୭୦ ବର୍ଷରେ ବୁଢୀକୁ ପାଉଡର ଦେବା ଯାହା, ମତେ ପଦ୍ମଶ୍ରୀ ମିଳିବା ତାହା

ନୂଆଦିଲ୍ଲୀ(ଓଡିଶା ରିପୋର୍ଟର): ଚଳଚ୍ଚିତ୍ର ନିର୍ଦ୍ଦେଶକ ଶିଶିର ମିଶ୍ର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପରେ ବର୍ଷିଛନ୍ତି। ତାହା ପୁଣି ଖୋଦ୍‌ ମୁଖ୍ୟମନ୍ତ୍ରୀଙ୍କ ପ୍ରାୟୋଜିତ କାର୍ଯ୍ୟକ୍ରମରେ। ଯାହା କହିଛନ୍ତି ଶୁଣିଲେ ଆପଣଙ୍କ ଅକଲ ଗୁଡୁମ୍‌ ହୋଇଯିବ।

ସମସ୍ତେ ଜାଣନ୍ତି ଯେ, ମିଶ୍ରଙ୍କୁ ଏଥର ପଦ୍ମଶ୍ରୀ ମିଳିବ। ଦେଶର ଏହି ଗୌରବଜ୍ୱଳ ସମ୍ମାନ ପାଇଁ ହକ୍‌ଦାର ହୋଇଥିବା ଶ୍ରୀଯୁକ୍ତ ମିଶ୍ର କିନ୍ତୁ ଏଥିରେ ଆଦୌ ଖୁସି ଥିବା ପରି ଲାଗୁନି। ଦିଲ୍ଲୀରେ ଆୟୋଜିତ “Tall Man Biju Pattnaik” ପୁସ୍ତକ ଲୋକାର୍ପଣ ବେଳେ ମୁଖ୍ୟମନ୍ତ୍ରୀଙ୍କ ଉପରେ ସେ ଖାଲି ବିଗିଡି ନାହାନ୍ତି ଅଖାଡୁଆ ଢଙ୍ଗରେ କ୍ଷୋଭ ପ୍ରକାଶ ବି କରିଛନ୍ତି। କ’ଣ କହିଛନ୍ତି ପଢନ୍ତୁ।

“ନବୀନ ବାବୁ କୌଣସି ଓଡ଼ିଆ ଲୋକଙ୍କୁ ଚିହ୍ନନ୍ତି ନାହିଁ। ମତେ କ’ଣ ଚିହ୍ନିବେ। ସେଇଥିପାଇଁ ବୋଧେ ମୋ ନାଁ ସୁପାରିସ୍‌ ହେଲାନି। ଯୋଉ ବୟସରେ ମୋତେ ପଦ୍ମବିଭୂଷଣ ମିଳିବା କଥା ସେ ବୟସରେ ମିଳୁଛି ପଦ୍ମଶ୍ରୀ। ୭୦ ବର୍ଷ ବୟସରେ ବୁଢୀ ମୁହଁରେ ପାଉଡର ମାଖିବା ଯାହା ମତେ ପଦ୍ମଶ୍ରୀ ମିଳିବା ସେଇଆ।”

ପଢିଲେ ତ, କି ସାଙ୍ଘାତିକ ଅଭିଯୋଗ। ଜଣେ ବର୍ଷିଆନ ସିନେ ନିର୍ଦ୍ଦେଶକଙ୍କୁ ଏମିତି କ’ଣ ବାଧିଲା ଯେ, ସେ ନିଜ ପୁରସ୍କାରକୁ ପାଉଡ଼ର ସହ ତୁଳନା କଲେ। ଆପଣ ଭାବୁଥିବେ ବାସ୍ତବରେ କଥାଟା କ’ଣ କି !

ଅବଶ୍ୟ କଥାଟି ବାଧିଲା ଭଳିଆ। ସେ ଜଣେ ସୁଯୋଗ୍ୟ ଓଡିଆ ପୁଅ । ହେଲେ ତାଙ୍କ ପଦ୍ମ ପୁରସ୍କାର ପାଇଁ ସୁପାରିସ୍‌ କରିଛି ମହାରାଷ୍ଟ୍ର। କି ଲଜ୍ଜାଦାୟକ କଥା ଆପଣ ଜାଣିପାରୁଥିବେ । ଏଣୁ ଜଣେ ଓଡ଼ିଆ ପୁଅ ଏମିତି ଢଙ୍ଗରେ କ୍ଷୋଭ ପ୍ରକାଶ କରିବା ସତରେ କେଡେ ଦୁଃଖଦାୟକ ଭାବନ୍ତୁ ତ।