କାମାକ୍ଷାନଗର(ବିଦ୍ୟାଧର ବରାଳ): ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ଗଡ଼ପଳାଶୁଣି ଗ୍ରାମର ଜିଦି ପୋଖରୀ ନିକଟରେ ଏକ ପିକ୍ଅପ୍ ଧକ୍କାରେ ଜଣେ ଦଶମ ଶ୍ରେଣୀ ଛାତ୍ରୀଙ୍କ ମୃତ୍ୟୁ ହୋଇଛି। ମୃତା ଛାତ୍ରୀଜଣକ ହେଲେ ଗ୍ରାମର ଅଲେଖ ନାୟକଙ୍କ ଝିଅ ଲିଜା ନାୟକ । ଏହି ଦୁର୍ଘଟଣାରେ ଗ୍ରାମର ସତ୍ୟାନନ୍ଦ ନାୟକଙ୍କ ସ୍ତ୍ରୀ ବେଡି ନାୟକ ଆହତ ହୋଇଛନ୍ତି ।
ଲିଜା ବାପୁଜି ଉଚ୍ଚ ବିଦ୍ୟାଳୟରେ ଦଶମ ଶ୍ରେଣୀରେ ପାଠ ପଢୁଥିଲେ। ଆଜି ମାଟ୍ରିକ ଟେଷ୍ଟ ପରୀକ୍ଷା ଥିଲା । ଏହାପୂର୍ବରୁ ଲିଜା ଗାଁ ପୋଖରୀ ନିକଟକୁ ଗାଧୋଇବାକୁ ଯାଇଥିବା ବେଳେ ଗଡ଼ପଳାଶୁଣିରୁ କଙ୍କଡାହାଡ଼ ଯାଉଥିବା ଏକ ପିକଅପ୍ ଭ୍ୟାନ ତାଙ୍କୁ ଧକ୍କା ଦେଇଥିଲା । ଘଟଣା ସ୍ଥଳରେ ହିଁ ତାଙ୍କ ମୃତ୍ୟୁ ହୋଇଥିଲା ।
ପରିବାର ଲୋକ ଓ ଗ୍ରାମବାସୀ କ୍ଷତିପୂରଣ ଦାବିରେ ପ୍ରାୟ ୨ ଘଣ୍ଟା ଧରି ରାସ୍ତା ଅବରୋଧ କରିଥିଲେ । ଘଟଣାସ୍ଥଳରେ ପରଜଙ୍ଗ ଥାନା ଅଧିକାରୀ, ମହାବିରୋଡ଼ ଫାଣ୍ଡି ଅଧିକାରୀ ପହଞ୍ଚି ମୃତା ଛାତ୍ରୀଙ୍କ ପରିବାରକୁ କ୍ଷତିପୂରଣ ପ୍ରଦାନ ପାଇଁ ପ୍ରତିଶ୍ରୁତି ଦେବା ପରେ ରାସ୍ତା ଅବରୋଧ ଉଠିଥିଲା ।