ଆଇଆରସିଟିସି ପୋଷ୍ଟରରେ ଶ୍ରୀମନ୍ଦିରର ଭୁଲ୍‌ ଫଟୋ

ପୁରୀ(ଓଡ଼ିଶା ରିପୋର୍ଟର): ପୁରୀ ଶ୍ରୀ ଜଗନ୍ନାଥ ମନ୍ଦିର ଲେଖାଥିବା ଏକ ପୋଷ୍ଟରକୁ ନେଇ ବିବାଦ ଦେଖାଦେଇଛି।ମୁମ୍ବାଇର ଛତ୍ରପତି ଶିବାଜୀ ଟର୍ମିନାଲରେ ଲାଗିଥିବା ଏକ ପୋଷ୍ଟରକୁ ନେଇ ବିବାଦ ଉପୁଜିଛି।  ଆଇଆରସିଟିସି ରେଳଷ୍ଟେସନ ପରିସରରେ ଲଗାଯାଇଥିବା ଏହି ପୋଷ୍ଟରରେ ହାଇଦ୍ରାବାଦ୍‌ ଜଗନ୍ନାଥ ମନ୍ଦିର ଛବି ଥାଇ ପୁରୀ ଜଗନ୍ନାଥ ଟେମ୍ପୁଲ ବୋଲି ଇଂରାଜିରେ ଉଲ୍ଲିଖିତ ରହିଛି।

ଲଗାଯାଇଥିବା ପୋଷ୍ଟର ଆଇଆରସିଟିସି ପକ୍ଷରୁ ଭାରତ ଦର୍ଶନ ପାଇଁ ଉଦ୍ଦିଷ୍ଟ। ମୁମ୍ବାଇ ଯାଇଥିବା ପୁରୀର ସେବାୟତ ଶମ୍ବୁନାଥ ଖୁଣ୍ଟିଆଙ୍କ ନଜରରେ ଏହା ପଡିବାରୁ ସେ ଆଶ୍ଚର୍ଯ୍ୟ ପ୍ରକଟ କରିବା ସହ ସୋସିଆଲ ମିଡିଆରେ ଏହି ଫଟୋ ଛାଡି ଦେଇଥିଲେ। ପରେ ଏହା ଭାଇରାଲ ହୋଇଥିଲା। ଶ୍ରୀଜଗନ୍ନାଥ ମନ୍ଦିର ପରିବର୍ତ୍ତେ ଅନ୍ୟ କେଉଁ ମନ୍ଦିରର ଫଟୋ ରହିଥିବାରୁ ଶ୍ରୀଜଗନ୍ନାଥଙ୍କ ପ୍ରତି ଏହା ଅପମାନ ବୋଲି ଶମ୍ବୁନାଥ କମେଣ୍ଟରେ ଉଲ୍ଲେଖ କରିଛନ୍ତି। ଶମ୍ବୁନାଥଙ୍କ ସହ ଅନ୍ୟମାନେ ବି ଏନେଇ ସୋସିଆଲ ମିଡିଆରେ ତୀବ୍ର ପ୍ରତିକ୍ରିୟା ରଖିଛନ୍ତି। ତେବେ ଏନେଇ ରେଲୱେ କର୍ତ୍ତୃପକ୍ଷଙ୍କ ପ୍ରତିକ୍ରିୟା ମିଳିପାରିନି।

ଗତ ୨୦୧୬ ମସିହାରେ ମଧ୍ୟ ଇଣ୍ଡିଆନ ଏୟାରଲାଇନ୍ସର ସୂଚନା ପତ୍ରିକାରେ ଶ୍ରୀଜଗନ୍ନାଥ ମନ୍ଦିରରେ ଆମିଷ ଭୋଗ କରାଯାଉଥିବା ନେଇ ଉଲ୍ଲେଖ କରାଯାଇଥିଲା। ସେତେବେଳେ ସେହି ଘଟଣା ନେଇ ତୀବ୍ର ପ୍ରତିକ୍ରୀୟା ପ୍ରକାଶ ପାଇବା ପରେ ଏୟାରଲାଇନ୍ସ କର୍ତ୍ତୃପକ୍ଷ କ୍ଷମା ପ୍ରାର୍ଥନା କରିବା ସହ ପତ୍ରିକାକୁ ହଟାଇ ନେଇଥିଲ।