି ସମ୍ପାଦିତ ହୋଇଥିଲା ।

ଦୀର୍ଘ ୪ ମାସ ଧରି ଚାଲିଥିବା ଚତୁର୍ଦ୍ଧାମୂରତିଙ୍କ ଏହି ଦୁଲ୍ଲଭ ପରମ୍ପରାର ସମସ୍ତ କାର୍ଯ୍ୟକ୍ରମ ସମାପ୍ତ ହୋଇଛି । ୨୦୧୫ ନବକଳେବର ପାଇଁ ଦୀର୍ଘ ୪ ବର୍ଷ ପୂର୍ବରୁ ପ୍ରସ୍ତୁତି ସହ ପୁରୀ ସହରର ଭିତ୍ତିଭୂମି ନିର୍ମାଣ କାମ ଆରମ୍ଭ ହୋଇଥିଲା । ନବକଳେବର ଯାତ୍ରା ଲାଗି ସମସ୍ତ ପ୍ରକାର ଆନୁସଙ୍ଗିକ କାର୍ଯ୍ୟ, ଭକ୍ତ ଓ ଶ୍ରଦ୍ଧାଳୁଙ୍କ ଲାଗି ସୁବିଧା ସୁଯୋଗ, ଯୋଗାଯୋଗ ଓ ଗମନାଗମନ କ୍ଷେତ୍ରର ଉନ୍ନତି, ପୁରୀ ସହର ଓ ଏହାର ଆଖାପାଖର ସୌନ୍ଦର୍ଯ୍ୟକରଣ କାର୍ଯ୍ୟ ମଧ୍ୟ ଶେଷ ହୋଇଥିଲା । ଏହି ସମସ୍ତ କାର୍ଯ୍ୟ ଶାନ୍ତି ଶୃଙ୍ଖଳାର ସହ ଶେଷ ହୋଇଥିବାରୁ ଏହି ମହାନ ଯାତ୍ରା ସହ ସମ୍ପୃକ୍ତ ସମସ୍ତ ବ୍ୟକ୍ତି, ସଂସ୍ଥା ତଥା ଅନୁଷ୍ଠାନକୁ ସରକାର ତଥା ଜିଲ୍ଲା ପ୍ରଶାସନ ପକ୍ଷରୁ ଧନ୍ୟବାଦ ଜ୍ଞାପନ କରାଯାଇଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।