ଭୁବନେଶ୍ୱର/କଟକ(ଓଡ଼ିଶା ରିପୋର୍ଟର): ରାତି ପାହିଲେ ମାଟ୍ରିକ୍ ପରୀକ୍ଷା। ଏଥିପାଇଁ ପ୍ରସ୍ତୁତି ଜୋରଦାର କରିଛନ୍ତି ଛାତ୍ରଛାତ୍ରୀ । ସିଲାବସ୍ ସାରିବାକୁ ଶେଷ ମୁହୂର୍ତ୍ତରେ ବି ପ୍ରୟାସ ଜାରି ରହିଛି । କାରଣ ଏହା ହେଉଛି ସେମାନଙ୍କ ପାଇଁ ଫାଇନାଲ୍ ସୁଯୋଗ । ସେପଟେ ପରୀକ୍ଷା କେନ୍ଦ୍ରଗୁଡିକ ପୁରା ତୟାର । ହଲ୍ ଗୁଡିକରେ ସାମାଜିକ ଦୂରତା ଅବଲମ୍ବନ କରାଯାଇ ସିଟିଂ ଆରେଞ୍ଜମେଣ୍ଟ ହୋଇଛି । କ୍ୟାମ୍ପସକୁ ମଧ୍ୟ ବିଶୋଧନ କରାଯାଇଛି । ଏହାସହ ପରୀକ୍ଷା କେନ୍ଦ୍ରରେ ପ୍ରସ୍ତୁତ କରାଯାଇଛି ଆଇସୋଲେସନ୍ ରୁମ୍ । ଥର୍ମାଲ୍ ସ୍କ୍ରିନିଂ ଓ ସାନିଟାଇଜ୍ କରି ପରୀକ୍ଷାର୍ଥୀମାନେ ହଲ୍ ଭିତରକୁ ଯିବେ । ପରୀକ୍ଷା ଦେବା ସମୟରେ ମାସ୍କ ପିନ୍ଧିବା ବାଧ୍ୟତା ମୂଳକ କରାଯାଇଛି। କରୋନା ପାଇଁ ଚଳିତ ବର୍ଷ ମାଟ୍ରିକ୍ ବୋର୍ଡ ପରୀକ୍ଷା କରାଯାଇନଥିଲା ବିକଳ୍ପ ମୂଲ୍ୟାୟନ ପଦ୍ଧତିରେ ଦିଆଗଲା ମାର୍କ । ତେବେ ଏଥିରେ ଅସନ୍ତୁଷ୍ଟ ଥିବା ଛାତ୍ରଛାତ୍ରୀଙ୍କ ପାଇଁ କାଲିଠାରୁ ଆରମ୍ଭ ହେବ ଅଫ୍ ଲାଇନ୍ ପରୀକ୍ଷା ।
ମୋଟ୍ ୧୫ ହଜାର ୧୩୬ ଜଣ ପରୀକ୍ଷାର୍ଥୀ ଅଫ୍ ଲାଇନ୍ ପରୀକ୍ଷା ଦେବେ । ଏଥିପାଇଁ ୫୦୪ଟି ପରୀକ୍ଷା କେନ୍ଦ୍ର ହୋଇଛି । ପ୍ରଥମ ଦିନରେ ମାତୃଭାଷାରେ ପରୀକ୍ଷା ଅନୁଷ୍ଠିତ ହେବ । ଦିନ ୧୦ଟାରୁ ୧୧ ଟା ଯାଏ ଓଏମ୍ଆର୍ ଜରିଆରେ ୫୦ ମାର୍କର ଅବଜେକ୍ଟିଭ ଓ ୧୧ଟାରୁ ୧୨ ଟା ଯାଏ ୩୦ ମାର୍କର ସବଜେକ୍ଟିଭ ପରୀକ୍ଷା ଦେବେ ପରୀକ୍ଷାର୍ଥୀ । ମୋଟ୍ ୮୦ ମାର୍କର ପରୀକ୍ଷା ଦେବେ ଛାତ୍ରାଛାତ୍ରୀ । ହେଲେ ମାର୍କିଂ କରାଯିବ ଶହେ ନମ୍ବରରୁ । ଶୃଙ୍ଖଳିତ ପରୀକ୍ଷା ପରିଚାଳନା ପାଇଁ ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଥିବା ଗଣଶିକ୍ଷା ମନ୍ତ୍ରୀ ସୂଚନା ଦେଇଛନ୍ତି।
ପରୀକ୍ଷା ଅଗଷ୍ଟ ୫ ଯାଏ ଚାଲିବ । ବୋର୍ଡର ସୂଚନା ଅନୁଯାୟୀ ପରୀକ୍ଷା ଶେଷ ହେବାର ୧୫ଦିନ ଭିତରେ ପ୍ରକାଶ ପାଇବ ରେଜଲ୍ଟ । ତେବେ ଅଫ୍ ଲାଇନ୍ ପରୀକ୍ଷା ଦେଉଥିବା ପରୀକ୍ଷାର୍ଥୀଙ୍କ ପାଇଁ ଏହି ପରୀକ୍ଷାର ମାର୍କ ଚୂଡାନ୍ତ ହେବ । ବିକଳ୍ପ ମୂଲ୍ୟାୟନରେ ପୂର୍ବରୁ ମିଳିଥିବା ମାର୍କ ବୈଧ ରହିବ ନାହିଁ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
