ଭୁବନେଶ୍ୱର(ଓଡ଼ିଶା ରିପୋର୍ଟର): କଂଗ୍ରେସ ଓ ବିଜେଡି ଭଳି ବିଜେପିକୁ ବି ଟିକେଟ୍ ରୋଗ। ଏକାଧିକ ଆଶାୟୀଙ୍କୁ ନେଇ ତୁଟୁନି ୪ ଲୋକସଭା ପାଇଁ ଅଙ୍କ। ଏଣେ ବୁଝାସୁଝା ପରେ ପାର୍ଟି ଅଫିସ ପରିସରରୁ ଧାରଣାରୁ ଉଠିଲେ ଅମିୟଙ୍କ ସମର୍ଥକ।
ବିଜେଡି, କଂଗ୍ରେସ ପରେ ବିଜେପିରେ ବି ଟିକେଟକୁ ନେଇ ଘମାସାନ। ୧୦ଲୋକସଭା ଓ ୯୯ବିଧାନସଭା ଆସନ ପାଇଁ ଟିକେଟ ଘୋଷଣା ହୋଇଥିଲେ ବି ପ୍ରଥମ ଓ ଦ୍ୱିତୀୟ ପର୍ଯ୍ୟାୟ ପାଇଁ ୪ଲୋକସଭା ଓ ୨୫ବିଧାନସଭା ଆସନ ପାଇଁ ଅଙ୍କ ଛିଣ୍ଡୁନି। ନୂଆ ଚେହେରା ଭାବେ ୬୪ ଜଣଙ୍କୁ ଦଳ ଟିକେଟ ଦେଇଥିବାବେଳେ ଘୋଷିତ ୯୯ ପ୍ରାର୍ଥୀଙ୍କ ଭିତରେ ଅଛନ୍ତି ୯ ମହିଳା । ତେବେ ଟିକେଟ କଟିଥିବା ପ୍ରତିବାଦରେ ଭୁବନେଶ୍ୱର ଏକାମ୍ର ପ୍ରାର୍ଥୀଙ୍କ ସମର୍ଥକ ରାଜ୍ୟ କାଯର୍ୟାଳୟରେ ତାଲା ପକାଇ ଦେଇଛନ୍ତି। ସେହିପରି ପ୍ରଥମ ପର୍ଯ୍ୟାୟରେ ନିର୍ବାଚନ ହେବାକୁ ଥିବା କଳାହାଣ୍ଡି ଓ କୋରାପୁଟରେ ବିଜେପିର ଆସନ ଅଙ୍କ କିନ୍ତୁ ଛିଣ୍ଡିନି।
କୁହାଯାଉଛି, କଳାହାଣ୍ଡି ଲୋକସଭା ପାଇଁ ଦଳର ରାଜ୍ୟ ସଭାପତି ଆଶାୟୀ ଥିବାରୁ ଦ୍ୱନ୍ଦ୍ୱ ରହିଛି। ପୂର୍ବଥର ଲଢ଼ିଥିବା ପ୍ରଦୀପ୍ତ ନାଏକ ଓ ବିଜେଡି ସାଂସଦ ଅର୍କକେଶରୀ ଦେଓ ଦଳ ଛାଡିବା ପରେ ତାଙ୍କ ନାଁକୁ ନେଇ ବି ଚର୍ଚ୍ଚା ହେଉଛି । କୋରାପୁଟରେ ଜୟରାମ ପାଙ୍ଗୀ ଆଶାୟୀଙ୍କ ଭିତରେ ଆଗରେ ଥିବାରୁ ସେଠି ବି ନିଷ୍ପତ୍ତି ହୋଇନି । ସେହିପରି ଦ୍ୱିତୀୟ ପର୍ଯ୍ୟାୟରେ ନିର୍ବାଚନ ହେବାକୁ ଥିବା ବରଗଡ ଓ କନ୍ଧମାଳ ଆସନର ଅଙ୍କ ମଧ୍ୟ ଛିଣ୍ଡିନି।
