ଧର୍ମଗଡ: ରୋଗୀଙ୍କୁ ନିର୍ଧୁମ ପିଟିଲେ ଡାକ୍ତର। ଠେଙ୍ଗା ବାଡି ସହ ହାତରେ ଯାହା ପଡିଲେ ସେଥିରେ ବାଡେଇଲେ। ବିଧା ସାଙ୍ଗକୁ ଗୋଇଠା ବି କସି ଦେଇଗଲେ। ସେପଟେ ରୋଗୀ ମଧ୍ୟ କିଛି କମ୍ ନୁହେଁ। ସେ ମଧ୍ୟ ଡାକ୍ତରଙ୍କ ଉପରକୁ ଉଠାଇଲା ହାତ। ଚିକିତ୍ସାକୁ ନେଇ ହସ୍ପିଟାଲ ଭିତରେ ପିଟାପିଟି ହେଲେ ଡାକ୍ତର ଆଉ ରୋଗୀ। ଧର୍ମଗଡ ଡାକ୍ତରଖାନା ଭିତରେ ଦେଖିବାକୁ ମିଳିଛି ଏଭଳି କିଛି ଘଟଣା। ଯାହାର ଭିଡିଓ ଏବେ ଭାଇରାଲ ହେବାରେ ଲାଗିଛି।
ସୂଚନା ମୁତାବକ ଗତକାଲି ବିଳମ୍ବିତ ରାତିରେ କଳାହାଣ୍ଡି ଧର୍ମଗଡ଼ ଉପଖଣ୍ଡ ଚିକିତ୍ସାଳୟରେ ଏହି ଘଟଣା ଘଟିଛି। ଜଣେ ରୋଗୀ ପେଟରେ ଯନ୍ତ୍ରଣା ହେଉଥିବା ନେଇ ଉପଖଣ୍ଡ ଚିକିତ୍ସାଳୟକୁ ଆସିଥିଲେ। ହେଲେ ଡାକ୍ତର ଡିୟୁଟିରେ ନଥିବା ଯୋଗୁଁ ସେ ଡାକ୍ତର କୁଆଡେ ଗଲେ ବୋଲି ପଚରା ଉଚୁରା କରିଥିଲେ। ପରେ ମେଡ଼ିସିନ ଖାଇ ଡାକ୍ତରଖାନାରେ ବସିଥିଲେ ରୋଗୀ। ଏତିକି ବେଳେ ଡାକ୍ତର ତାଙ୍କ ଉପରକୁ ମାଡି ଆସିଥିଲେ। କାହିଁକି ହସ୍ପିଟାଲ ଭିତରେ ପାଟିତୁଣ୍ଡ କରୁଛ କହି ରୋଗୀଙ୍କୁ ଆକ୍ରମଣ କରିଥିଲେ, ଏହାପରେ ଉଭୟଙ୍କ ମଧ୍ୟରେ ବଚସା ହୋଇଥିଲା। ପରେ ଏହା ବଢ଼ିଯାଇ ହାତାହାତି ଯାଏଁ କଥା ଯାଇଥିଲା।
ଏପରିକି ଡାକ୍ତର ଜଣକ ରାଗିଯାଇ ରୋଗୀଙ୍କୁ ବାଡିରେ ମଧ୍ୟ ଆକ୍ରମଣ କରିଥିବା ଅଭିଯୋଗ ହୋଇଛି। ଏହାର ପ୍ରତି ଉତ୍ତରରେ ରୋଗୀ ମଧ୍ୟ ଡାକ୍ତରଙ୍କୁ ଆକ୍ରମଣ କରିଥିଲେ। ଉଭୟଙ୍କ ମଧ୍ୟରେ ଏଭଳି କଳି ଚାଲିଥିବା ଦେଇ ପୁଲିସକୁ ସୂଚନା ଦିଆଯାଇଥିଲା। ପୁଲିସ ଘଟଣାସ୍ଥଳରେ ପହଞ୍ଚି ଉକ୍ତ ଡାକ୍ତରଙ୍କୁ ଥାନାକୁ ନେଇଛି। ଉଭୟ ପକ୍ଷରୁ ଧର୍ମଗଡ଼ ଥାନାରେ ଲିଖିତ ଅଭିଯୋଗ କରିଛନ୍ତି।
ସେପଟେ ଘଟଣାକୁ ନେଇ ମୁକେଶ ନାଏକଙ୍କ ପରିବାର ଏବଂ ପଡାଵାସୀଙ୍କ ପକ୍ଷରୁ ଡାକ୍ତରଖାନା ସମ୍ମୁଖରେ ଜାତୀୟ ରାଜପଥକୁ ଅବରୋଧ କରାଯାଇଛି। ଡାକ୍ତର ଶୈଳେଶ କୁମାର ଦୋରାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବା ଲାଗି ଲୋକମାନେ ଦାବି କରିଛନ୍ତି। ଘଟଣାସ୍ଥଳରେ ଧର୍ମଗଡ ଡିଏସ୍ପି ପହଞ୍ଚି ଲୋକମାନଙ୍କୁ ବୁଝାସୁଝା କରିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