ସେପଟେ ବିଧାନସଭା ପାଇଁ ପ୍ରଥମ ଦଫାରେ ୯୯ଟି ଆସନ ପାଇଁ ପ୍ରାର୍ଥୀ ଘୋଷଣା କରିଛି ବିଜେପି । ହେଲେ ଏଥିରେ ବି ପ୍ରଥମ ପର୍ଯ୍ୟାୟର ୧୩ ଓ ଦ୍ୱିତୀୟ ପର୍ଯ୍ୟାୟର ୧୨ଟି, ଏମିତି ମୋଟ୍ ୨୫ଟି ଆସନର ଟିକେଟ ଫଇସଲା ହୋଇନି । ସମୁଦାୟ ୬୪ ଜଣ ନୂଆ ଚେହେରାଙ୍କୁ ଦଳ ମଇଦାନକୁ ଛାଡିଛି । ଯଦିଓ ଏମାନଙ୍କ ମଧ୍ୟରୁ ଅନେକ ଅନ୍ୟ ଦଳରେ ଲଢ଼ି ମନ୍ତ୍ରୀ, ବିଧାୟକ ଓ ପ୍ରାର୍ଥୀ ବି ହୋଇଥିଲେ। ତେବେ ୯୯ ମଧ୍ୟରୁ ୯ ଜଣ ମହିଳାଙ୍କୁ ଦଳ ଟିକେଟ ଦେଇଛି।
ସେମାନଙ୍କ ଭିତରେ ଅଛନ୍ତି ଦଳର ରାଜ୍ୟ ମହିଳା ସାମ୍ମୁଖ୍ୟର ସଭାନେତ୍ରୀ ପ୍ରଭତୀ ପରିଡ଼ା। ତା’ସହ ନିକଟରେ ବିଜେଡି ଓ କଂଗ୍ରେସ ଛାଡି ଆସିଥିବା ନେତାଙ୍କ ମଧ୍ୟରୁ ଡାକ୍ତର ଦାମୋଦର ରାଉତ, ପ୍ରକାଶ ବେହେରା, କେ. ନାରାୟଣ ରାଓ, କୁସୁମ ଟେଟେ, ବାବୁ ସିଂଙ୍କୁ ମଧ୍ୟ ଦଳ ପ୍ରାର୍ଥୀ କରିଛି। ୧୦ ବିଧାୟକଙ୍କ ମଧ୍ୟରୁ ୫ ଜଣଙ୍କ ଉପରେ ପୁଣିଥରେ ଆସ୍ଥା ପ୍ରକଟ କରିଛି ବିଜେପି।
ଅନ୍ୟପଟେ ଭୁବନେଶ୍ୱର ଏକାମ୍ର ପାଇଁ ଆଶାୟୀ ଅମୀୟ ଦାଶଙ୍କ ଟିକେଟ କଟିବା ପରେ ଗତକାଲି ବିଳମ୍ବିତ ରାତିରୁ ତାଙ୍କ ସମର୍ଥକ ବିଜେପି ରାଜ୍ୟ କାର୍ଯ୍ୟାଳୟ ଆଗରେ ଧାରଣାରେ ବସିଛନ୍ତି । ଆଜି ସକାଳେ ସେମାନେ କାର୍ଯ୍ୟାଳୟରେ ତାଲା ବି ପକାଇ ଦେଇଥିଲେ। ଅମୀୟଙ୍କୁ ଡାକି କେନ୍ଦ୍ରମନ୍ତ୍ରୀ ଆଲୋଚନା କରିଥିଲେ। ପରେ ବରିଷ୍ଠ ନେତାଙ୍କ ହସ୍ତକ୍ଷେପ ପରେ ତାଲା ଖୋଲିଥିଲା ସେପଟେ ଲକ୍ଷ୍ମୀପୁର ବିଜେପି କାର୍ଯ୍ୟାଳୟ ମଧ୍ୟରେ ଅସନ୍ତୁଷ୍ଟ ଆଶାୟୀଙ୍କ ସମର୍ଥକମାନେ ଭଙ୍ଗାରୁଜା କରିଛନ୍ତି । ଦଳକୁ ଆସୁ ଆସୁ ଟିକେଟ ମିଳିଥିବା ନେତାଙ୍କୁ ଦେଇ ଆରମ୍ଭ ହୋଇଥିବା ଅସନ୍ତୋଷକୁ ଦଳ କେମିତି ପ୍ରଶମିତ କରୁଛି ଏବେ ତା’ ଉପରେ ନଜର ରହିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
